1 "Əmi azaje jesnu n adadai, fye kna əmi ɓəgbedna tnubwa."

2 She ɓa ɓə wo woi daɓo n ɓai n Ibraniyi nyitalai; ɓa kwu ce pyipyipyi.

Nlonu Bwulus wa gna: 3 "Mi zhni Yahudiyi nu, a ɓə ma mi dna n Tarsus nu n Kilikiya əknyi, ama mi ɓə mwa dna n əzhiyaakwo ye nu. Mi ɓə banya dna n Gamaliya akwnu nu njesnu a ɓə la mi ta n ɓyiɓyiyi dna n əyi azakwoyi owa. Mi ɓə n əwyei nyinyíi n Shekwoyi əɓo n ɓwasnu ngye zahozahoyi nu n fye n naiye. 4 Mii she aza wyena n ɓa wna Zokwo ye kwoi lo n ɓai n əfyi, mii wna azanugbai n anyikwozai mii sheɓaya fyi n zhalu, 5 ngye shi pirisiti dnagbmai n abwokwnudai vnyanya n əɓahni tukwo, n ɓa ɓá gbmiɓo. Kwo n əɓa aba nu n mi ɓə gwo paka n əɓa akwnu, ma lo aza ncei n ɓa n gaiciyai kwnu ga fyi n Damaskwos, jesnu mi ɓə lo abaayi nabai mi ɓe n aza yei nu ngye aza-wnawnayi fyi n Urishelima nabai a ga ɓa tata.

6 "N nyipyei atukwogwnu əsai, shi mi ɓə wo vyivyiwyi n Damaskwosii, n əsagbmanyii bwuznagna kwoi gbmi n əshemi kwa bmyana fyi mi n shegwnu mi. 7 Ma myiya shi n əknyi, ma wo bəgye kwoi gna mi, ‘Soolu! Soolu! Knyiyi nu zhni hoi she mi əwyena a?’

8 "Ma nyaɓo, ‘Nyika nu n hoi a, Dagayi?’

"Wa dnaɓəgbe, ‘Əmi nu Yeisu Nazeretiyi, əza n ho gnyi hoi she wo əwyena nyi.’

9 "Aza n mi ɓə kwnu znazna n ɓai nyi, ɓa kwu bwuznagna gyewye, ama to ɓa kpe əza bəgye ɓəgənyi n wo ɓə gnyi woi daɓo n mii nyi m.

10 "Ma nyaɓo, ‘Dagayi, knyiyi nu n mi ɓa zhni a?’

"Dagayi wa gna, ‘Laka ha lodna n Damaskwos. N abaayi nu n a ɓə gna ho aɓo vnyanya n a cei mwuzhi ho lo, ha zhni.’

11 "Aza n mi ɓə kwnu znazna n ɓai nyi, ɓa shi mi əɓwa ya lofyi n Damaskwos, ntuge bwuznagna palilii ɓə kwu mi bwawye.

12 "Əza n a ɓə yi wo ge Ananiyasi, wa ɓe wa gye mi əwye. Wo ɓəi zhni ɓəfyeceyi nu n əwyei nyinyíi n owa ɓwashi, jesnu Ayahudiyi vnyanya n ɓa ɓə fyi n əzhi yi, ɓai kpe wo ye, ɓai gbmiɓo manai tu n wo tukwo. 13 Wa gnyiagnyi ma əmi wa gna, ‘Soolu, əmizado, gwo əho wyebagye.’ Nsayisayii ma myi ma gye əwo əwye.

14 "Nlonu wa gna, ‘Shekwoyi əyi azakwoyi nya wo la ho knyi, ha kpe əwo ɓəmwi əye, jesnu ha gye Əwo Ɓəfyecezhniyi əwye, jesnu ha wo əwo aɓədagbma n əwo əgbe. 15 Ho ɓaa zè əwo ɓəgbmiyi ga aza vnyanya; əɓo n ho kwu gyewye jesnu hoi wo. 16 To, ho gnyi hoi pmi knyiyi nu nsaiye a? Laka gnyi, a zhni ho batizima, a zhna ho aleifyi ya, shi ho yi əwo əye.’

