1 Apirisiti n Dagayipwuwa abagwuyi tukwodai ɓədo n Asadusiyii, ɓa ɓe da Byitusu n Yohanai əsa n ɓa ɓə zhi ɓai daɓo n azai. 2 Ɓa ɓə zhi n bwugbawnu yaakwoi nu, ntuge atnutnuloyi ɓə zhi ɓai wunya jesnu ɓai zhni waazi Yeisu kala la nya n əfyi. 3 Ɓa wna Byitusu n Yohanai, ɓa kwu ɓa fyi n zhalu nya fyegyi, ntuge wyeshe ɓə la she. 4 Ama aza bəgyé n ɓa ɓə wo ɓəda nyi, ɓa kwu gaiciyaga; ntulonu azanugbai n ɓa ɓə ga gaiciya nyi, ɓa ɓə kwu snu ngye adugwu-atnu.

5 Əfye kwa gyi zhi, abegyiyi, abyeda n owa anyawuyii ɓa gwnudo fyi n Urishelima. 6 Anas pirisiti dnagbmai ɓə gnyi n abaayi, Kayafas ɓə gnyi n ɓo ce, Yohana, Alekzanda n azajei n ɓa kwnu n pirisiti dnagbmai pwuwa nyi. 7 Ɓa gna a ɓe ɓa n Byitusu n Yohanai n əɓa abye jesnu ɓa ya ɓa aɓənya: "N knyi kalái nu kwo əye n fya zhni ɓəye ncei a?"

8 Nlonu Byitusu, n nunui n Zafnu Gyigyiyii, wa gna ɓa: "Abegyiyi n abyeda əknyi nyai! 9 Ngye a n əyii yizhi, ya ga nyadokwu nu n naiye, ntu n tnutnu manai ɓo n a zhni əzabmazhi ye, ngye əcenu zhni ai nya yi əɓo shi wa ɓwa kágna n wu, 10 nlonu fye kwu ɓəye kpeye, əfye n Aisrailayii vnyanya: A zhni kwo dna n Yeisu Kirisiti Nazereti əye nu, n fye ɓə znudu nyi, ama Shekwoyi ɓə la wo laka n əfyi, n əwoi nu n kwo zhni əza ye gnyi n kágna n əfye abye. 11 Yeisu zhni

" ‘Kwuta nu n əfye anyamiyi ɓə la kwo aɓəna,

əkwo nu la zè nyakwnu ɓwakwonu kwuta.’

12 Ata shna gnyignyi ɓwa n əzaho m, ntuge əye ədo to shnasnu lo ń əshemi snuta, n a la ga azanyikwoci n kwo zhni ɓəshishi nu, ya pwo n əkwoi m."

13 Shi ɓa ɓə gye Byitusu agwumyi n Yohana nyai jesnu ɓa kwu kpe nge ɓa to n ənyai babai lo m, azanyikwoci azanga nu ɓwasnu, ca wo ɓa, nlonu ɓa kwu kpe nge aza ye ɓə kwu kwnusnu n Yeisui. 14 Ama shikwonyi ɓa ɓə kwu gye əza n wo ɓə gwo kágna nyi, n kwnusnu n ɓai, to ɓa ɓwa ɓəho n shnasnu n ɓa ɓá da m. 15 Ntulonu ɓa ga əgbe nge ɓa la kwnuya n Sahindiri nabai atukwoda ɓa kwú aɓo kwuaje n ajei. 16 Ɓa nyaɓo, "Yi ye ya zhni knyiɓei nu n aza yei a? Əzahozahoyi n wo dnalo n Urishelima, wo kpəlo nge ɓa kwu əznù, n a taa kpe əkwo ɓwushi, zhni, jesnu yi taa kpe əkwo aɓəna m. 17 Ama nabai ya kpma əkwo gnamyi lo n abyei, fyi n aza, ɓəshishi nu yaa ɓa kwnù, nge ɓa to je əɓo da dna n əye ye n zahozahoyi m."

18 Nlonu ɓa je ɓa yi fyi, ɓa tu ɓa ɓəgbe nge ɓa to je əɓo da, kwo ɓa wunya, n Yeisu əyei m nanyinanyi. 19 Ama Byitusu n Yohanai ɓa dnaɓəgbe, "Knyidei nu dnalo n ofyé n Shekwoyi awyeba a: yi kna əfye nu tnubwa, kwo əwo nya a? Əfye nu ɓa znu ɓəda ye ya ga əfyehni! 20 Ama əyi, yi taa myi to ya daɓo n yi kwu gye jesnu yii wo m."

