1 Dna n əsa ye nu n əsu Hiridusu ɓə wna azaho n ɓa ɓə fyi n ikilisiya, wo ɓə ye wa she ɓa əwyena nu. 2 Wa zhni a wu Jemyis, Yohana zado n əbeyaakwoi. 3 She wo ɓə gye nge ɓəye ɓo, kwo kwu da Ayahudiyi, wa gwodu wa wna Byitusu ce. A ɓə zhni dəye dna n Awyefna Biledi Tnayisti nya nu. 4 She a ɓə la wo wna, waa wo gwudna n zhalu, waa wo ga ntuge akwnuyi ngwnu-anyi n okwu ɓa gwu wo n əsagbmanyii. Hiridusu ɓə ye woi gbmi wo ɓe ncei n Awyefna Gnanaznu nya avnu nu, ai da wo owa gnyi n bəgye.

5 Ntulonu ɓaa Byitusu gwudna n zhalu, ama ikilisiya ɓə fyi ɓai zhniaduwa n əwyei bmyibmyii ga Shekwoyi ntu n əwo ɓo.

6 Dna n sukwo yi, n əkwo əfyegyizhi nu, n Hiridusu ɓəə ɓa gbmi wo ɓe ncei, wa da owa n woi nyi, Byitusu ɓə shi woi wnagye dna n zhalu n akwnuyi ngwnu-aba atasni, n woi papai n agbmai ngwnu-aba, jesnu abagwuyi ɓə gnyiagnyi zhi n alodnaba. 7 N əsagbmanyii maləka Dagayi nya wa kpeyaɓe jesnu bwuznagna kwa fnu fyi n zhalu. Wa znu Byitusu əɓwa n abmayi, wa kwnu wo agyewyiya. Wa gna wo, "Laka gnyi, n pye!" Jesnu agbma ɓa kwnuya n Byitusu aɓwa.

8 Nlonu maləka wa gna wo, "Kwu əho aje kpe jesnu kwu abwada fyi." Byitusu wa zhni əɓo n a ɓə gna wo nyi. Maləka wa gna wo, "Kwu əho əjeyaakwo shegye, ha vyi mi." 9 Byitusu wa vyi wo wa gbmiya n zhalu, ama to woi kpe, nge əɓo n maləka zhni nyi, kwo zhni ɓəhnihnii nu m; wo ɓə zhninubwo ngye wo ɓe gnyi woi gye ɓəwyegye nu dna n zafnu. 10 Ɓa du abagwuyi kpmisnui ya n baayii, ɓa ɓe kpakwo snukna nya aba, n kwo nu gbmiya lo əzhiyaakwo nyi. Kwa gwu əkwohni ya ga ɓa, ɓa duya n kwo. She ɓa ɓəə kwu znazna dnadna gbmanyi nya, maləka wa fa wo n əsagbmanyii.

11 Nlonu Byitusu wa jezeɓe əwohni ací wa gna, "Nsaiye mi kwu kpe nge ɓəhnihni Dagayi nu naa tnu n əwo maləkai wonyi gnyi mi n Hiridusu akwnu, jesnu n nyahonyahoi, n Ayahudiyi ɓə n awyetui ge kwo ɓa zhni nyi."

12 She ɓəye ɓə la shnifyi wo, wa lo Mariyamwu pwuwa, Yohana əya, n a je wo yi ge Marukwus nyi, aba n bəgyé ɓəə la yefyi ɓai zhniaduwa. 13 Byitusu wa je alofyiba əbmyi nya, tnutnuyi ho ai yi wo Luda wa ɓe nge wa dnaɓəgbe. 14 She wo ɓə kwu Byitusu bəgye kpeye, waa nu gnyi n agbmadai n mwa, wa jezelo ntna abagwuyai woi ɓəwyi, "Gye Byitusu nu gnyi n abwokwnumi!"

15 Ɓa gna wo, "Ho la gbmiya n əhohni ací." She wo ɓə la gyima nge kwo ɓe nyi nlonu, ɓa gna, "A ɓa gye əwo maləka nu."

16 Ama Byitusu wa gwodu woi jeaba, jesnu shi ɓa ɓə gwu kpakwo ya ɓa gye wo, ca wo ɓa, ɓa kwu cezhi gbegyégyé. 17 Byitusu wa zhni ɓa n aɓwai ge ɓa kwu cepyi jesnu wa gna ɓa shi Dagayi wa gbmi wo ya n zhalu. Wa gna, "Fye kwu ɓəye gna Jemyis n əyi azajei ɓədo n amapwii," nlonu wa fa ɓa wa lo ɓwado.

18 N labmii, wyina kwaa gbmidna n akwnuyi atasni fyi n ɓəyeɓwi ntu əɓo n kwo la ɓwa Byitusu. 19 Shi Hiridusu ɓə kwu aza fyi ɓa zna wo shni, she ɓa ɓá myi, ama to wa gye wo əwye m, wa je abagwuyi aɓo nya nyanya, jesnu wa ga əgbe nge a la ɓa kpmiatukwo.

Nlonu Hiridusu wa gbmi n Yahudiya wa lo Kaisariya, waa dna n ɓo. 20 Wo ɓə gnyi woi wuanya nu ń Atayayii n Asidoniyii; nsayi ɓa kwu əgbe lodo ɓa zna wo shni ɓa daɓo n woi. Shi ɓa ɓə la Byilatusu bmazhni ɓwa, əsu tnutnuyi n wo n gaiciyai ga wo, ɓa nya bwugbafu ɓo n əsu, ntuge ɓa ɓə ń tukwoi kpema n əsui əknyi nu ɓai ɓwa nyagyi.

21 N əwyii n Hiridusu ɓə ncei shi nyi, she wo ɓə kwu əwo əsu aje kpe, wa sasetu n əwo əbeshnikpegye jesnu wa da ɓəda n aza bəgyéi abye. 22 Ɓa ɓəwyi, "Bəgye ye kwo zhni shekwoyi nya nu, toge zanyikwoci nya m." 23 N əsagbmanyii, ntuge Hiridusu to ɓə ci Shekwoyii m, maləka Dagayi nya wa znu wo ənya ya shi, jesnu avnyi ɓa gyi wo, waa fyi.

24 Ama Shekwoyi ɓədagbma kwa gwodu kwoi lapwi jesnu kwoi mwa.

25 She Banaba n Soolui ɓə kwu pwo əɓa tnutnu, ɓa kwnu n Urishelima ɓa la Yohana n kwnusnu n ɓai, n a ɓə je wo yi ge Marukwus nyi.