17 "She mi ɓə jezeɓe Urishelima jesnu mii zhniaduwa dna n Dagayipwuwa, ma ɓwa ɓəwyegye 18 ma gye Dagayi woi daɓo n mii. Wa gna, ‘N pye, fa Urishelima nsaisaiye, ntuge aza n ɓa fyi n ya nyi, ɓa taa gwo əho ɓəgbmi ntu əmi ɓo m.’

19 "Ma dnaɓəgbe, ‘Dagayi, aza ye kpəlo nge mi ɓə zhni mii vyi Ayahudiyibwokwnu gbmanyigbmanyi, mii wna aza yi fyi n zhalu jesnu mii lu ɓa, n ɓa kwu gaiciyaga ho nyi. 20 Njesnu she a ɓə zè Istifanus ami ya, n wo ɓə fyí ntu ho əɓo nyi, mi ɓə gnyi n abaayi n əɓwai tu nce, jesnu mii shi aza yi aje awye n ɓa ɓə zhi ɓai wu wo nyi.’

21 "Nlonu Dagayi wa gna mi, ‘Lo, ntuge mi ɓa tnu n hoi n aba akpamwai, lo da Abyedo.’ "

22 Deeji kwa kna Bwulus ɓəda tnubwa nya əsa wo ɓə kwu əɓo ye zo da. Nlonu ɓa kwu əɓa abəgye wu njesnu ɓa ɓəwyi, "A la əza ye gbmiya n anyi! Wo to kwnuce lo wo ye gyianyì m!"

23 Shi ɓa ɓə zhi ɓai ɓəwyi, ɓai kpma əɓa aje ayaakwo ya, jesnu ɓai she amwi gwnu n əshe, 24 Bəzheyaakwo wa ga əgbe nge a la Bwulus la lo ncei n akwnuyi apyiznudna. Wa gagbe nge a kwu wo lu jesnu a nya wo aɓo nyanya nabai a kpe əɓo n kwo zhni aza ɓai ɓəwyi ntu əwo ɓo nlai. 25 Shi ɓa ɓə tawoya shi ɓa ɓyewoya, Bwulus wa gna bəzheyaakwo n wo ɓə gnyiagnyi gnyi n abaayi nyi, "Owa ncei ye lo nge fye ɓye Romayi əknyiɓyi ya, kwo to ai wna wo n ɓəgyii m?"

26 Shi Roma begyiyi ɓə wo dəye, wa lo da bəzheyaakwo wa wu wo kwo lafyiya. Wa nyaɓo, "Ho ye ha zhni knyiyi nu a, əza ye zhni Roma əknyiɓyi nu."

27 Bəzheyaakwo wa lo da Bwulus, wa nyaɓo, "Gna mi, ho zhni Roma əknyiɓyi nu?"

Wa dnaɓəgbe, "Əə, mi zhni əkwo nu."

28 Nlonu bəzheyaakwo wa gna, "Əmihnii da ɓə gba agyiwye yaakwo nu ma kpe Roma əknyiɓyi zhni."

Bwulus wa gna, "Ama əmihnii da a ɓə ma mi dna n Roma əknyi nu."

29 Aza yi n ɓa ɓə ye ɓa nya wo aɓo nyanya nyi, ɓaa əɓa aɓwakwnu n əsagbmanyii. Bəzheyaakwo n əwohni tukwo, ədna kwa wo wo she wo ɓə kpe nge wo kwu Bwulus fyiagbma n wo zhni Roma əknyiɓyi nyi.

30 Bəzheyaakwo ɓə n cei pma wa kpe əɓo hnihnii ye n kwo snusnu Ayahudiyi ɓai ma Bwulus aɓo. Nlonu əfye kwa gyi zhi waa wo loya jesnu wa tnu apirisiti atukwoda ɓo n azai vnyanya n ɓa fyi n Sahindiri nge ɓa yezhi. Nlonu wa lo ɓe n Bwulusii, waa wo gnyi n əɓa abye.