1 Shi yi ɓə kwu wnakpma fyi n nayida, ya ɓe ya kpé nge a yi mwuse yi nge Malita nu. 2 Amalitayi ɓa gwo yi; ɓa wu yi yeye yaakwo n yi to ɓə n əkwo ɓəi dna m. Ɓa fnyi əná zhi jesnu ɓa zhni yi amaabe vnyanya ntuge əgbma ɓə gnyi kwoi zhi jesnu əse ɓə fufui. 3 Bwulus wa wnù ashnuwna azhegbezhegbei zhi, əsa n wo ɓə kpe ɓa əná, gbezhi, she kwo ɓə wo gwugwurugwu, kwa sakwnu ɓe kwaa kwúgyi wo n əwo əɓwa. 4 She Amalitayi ɓə gye owa n shegyi n əwo əɓwa, ɓa gna aje ge, "A ɓa gye əza ye zhni əzawuyi nu, kwo shikwonyi wo la pwo shikwo nuwna, əshna Owadayi Tnagyifyiyi ta ye nge wa gyianyì m." 5 Ama Bwulus wa myi owa ya fyi n əná, jesnu to kwa zhni wo ɓəho m. 6 Aza ɓə zhi n awyetui nge wo ɓa snú nu n nayi, kwo wa myiya shi n əsagbmanyii wa fyi; ama she ɓa ɓə pmi əsa kwaa mwa to ɓa gye ɓəho kwoi zhni wo m, ɓa shna əɓa bwugba do, ɓa gna wo zhni shekwoyi ho nu.

7 Apyiznutu ɓə zhi vyivyiwyi n ɓa ɓə zhni Pwobiliyus anya, əwo nu ɓə zhni mwusei tukwoda. Wa gwo yi aɓwa-aba-aba fyi n əwo pwuwa jesnu wa ga yi nyagyi n əɓwai loloiya anyipyei ngwnu-ata. 8 Əwo dada ɓə tu n nyasnai n gədo; sukwona nu ɓə zhni wo ɓədo n snitayii. Bwulus wa lo woo gye wo əwye, she wo ɓə zhniaduwa, wa kpe wo əwo aɓwa nlonu wa ɓwa kágna. 9 Shi dəye ɓə kwu zhni nlonu, anyasnai vnyanya kpe n mwuse yi, ɓa ɓe jesnu ɓa ɓwa kágna. 10 Ɓa ga yi mwamwa fyi n azokwo gbowogbowo; jesnu she əsa ɓə la si ya lofyi n əzna, ɓa ga yi anya n yi ɓə n əɓa apmai.

11 She apya ngwnu-ata ɓə la duya, ya kwnufyi n shikwo, fyi n əya nuwnanya n kwo ɓə zhni vnyinkwo dna n mwuse nyi; kwo ɓə zhni Alekzandariya əya nuwnanya nu, n ashekwoyi ngwnu-aba atukwo adogbei kpe n əkwo tukwo; Kasto nya n Pwolukiyii. 12 Ya kwu kpezhi n Sirakwus jesnu ya kwu fyi n ɓo anyipyei ngwnu-ata. 13 Ya kwuka n abaayi ya lo əya nuwnanya jesnu ya ɓe ya si Regiyum. Əfye kwa gyi zhi, vnuvnu snuta nya kwa kwukala zhi jesnu n fyegyi baayi, ya si Pwutoli. 14 N abaayi, ya gye əyi azaje əwye, azanugbai n anyikwozai n ɓa ɓə pa yi nge yi kwu kwnufyi n ɓai ladiwyi ɓwugyi. Ntulonu ya ɓe Roma. 15 Əyi azaje, azanugbai n anyikwozai ɓə kwu wo nge yi ɓə lo, ɓa znazna n kpaai ɓa kwu si Abyiyus Gnyikwo. Azaje ɓa shegwnu yi n Ashilagyí Ngwnu-ata. Shi Bwulus ɓə gye ɓa əwye, wa sa Shekwoyi ami, jesnu əwo bwugba kwaa kalá ɓwa. 16 She yi ɓə si Roma, aa Bwulus fa nge wo dna n abahobahoi n wo ɓa dna n wohnii, n okwnuyi gbmanyi n ma wo, woi gwu wo.

