1 Azaho ɓə kwnu shnizhi n Yahudiya ɓa lo Antiyok ɓai wunya ga avyiyi: "Akpəge a la fye znunya ngye shi Mwusa kwnunu ncei wu nyi, fye taa ɓwa gnyignyi m." 2 Əɓo ye kwa zhni Bwulus n Banabai ɓa naɓokpeaje n ɓai n zhina zhizhii. Ntulonu a tnu Bwulus n Banabai n kwnusnu n avyiyi ajei, ɓa gwnulo Urishelima ɓa lo ɓə gye atnutnuloyi n atukwodai ntu ɓənya ye ɓo. 3 Ikilisiya kwa kwnu ɓa fyi n zokwo, jesnu she ɓa ɓə znazna ɓa duya n Fonishiya n Samariyai, ɓa da nabagyi she Abyedo ɓə la abwiye-gwo. Anabagyi ye ɓa zhni avyiyi vnyanya ɓa dagbma. 4 She ɓa ɓə si Urishelima, ikilisiya n atnutnuloyi ɓədo n abyedai, ɓa zhni ɓa amaabe, ɓa wu ɓa alaafyiya ɓəhoɓəhoi nya n Shekwoyi ɓəə kwu zhni fyi n əɓa akwnu.

5 Nlonu avyiyi ho n ɓa ɓə fyi n Afarisiyi okwu ɓa kwukazhi ɓa gna, "Ɓəshishi nu Abyedo aa ɓa znunya jesnu ɓa shi Mwusa owa ɓwa."

6 Atnutnuloyi n abyedai ɓa gwnudo ɓa shi əɓo ye awye. 7 Shi ɓa ɓə kwu aɓo da n mwa, Byitusu wa laka gnyi wa daɓo n ɓai: "Əyi azaje, fye kpəlo ge əsa n kwo la duya nyi, Shekwoyi ɓə la əɓo dna knyí n əyi atasni ge, Abyedo ɓa wo ɓəda anabagyi manai nya n əmi əgbe nu ɓa ga gaiciya. 8 Shekwoyi n wo kpe adu əye nyi, wa kwu wu nge wo la ɓa gwo əsa n wo ɓə ga ɓa Zafnu Gyigyiyi, n ɓwasnu she wo ɓə ga yi nyi. 9 Wo to ɓə wu kakai n əyi aba n əɓai m, ntuge wo ɓə la əɓa adu pmya fyi n gaiciyaganunui. 10 Nlonu nsaiye, knyiyi nu zhni fyei ye fya tu Shekwoyi mwi fyei fyi Abyedo korogbma n bəgye, ədo n əyi kwo əyi azakwoyi to ɓə myi ɓa shni shi nyi ma a? 11 Aawo! Yi n gaiciyai ga lo nge dna n shebmyashi əyi Dagayi Yeisu nya nu n yi ɓə ɓwa gnyignyi, n ɓwasnu shi ɓa kwu ɓwa nyi."

12 Azayezhi yi vnyanya ɓa kwu cepyi shi ɓa ɓə kna Banaba n Bwulusii tnubwa ɓai gna ɓa aznù ɓo n aɓoawowoii n Shekwoyi ɓəə kwu zhni fyi n Abyedo atasni woi zhni apma n ɓai. 13 She ɓa ɓə pwo, Jemyis wa daɓo. Wa gna, "Əmi azaje, fye kna mi tnubwa. 14 Sima wo kwu wu yi, she Shekwoyi ɓə kpmi əɓo abazhni wa knyi aza ga əwo əye ń Abyedo aba. 15 Sheaɓəgwognayi aɓədagbma ɓa kwu lodo n dəyei, ngye she kwo kafyilo:

16 " ‘N dəye avnu mi ɓə jezeɓe

jesnu mii je Dawuda alubwi amyimyiiya mi.

Əkwo agwusa mi ɓə je kwo mi,

jesnu mi ɓə je kwo laka gnyi she kwo ɓə shnisnu

17 nabai azanyikwoci n ɓa ce nyi, n ɓa ɓə zna Shekwoyi shni,

kwo Abyedo vnyanya n ɓa n əmi əyei tu,

Dagayi nu da əɓo ye, n əwo nu zhni aɓo ye nyi’

18 anya n a ɓə kwu ɓa kpe əye n sapa.

19 "Ntucenu əmi ɓəznu nu nyi, nge yi to lá zokwo ye zhni ɓədnai n Abyedo aba, n ɓa gnyi ɓai pmyiawye ɓe da Shekwoyi nyi m. 20 N əkwoɓwi, yi ka əpa ga ɓa, ya gna ɓa ge ɓa kwu fa ashna nyagyi gyi ɓo, n asisiɓozhnii, n abwui anyakpa nya n a pmyi ɓa bəgye nyi, jesnu n amisnii. 21 Ntuge a kwu Mwusa owa waazizhni n əzhiyaakwo dəhodəhoi tunyi n sapa jesnu a ba kwo lo fyi n Ayahudiyibwokwnu n Sibyiwyi dəhodəhoi."

