1 Bwulus, wa ce Asahindirida əwye cewo, wa gna, "Əmi azaje, mi kwu əmi Shekwoyi tnutnu zozhni n nunui dna n tukwovnyi manai nya n naiye." 2 Ntu dəye da ɓo, pirisiti dnagbmai, Ananiyasi wa ga aza yi əgbe n ɓa ɓə gnyiagnyi ma Bwulus nyi, nge ɓa znu wo əgbe ənya. 3 Nlonu, Bwulus wa gna wo, "Shekwoyi ɓa znu ho ənya, əho kwocednayi! Ho sasetu n abaayi hoi znu əɓo ya tu mi ngye shi owa ncei tu, dudulonu əho n əhohni tukwo, ho la owa znugna she ha ga əgbe nge a la mi znu əgbe nya!"

4 Aza yi n ɓa ɓə gnyiagnyi zhi vyivyiwyi n Bwulusii, ɓa gna, "Ho zhni nyika nu, hoi knyi Shekwoyi pirisiti dnagbmai akpmi a?"

5 Bwulus wa dnaɓəgbe, "Əmi azaje, mi to ɓəə kpe nge wo zhni pirisiti dnagbmai nu m; ntuge kwo kafyilo: ‘To da ɓəda nukwoi tu n əfye əbegyiyi tukwo m.’ "

6 Nlonu, Bwulus woi kpe nge azaho n ɓa, ɓa ɓə zhni Asadusiyi nu, jesnu azaje Afarisiyi, wa sawyidna n Sahindiri wa gna, "Əmi Azaje, mi zhni Farisiyi nu, mi gbmi n Afarisiyi ofye nu. A da owa n mii ntu əmi awyetu əfyikalakwu nya ɓo nu." 7 She wo ɓə da dəye, aɓənakpeaje kwa laka dna n Afarisiyi atasni n Asadusiyii, nlonu azadogwnu ɓaa gnajeya. 8 (Asadusiyi gna nge əfyikalakwu to lo m, jesnu n amaləkai n azafnui m, ama Afarisiyi ɓa n gaiciyai ga n aɓo ye vnyanya.)

9 Wyina yaakwo kwa laka gnyi, jesnu azaho n owa anyawuyi, n ɓa ɓə zhni Afarisiyi, ɓa kwukazhi agnyi ɓa naɓo n əwyei bmyibmyii. Ɓa gna, "Yi too gye əɓo nukwoi ho n əza ye aba m. Ngye zafnu nu, kwo maləka nu, naa daɓo n woi ma a?" 10 Aɓənakpeaje kwa gna nazhizhi, ngye ɓa ɓaa Bwulus saya wyiwowyiwo, kwa zhni ədna kwa wo bəzheyaakwo. Wa ga əgbe nge akwnuyi ɓa shnilo ɓə fna wo n əɓa akwnu, n akalái, jesnu ɓa ɓə n woi n akwnuyi apyiznudna.

11 Dna n sukwo n kwo ɓə yatu nyi, Dagayi wa gnyiagnyi gnyi vyivyiwyi n Bwulusii wa gna, "La bwugba dnakalá! Shi ho la əɓo gbmi n əmi ɓo, n dna n Urishelima nyi, nlonu ɓəshishi nu n ho ɓə gbmi əmi ɓo ce, dna n Roma."

12 Əfye kwa gyi zhi, Ayahudiyi ho ɓa kwu kwúlupa, jesnu ɓa kwu nyasi si nge ɓa taa gyi nyagyi kwo ɓa sni nyaho m, akpəge ɓa lá Bwulus wu. 13 Ɓa ɓə du azanugbai shiinyi ya, n ɓa ɓə n aɓwai fyi n kwúlupa ye. 14 Ɓa lo da apirisiti atukwoda ɓədo n abyedai ɓa gna, "Yi kwu nyasi si, n ədnaidna, nge yi taa gyi nyagyi m akpəge yi la Bwulus wu. 15 To, nsaiye, əfye n Sahindiri yi, fye ka paka ɓətu nya ga bəzheyaakwo, woi ɓe n woi n əfye abye n wu ngye fye ncei pmalo fya ɓwa aɓo akpokəloi nu shi, ntu ɓəda ye ɓo. Yi n əyihnii yeyei lo yii la wo wu to woi si n ya m."