21 She ɓa ɓə kwu ədna je ɓa fyi, ɓa ya ɓa aɓwa, ɓa lo. To ɓa myi ɓa dnabwugba shi ɓa ɓá ga ɓa tata m, ntuge aza vnyanya ɓə zhi ɓai ci Shekwoyi ntu n əɓo ɓo n kwo ɓəə kwu zhni nyi. 22 Ntuge əza n wo ɓə ɓwa kágna n ɓəwowoi nyi, wo ɓəə la du aye shiinyi ya.

23 She a ɓə ya ɓa aɓwa, Byitusu n Yohanai ɓa jezelo da əɓa azaje jesnu ɓa gna ɓa aɓo vnyanya n apirisiti atukwoda n abyeda ɓəə kwu gna ɓa. 24 She ɓa ɓə wo ɓəye, ɓa kwu əɓa bəgye wú fyi n aduwazhni ga Shekwoyi. Ɓa gna, "Dagayi Ikwoda Duduyi Vnyanya, əho nu ɓə zhni ashebmana n əknyii n shikwoi, n anyahonyahoii n ɓa fyilo ń ɓa nyi." 25 Ho ɓə daɓo dna n Zafnu Gyigyiyi dna n əyi dada Dawuda əgbe, əho tnutnuyi:

" ‘Knyiyi nu zhni abye ɓai zhina

jesnu aza ɓai pakwúlu gbəloi a? 26 Asu fyi n əknyi, ɓa la kwukazhi

jesnu abegyiyi ɓa kwu əgbepa

tu n Dagayi tukwo n əwo əza pmyapmyayii.’

27 Ɓəhnihni Hiridusu n Pwontus Byilatusui ɓa ɓə kwu gwnudo n abagbmanyi n Abyedoi jesnu n Aisrailayii n ɓa fyi n əzhiyaakwo ye, ɓa pakwúlu tu n Yeisu, əho tnutnuyi gyigyiyi, n ho ɓə pmya wo nyi. 28 Ɓa zhni əɓo n əho kalá ǹ əho ɓəyei ɓə ncei pmamwushi, nge kwo ɓə zhni. 29 Nsaiye, Dagayi, shi əɓa ədnafyi awye jesnu ha bma əho atnutnuyi zhni, ɓa da əho ɓədagbma n agwumyi yaakwoi. 30 Ta əho əɓwa ya ha ga kágna jesnu ha wu aznù, n aɓoawowoyii, dna n Yeisu əho tnutnuyi gyigyiyi əye."

31 She ɓa ɓə kwu aduwazhni, aba n ɓa ɓə yezhi nyi kwa jeashna. Nlonu a kwu ɓa nu vnyanya n Zafnu Gyigyiyii, ɓa da Shekwoyi ɓədagbma n əgbei myimyii.

32 Avyiyi vnyanya ɓa ɓə zhni gbmanyi nu n ədu n bwugbai. Zahozahoyi to ɓə nyi n wo ɓə n nyahonyahoii la nge kwo zhni əwo nya nu gbmanyi m, ama ɓa gná nyahonyahoi n ɓa ɓə ncei. 33 N kalá yaakwoi, atnutnuloyi ɓa gwodu, ɓa gbmi əɓo tu n Dagayi Yeisu kala la ɓo. Nlonu Shekwoyi shebmyashi ɓə zhni tnutnu n kalá yaakwoi fyi n əɓa vnyanya 34 kwaa zè nge əzaho to ɓə dna n snagyi n əɓa atasni m. Ntuge n asa-asai aza n ɓa ɓə n aknyii, kwo anyakwnu, ɓa kwu ɓa kwnu, ɓa ɓe n agyiwyei anyakwnukwnui nya 35 n atnutnuloyi apita, jesnu a gná, ai ga zahozahoyi n wo ɓə dna əkwo əsna.

36 Yusufu Levyiyi, woi gbmi n Saipwurus, n atnutnuloyi ɓə yi wo nge Banaba nyi (n kwo gyi nge "nugwnu bwugbakaladna nya"), 37 Wa kwnu əwo əknyi jesnu wa ɓe n gyiwyei wa ya zhi n atnutnuloyi apita.