22 Nlonu Atnutnuloyi n abyedai n ikilisiyai vnyanya, ɓa dnabwugba ɓa tnu əɓa aza, ɓa tnu ɓa tnutnu lo Antiyok n kwnusnu n Bwulusii n Banabai. Ɓa knyi Yahuda (n a ɓə yi wo nge Barsabas nyi) n Silai, aza n ɓa ɓə zhni atukwoda nu fyi n avyiyi. 23 Ɓa tnu n əpa kakai yei n əɓa akwnu:

Atnutnuloyi n abyedai, əfye azaje,

Lo da Abyedo avyiyi fyi n Antiyok, Siriya ɓədo n Kilikiyai:

Gnaɓyi.

24 Yi kwu wo ge azaho n əyi atasni, ɓa ɓə la kwnu ntna əyi gbega jesnu ɓai gna fye gnagna, ɓai wnu fye abwugba n əɓoi n ɓa da nyi. 25 Ntulonu əyi vnyanya yi kwu ye ge yi ɓa tnu azaho ya tnu ɓa tnutnu n əfye aba n kwnusnu n əyi anugwnudo ayeyeyi, Banaba n Bwulusii; 26 aza n ɓa kwu əɓahni awyewyeyi mà, n əfyi, ntu Dagayi Yeisu Kirisiti əye ɓo. 27 Ntucenu, yi tnu n Yahudai nu n Silai ɓa gbmiɓo n əgbei, ənya n yi ncei kafyi nyi. 28 Kwo wulo ngye, əɓo manai nu n Zafnu Gyigyiyi aba, ɓədo n əyii; to ya kpe fye azhnì n nyahonyahoi n du aɓo ye n yi ye fya shiɓwa, n ɓa kakpe shi nyi m: 29 Fye ɓa kwu fa ashna nyagyi gyi ɓo, n amisnii, n abwui anyakpa nya n pmyi ɓa bəgye nyi, jesnu n asisiɓozhnii. N fya kwu fa aɓo ye, a gye fye kwu zhni n bmya.

Yi fá fye n laafyiyai.

30 Ntulonu a fyi ɓa n zokwo ɓa shnilo Antiyok, aba n ɓa ɓə ye Ikilisiya zhi n abagbmanyi ɓa ga ɓa paka. 31 Aza ɓa ba kwo, jesnu ɓa dagbma ntu əkwo ɓəda bwugbakaladna nya ɓo. 32 Yahuda n Silai, aza n ɓa zhni sheaɓəgwognayi nu n əɓahni nyi, ɓa daɓo n mwa ntuge kwa myi avyiyi agwuzhi jesnu kwa dna ɓa bwugbakala. 33 She ɓa ɓə kwu snu əsa fyi n ɓo, avyiyi ɓa gna ɓa ami n anabəlika bwugbafu nyai, ɓa jezelo da aza yi n ɓa ɓə tnu n ɓai nyi. [34 Ama Sila wa ye waa kpedna n abaayi.] 35 Ama Bwulus n Banabai ɓa kwu kpefyi n Antiyok, aba n əɓa ɓədo n azajei n mwa bəgyé ɓə wunya jesnu ɓa zhni waazi Dagayi ɓədagbma nya.

36 N dəye avnu n əsadoi, Bwulus wa gna Banaba, "Fa ya jezelo ya ɓyi avyiyi gna fyi n azhi vnyanya n yi kwu ɓədagbma waazizhni nyi, jesnu ya gyewye she kwo wo ɓa lo." 37 Banaba ɓə ncei pma wa la Yohana, n a je wo yi nge Marukwus nyi, n kwnusnu n ɓai, 38 ama Bwulus to ɓə gye kwo bmyalo, ɓa la wo m, ntuge wo ɓə kwu ɓa fa fyi n Pamfyiliya jesnu to wa je gwodu n tnutnui n kwnusnu n ɓai m. 39 Əgbe kwaa ɓa ka n əwyei bmyibmyi, kwa zhni ɓaa gnajeya. Banaba wa la Marukwus, ɓa lofyi n əya nuwnanya ɓa lo Saipwurus, 40 ama Bwulus wa knyi Sila ɓa kwuka, avyiyi ɓa kwu ɓa ga fyi n Dagayi shebmyashi. 41 Wa duya n Siriya n Kilikiyai woi myi aikilisiya agwuzhi.