16 Ama she Bwulus mapwii nugwnu ɓə gnyi woi wo əɓa kwúlupa ye, wa bwusi lo akwnuyi apyiznudna wa kwu kwo gna Bwulus.

17 Nlonu Bwulus wa yì okwnu tukwoda ho wa gna, "La əɓyikasa ye lo ncei n bəzheyaakwo aba: wo n ɓəhoi lo wa gna wo." 18 Ntulonu wa la wo, wa lo n woi n bəzheyaakwo aba.

Bəzheyaakwo wa gna, "Bwulus zhaluda, nu naa tnu mi əɓo, wonyi gna mi ge mi ɓə n əɓyikasa yei n əho aba, ntuge wo n ɓəhoi lo wa gna ho."

19 Bəzheyaakwo wa taɓwashi wo, waa wo pmyignyi n gnagna, wa nya wo əɓo, "Knyi əɓoi nu n ho ye ha gna mi a?"

20 Wa gna, "Ayahudiyi ho ɓa kwu əgbe lodo ɓa nyaɓo nge ho ɓəə ɓe n Bwulusii n Sahindiri abye nsu, ɓai zhni ngye ɓa ye ɓa ɓwa aɓo akpokəloi nu shi dəidəi ntu əwo ɓo. 21 To ɓə ye m, ntuge aza n du shiinyi ya n ɓa, n ɓwufyi lo, ɓai pmi wo, ntuge ɓai wu wo. Ɓa kwu nyasi si nge ɓa ta gyi nyagyi kwo ɓa sni nyaho m, sai ɓa la wo wu. Ɓa n əɓahnii kwukwui lo, ɓa zhi ɓai pmi əɓa ɓənya ɓəgbedna nu, n əho aba."

22 Bəzheyaakwo wa gna əɓyikasa yi ami n ɓəkpma yei: "To gna əzahozahoyi nge ho kwu lafyiya ye wu mi m."

23 Nlonu wa yì əwo abəzhetagyida ngwnu-aba jesnu wa ga ɓa əgbe, "Fye kwu əfyehni kwuu nsayisayi, fya kwu bəzhetagyida ngwnu-aba, adokwo gwnuyi shiitnaaba jesnu n amashidai tagyi ngwnu-aba, fya lo Kaisariya n snukna ciwagbmanyii dna n sukwo ye. 24 Fye la adokwo vyi ɓo ga Bwulus nabai n a ɓa la wo lo Gwomna Fyelisi aba ncei dna n aknawna."

25 Wa ka paka shnilo ncei nlai:

26 Kwo gbmi n Klaudus Lisiyas aba nu,

Kwoi lo da Gwomna Manai, Fyelisi:

Amisa.

27 Ayahudiyii nu ɓə wna əza ye, jesnu ɓa ɓə ye ɓa wu wo nu, ama ma ɓe n əmi akwnuyii, ma gnyi wo, ntuge mi ɓə kwu wo nge wo zhni Roma əknyiɓyi nu. 28 Mi ɓə ncei pma ma kpe əɓo əye n kwo ɓə zhni ɓai kpe wo aɓo, ntucenu mii ɓe n woi n əɓa Sahindiri aba. 29 Əɓo n ma ɓe mi kpeye, əkwo nu nge, aɓəma ye laka ntu aɓonya ho nu, əɓa owa nya, ama əɓo kpokəlo ho to lo, n kwo kwnuce n əfyii kwo gwugwudna m. 30 She a wu mi lafyiya kwúlupa tu n əza ye tukwo nabai a wna wo, minyi tnu n woi n əho aba n əsagbmanyii. Mi kwu gna əwo aɓəmai ce nge ɓa ɓe ɓa da aɓo n ɓa kpe wo nyi.

31 Ntulonu akwnuyi ɓai vyi ɓəgbetu, ɓa la Bwulus dna n sukwoi n kwnusnu n ɓai, ɓa ɓe n woi ɓa kwu si Antipatis. 32 Əfye kwa gyi zhi ɓa fa akwnuyi adokwoda, ɓa la wo lo ncei, aza n ɓa ɓə ce nyi, ɓa jezezhi akwnuyi apyiznudna. 33 She akwnuyi adokwoda ɓə si Kaisariya, ɓa ga gwomna paka jesnu ɓaa Bwulus ga əwo. 34 Gwomna wa ba paka, wa nyaɓo, əknyisəpa n wo gbmi. She wo ɓə wo nge wo gbmi n Kilikiya nu, 35 wa gna, "Mi ɓə kna əho ɓəda tnubwa, əsa n əho aɓokpeyi ɓə kwu si n ya." Nlonu wa ga əgbe nge a la Bwulus gwudna n Hiridusu galukwo abagwuyi akwnu.