17 N anyipyei ata avnu wa yì Ayahudiyi atukwoda abaayi nya zhi n abagbmanyi. She ɓa ɓə la yezhi, Bwulus wa gna ɓa: "Əmi azaje, kwo shikwonyi mi to ɓə zhni ɓəhoɓəhoi tu n əyi aza tukwo, kwo tu n əyi azakwoyi kwnunu m, a ɓə wna mi dna n Urishelima nu jesnu aa mi ga dna n Aromayi akwnu. 18 Aromayi ɓa nya mi aɓo nyanya, ɓa ɓə ncei pma ɓa ya mi, ntuge ɓa to ɓə gye mi n ɓəgyi ɓəgalazhni nyai n kwo kwnuce lo n əfyii m. 19 Ama Ayahudiyi to ɓa ye m, ntulonu kwa mi zè ɓəshishi nu ma tnu n aɓwatnai lo da Kaisa. Ɓəhnihni mi to ɓə n kwoi dna nge ma ɓe n ɓəhoi nu tu n əmi aza m. 20 Ntu əɓo ye ɓo nu, mii gna nge, mi ɓa gye fye ma daɓo n fyei. N tukwoi tu n Israila awyetu ɓo nu, ń a n mii pa dna n agbma ye."

21 Ɓa dnaɓəgbe, "Yi too gwo paka ho n Yahudiya ntu əho ɓo m, jesnu əzaho to lo n əyi aza, kwo gbmanyi, n ɓa ɓə kwnuɓe n abaayi, n ɓa kwu alafyiya ho wu, kwo ɓa da əɓo nukwoi ho tu n əho tukwo m. 22 Ama yi ncei pmalo ya wo əɓo n ho gaiciyai ga n kwo. Əɓo n yi kpəlo, əkwo nu nge abahobahoi vnyanya, aza daɓo lo tu n Zokwo ye tukwo."

23 Ɓa shi əsa n ɓa ɓə gye Bwulus əwye n nyipyei hoi; jesnu aza ɓə du n bəgyé n ɓa ɓə ɓe aba n wo ɓə dna nyi. Wa zhni ɓa waazi ənya n kwo laka n laabmi nya wyeshe, woi kná ɓa awyeya da Shekwoyi əbemi ɓo. Wa zhni apma n Mwusa Owai jesnu ɓədo n Sheaɓəgwognayi nyai, woi zhniatna wa wu ɓa əza n Yeisu zhni. 24 Əɓo n wo ɓə da nyi, kwo ɓə la azaho kwnuawye, ama azaje to ɓa ga gaiciya m. 25 Nlonu, ɓa naɓokpeaje ɓahniɓahni, jesnu ɓa ya gnamyi she Bwulus ɓə kpma əɓo ye da ge: "Zafnu Gyigyiyi ɓə da gaiciyanunui nu ga əfye azakwoyi əsa n wo ɓə daɓo dna n sheɓəgwognayi Ishaya əgbe:

26 " ‘Lo aza ye aba, hoi gna ɓa,

"Fye ɓa kwu zhi fyei wo, ama fye taa kpəgənyi m, kwo fyewyi,

Fye ɓa kwu zhi fyei gyewye, ama fye taa kpeye m, kwo fyewyi."

27 Ntuge aza ye ədu kwo la shni;

kwo dnaɓo lo ɓa wo əɓo n əɓa tnubwai,

jesnu ɓa kwu əɓa awye kpe.

Ntolonu m, ɓa ɓá kwu əɓo gyewye n əɓa awyei,

ɓa wo n əɓa atnubwai,

ɓa kpəgənyi n əɓa adui

ɓa pmyiɓe nabai ma ga ɓa kágna.’

28 "Ntucenu mi ye fya kwu kpe nge, a la tnu n Shekwoyi gnyignyii n Abyedo aba, jesnu ɓa ɓə kna kwo tnubwa!" 29 [Shi wo ɓə kwu ɓəye da, Ayahudiyi ɓa kwnuya n abaayi, ɓai naɓokpeaje n əwyei bmyibmyii.]

30 Bwulus waa dna əwohni pwuwa tagba nya, aye ɓwugyiɓwugyi ngwnu-aba, wa gwo azhiɓeyi vnyanya n ɓa ɓə ɓe ɓa gye wo əwye. 31 Wa da aza Shekwoyi əbemi ɓo, jesnu woi wunya tu n Dagayi Yeisu Kirisiti tukwo pəipəi, n bwugbai dnakalá vnyanya to zahozahoyii kpma wo kwo zhni m.