1 N əwyihoi Byitusu n Yohanai ɓa ɓə zhi ɓai gwnulo Dagayipwuwa n aduwazhni əsai, n əkwo nu nyi n snukna ngwnu-ata n nyipyeii. 2 Nsayii, əza n a ɓə ma wo n bmazhi, a ɓə gnyi ai la wo lo ncei n Dagayipwuwa alofyiba n a yi ge Bmyabmyai nyi, aba n a ɓə n woi shi, wyihowyihoi woi ɓanya n aza yi n ɓa lofyi ń Dagayipwuwa ashilagyí nyi. 3 She wo ɓə gye Byitusu n Yohanai ɓai ye ɓa lofyi n Dagayipwuwa, wa ɓa ɓa gyiwye. 4 Byitusu n Yohanai ɓa shi wo awye cewo. Nlonu Byitusu wa gna, "Shi yi awye!" 5 Ntulonu əza yi waa əwye byece ɓa, n awyetui ge ɓa ɓá ga wo nyaho.

6 Nlonu Byitusu wa gna, "Azulufa kwo zinali mi to ncei lo m, ama ənya n mi ncei lo mi ga ho kwo nu. Dna n Yeisu Kirisiti Nazeretiyi əye, laka ha znazna." 7 Wa shi wo ń ɓwaizhe wa bma wo zhni, wa laka gnyi, jesnu n əsagbmanyii, əza yi apitabwada n akwulokwuloi ɓa kwu kalá ɓwa. 8 Wa laka gnyiagnyi ɓá! Nlonu wa ya znazna. Njesnu wa lodna n kwnusnu n ɓai n Dagayipwuwa woi znazna, woi gyeagna jesnu woi ci Shekwoyi. 9 She aza vnyanya ɓə gye wo əwye woi znazna jesnu woi ci Shekwoyi, 10 aza ɓa kwu wo kpeye nge əza yi nu ń wo ɓə zhni woi sase shi woi ɓanya n Dagayipwuwa aduba n a yi Bmyabmyai nyi, ɓa kwu nu zhi n əɓo wowoi jesnu n agbei yaɓwa ntu n əɓo ɓo n kwo ɓə kwu zhni wo nyi.

11 Əza yii ye gnyi n Byitusui shiɓwa n Yohanai, ca wo aza vnyanya, ɓa ɓe da ɓa n əsii n aba n a yi nge Sulemanu ashilagyí nyi. 12 She Byitusu ɓə gye ɓəye əwye, wa gna ɓa: "Əmi Aisrailayi aje, knyiyi nu zhni ɓəye kwoi wo fye a? Knyiyi nu zhni fyei shi əyi awye ngye n əyi kalái nu, kwo n əyi gyigyii nu, n əza ye gnyi woi znazna a? 13 Shekwoyi Ibrahim nya, Ishakwu n Yakwuɓwui, Shekwoyi əyi adada nya, wo la əwo tnutnuyi Yeisu latu. Fye ɓə la wo taya ga nge a wu, jesnu fyaa əwo aɓəna n Byilatusu abye, kwo shikwonyi wo ɓəə la bwugbadna wa ya wo əɓwa. 14 Fyaa Gyigyiyi n Ɓəfyecezhniyi aɓəna, fya gna nge a la zawuyi loya ga fye. 15 Fyaa wyewyeyi gáyi wu, ama Shekwoyi waa wo laka n əfyi. Yi zhni ɓəye aɓəgbmiyi nu. 16 Ń gaiciyaganunui dna n Yeisu əye, n əza ye n fye gye wo əwye nyi, jesnu fyei kpe wo əye nyi, n wa ɓwa kala. Yeisu əye nu n gaiciyaganunui, n kwo ɓe dna n Yeisu nyi, n kwo la kágna nunui ga wo, ngye shi əfye vnyanya zhi fyei gyewye nyi.

17 "Nsaiye, əmi Aisrailayi aje, mi kpəlo nge fye ɓə zhni əɓo ye dna ntna gənyikpe nu, ngye shi əfye abyegyii ɓə zhni nyi. 18 Ama zokwo nu nyi n Shekwoyi ɓə nu əɓo n wo ɓə kwu pmada fyi n əwo sheaɓəgwognayi vnyanya agbe, woi gna ge əwo Kirisiti ɓə gyeazhnì. 19 Nsaiye fye yeabwi, fya pmyiawye ɓe da Shekwoyi, ntulonu a ɓa zo əfye aleifyi, nabai n zhishni əsa, ɓa myi kwa gbmiɓe da fye n Dagayi aba, 20 jesnu n wo ɓə myi wa tnu n Kirisitii, n a la wo knyi ga fye, n əwo nu zhni Yeisu nyi. 21 Ɓəshishi nu əshemi kwa gwo wo, nya əsa n Shekwoyi ɓə jezeɓe n nyahonyahoii, ngye shi wo ɓə shi əgbe n sapa fyi n əwo sheaɓəgwognayi agyigyiyi agbe nyi. 22 Ntuge Mwusa ɓə kwu gna, ‘Dagayi əfye Shekwoyi ɓə la sheɓəgwognayi kala gnyi ga fye, ngye əmi, dna n əfye aza atasni; ɓəshishi nu fyei kna ɓəhoɓəhoi tnubwa n wo gna fye. 23 Zahozahoyi n wo to kna wo tnubwa m, a ɓə la wo gbmiya n əwo aza kpeekpe.’

24 "Ɓəhnihni, ənya n kwo laka n Samwula, sheɓəgwognayi vnyanya n ɓa kwu ɓəda da, ɓa kwu anyipyei ye ɓo pmada. 25 Fye nu zhni sheaɓəgwognayi aɓyi ɓədo n ɓəgbeshii n Shekwoyi ɓə shi n əfye adadai nyi. Wo ɓə gna Ibrahim, ‘Dna n əho ayawyi nu n aza vnyanya n anyì ɓə ɓwa anabəlika.’ 26 She Shekwoyi ɓə la əwo tnutnuyi kala gnyi, wa tnu n woi kpmisnui ga fye wa tu fye anabəlika woi pmyi zahozahoyi awye ya, n əfye n akpizhni azokwo."