1 Fyi n Ikwoninya, Bwulus n Banabai ɓa lo Ayahudiyibwokwnu she ɓa ɓə dami. Fyi n abaayi, ɓa daɓo n Ayahudiyii n Agirikiyii kwa kwu lofyi ɓa dəidəi, bəgyé n ɓa, ɓa kwu gaiciyaga. 2 Ama Ayahudiyii n ɓa to ɓə ga gaiciya nyi m, ɓa kwu Abyedo abwugba kala zhi jesnu ɓa kwu ɓa fyi əmwi kpe n əyi azaje. 3 Ntulonu Bwulus n Banabai, ɓa kwu mwasa fyi n abaayi, ɓai daɓo n əgbei myimyii ntu Dagayi ɓo, n wo ɓə gbmi əwo shebmyashi ɓəda əɓo jesnu wa ga ɓa ikwo ɓa wu aznù ɓai zhni aɓoawowoi. 4 Aza n əzhiyaakwo yi ɓaa gnaje; azaho ɓa kwu ma n Ayahudiyi ɓwa, azaje n kasnu n atnutnuloyi ɓwa. 5 Abyedo n Ayahudiyii ɓədo n əɓa atukwodai, ɓa ɓə n kwului pashi, ɓa zè ɓa awyegbmiaje jesnu ɓa knyi ɓa akwuta. 6 Ama ɓa kwu əkwo əɓo kpe, ɓa bwusi lo Likwoninya azhiyaakwo Listira nya n Dabyei ɓədo n azhigbai n ɓa shegwnu ɓa nyi, 7 aba n ɓa ɓə gwodu ɓa zhni waazi.

8 Əza ɓə dna n Listira n wo ɓə bmazhi. A ɓə ma wo n pmasnu nlonu jesnu wo to ɓə shni znazna m kpeekpe. 9 Wa kna Bwulus ɓəda tnubwa əsa n wo ɓə gnyi woi daɓo. Bwulus wa ce wo awye cewo, wa gye nge wo ɓəə n gaiciyaganunui, n wo ɓa gwo kágna 10 Wa yì wo n bəgye kalái, "Laka gnyiagnyi!" Əza yi wa laka gnyiagnyi wa ya znazna.

11 She deeji ɓə gye əɓo n Bwulus kwu zhni nyi, ɓa ɓəwyi n Likwoninya əbyei, "Əyi ashekwoyi, ɓa la kazhi ɓe da yi, dna n zanyikwoci dogbe!" 12 Ɓa yi Banaba ge Zeyus njesnu Bwulus ɓa yi wo ge Hamis ntuge əwo nu ɓə zhni ɓəda da yi. 13 Zeyus pirisiti ń əwo ashnanyakwnu ɓə ɓwagnyi n əzhiyaakwo gəlu avnu nu nyi, wa lo ɓe əzhiyaakwo aduba n anakwonugbai shi ɓədo n amamawyií, ntuge əwo, n əwo deejii, ɓə ncei pma ɓa kwnu anyaga ga ɓa.

14 Ama she Banaba n Bwulusii atnutnuloyi ɓə wo əɓo ye, ɓa sa əɓa aje ya jesnu ɓa bwusi lo da deeji ɓai ɓəwyi: 15 "Anugwnudo, knyiyi nu zhni fyei zhni əɓo ye a? Əyihni ce yi ɓwa azanyikwoci nu zhni ngye əfye. Yi ɓe fye n anabagyi manai nu, yii gna fye ge fye la awye pmyiya n anya atnatukwogyii, fya vyi Shekwoyi wyewyeyida, n əwo nu ɓə zhni ashemi n əknyii n shikwoi n anyahonyahoii n ɓa fyilo n ɓa nyi. 16 N sapa, wo ɓə lá əbyé dəhodəhoi fa nge kwo wna əkwohni zokwo. 17 Dudulonu wo too fa əwohni gnyi ntna ɓəgbmi m: Wo kwu aɓo amanai zhni ga yi, she wo ga fye əgbma n kwo kwnu n əshemi nyi, jesnu n anyagyii n əɓa asai; Woi ga fye nyagyi n mwa jesnu woi nu əfye adu n agbmadai." 18 Kwo dudu n aɓədagbma yei, kwaa ɓa dnaɓo ɓa kpma deeji anyakwnukwnu ga ɓa.

19 Nlonu Ayahudiyi ho n ɓa ɓə kwnu n Antiyok n Ikwoninyai, ɓa kwu deeji ɓwa ma n əɓa səpa. Ɓa knyi Bwulus akwuta jesnu ɓa gnyì wo ya shi n əzhiyaakwo əbmyi, ɓai zhninubwo nge, wo la fyí nu. 20 Ama she amwutuyi ɓə la yezhi n shegwnu wo, wa laka gnyiagnyi wa lodna n əzhiyaakwo. Əfye kwa gyi, əwo n Banabai ɓa kwnu ɓa lo Dabye.

21 Ɓa zhni waazi n əzhiyaakwoi jesnu ɓa kwu amwutuyi ɓwa n mwa bəgyé. Nlonu ɓa jezelo Listira, Ikwoninya n Antiyoki, 22 ɓai myi amwutuyi agwuzhi jesnu ɓai fyi ɓa abwugbakala nge ɓa kwu kpefyi n gaiciyaganunui. Ɓa gna, "Ɓəshishi nu ya gyeazhnì aɓo bəgyé nya, nabai yii lofyi n Shekwoyi əbemi." 23 Bwulus n Banabai ɓa tnu atukwoda ga ɓa fyi n ikilisiya dəhodəhoi jesnu dna n aduwazhni n əgbewnai, ɓa kwu ɓa fyi n Dagayi akwnu, əza n əɓa gaiciyaga ɓə kpema əwo nyi. 24 She ɓa ɓə duya n Pyisidiya, ɓa lo ɓe Pamfyiliya, 25 jesnu she ɓa ɓə kwu Ɓədagbma waazizhni n Pyega, ɓa shnilo Attaliya.

26 Ɓa kwnu n Attaliya ɓa lo əya nuwnanya ɓa jezelo Antiyok, aba n a ɓə zhni ɓa aduwa Shekwoyi shebmyashi nya, ntu tnutnu ɓo n ɓa ɓəə kwu pwo kwo zhni ɓo nsayii nyi. 27 She ɓa ɓe si abaayi, ɓa ye ikilisiya zhi n abagbmanyi, ɓa wu ɓa anabagyi aɓo nya vnyanya n Shekwoyi ɓəə kwu zhni fyi n əɓa akwnu jesnu she wo ɓə gwú kpakwo gaiciyaganunui nya ya ga Abyedo. 28 Jesnu ɓa kwu mwasa fyi n abaayi n kwnusnu n amwutuyii.