1 Nlonu pirisiti dnagbmai wa nya Istifanus əɓo, "Aɓo ye n a kpe ho nyi, ɓa zhni gaiciya nu u?"

2 Wa dna ɓəye ɓəgbe nlai: "Əmi azaje n adadai, fye kna mi tnubwa! Shekwoyi latuyi ɓə la kpeya da əyi dada Ibrahim, woi ye dna n Myesopwotamyinya, wa kpe ɓe wa sase dna n Haran. 3 Shekwoyi wa gna, ‘La əho əknyi fa n əho azai, jesnu ha lo əknyi ń mi ɓa wu ho nyi.’

4 "Ntulonu wa fa Acalidiyi əknyi, wa lo wa sase dna n Haran. N əwo dada əfyi avnu, Shekwoyi wa tnu n woi n əknyi ye, aba n fye sase fyi nsayi nyi. 5 Wo to ɓə ga wo əgwú n ya m, kwo əknyi n pitai gbmanyi m. Ama Shekwoyi waa ɓəgbeshi shi wo ge, əwo n əwo ayawyii n wo avnu, kwo ɓə la zè əɓa əknyi, kwo shikwonyi, n əsayii Ibrahim to ɓə n əɓyii m. 6 Shekwoyi wa daɓo n woi nlai: ‘Əho ayawyi ɓə kwu zè azhiɓeyi fyi n əknyi n kwo to zhni əɓa nya m, aye tagyi-anyi, jesnu ai kwu ɓa zè afyenu, ai zhni ɓa awyesnugbegye ɓo.’ 7 Shekwoyi wa gna, ‘Ama mi ɓə ga əknyi tata n ɓa ɓə zhni kwo fyenu tnutnu nyi, n əkwo avnu, ɓa ɓə kwnu n əknyi yi nabai ɓa ga mi mwamwa zhi n aba ye.’ 8 Nlonu wa ga Ibrahim ɓəgbeshi nyaznu nya. Ibrahim waa zè Ishakwu dada nlonu waa wo znunya n nyipyei nyimwanyimwai əwo mama nya. Əsa fyewyi Ishakwu waa zè Yakwuɓwu dada, jesnu Yakwuɓwu waa zè dada, adada-azakwoi awoceaba nya.

9 "Ntuge əyi adada-azakwoi ɓə woshe n Yusufui, ɓaa wo kwnú lo Masar n zhni fyenu. Ama Shekwoyi ɓə kwnusnu n woi 10 jesnu wa wo gwoya n azhnìgye vnyanya. Waa wyemwa ga Yusufu, jesnu wa bma wo zhni wa ɓwa bmyashi n Fyirauna, əsu Masariyi nya aba. Ntulonu Fyirauna waa wo zè begyii tu n Masar ɓədo n əwo galukwoi vnyanya.

11 "Nlonu myikwnu nazhii kwa losa Masar vnyanya n Kaanai, kwa ɓe n azhnìgye yaakwoi, jesnu to əyi azakwoyi ɓa ɓwa nyagyi m. 12 Əsa n Yakwuɓwu ɓə wo nge nyagyi lo n Masar, wa tnu əyi azakwoyi tnutnu ɓa lo gnaɓyi kpmisnui. 13 Əɓa gnaɓyi lolo əɓwa baayi nya, Yusufu wa wu əwo azaje əza n wo ɓə zhni, jesnu Fyirauna wa kwu Yusufu əbye kpeye. 14 N dəye avnu, Yusufu wa tnu əwo dada ɓo, Yakwuɓwu n əwo pwuwai vnyanya, əɓa vnyanya shiitnaaba-ceatnu. 15 Nlonu Yakwuɓwu wa shnilo Masar, aba n əfyi ɓə wna wo dna, jesnu aba ń əyi azakwoyi ɓə fyí nyi. 16 A ɓə kwu zhi n əɓa anayii n Shekem jesnu a kwu ɓa fyi n vnyigwo, n Ibrahim ɓəə la si n Hamon anugwnu dna n Shekem shi a ɓə n gyiwyei tu.

17 "Shi əsa ɓə wo vyivyiwyi ntuge Shekwoyi wa nu əwo ɓəgbeshi ga Ibrahim, əyi aza n ɓa ɓə fyi n Masar nyi, ɓai la əbye lapata n mwa. 18 Nlonu ‘əsu woyi, əza n wo to ɓə kpe Yusufu əye m, wa gwnutu n əbe n Masar.’ 19 Wa zhni əyi aza awyesnugbegye ɓo jesnu wa kwu əyi azakwoyi wnasnu woi tu ɓa kalá nge ɓa kwu əɓa aɓyipwutu sheya nabai n ɓa ɓá kwu fyíi.

20 "N əsa yi nu n a ɓə ma Mwusa, jesnu wo to ɓə zhni əɓyi azanga nya nu m. Əwo apwuwada ɓa shi wo apya ngwnu-ata. 21 Əsa n ɓa ɓə lo n woi n əbmyi, Fyirauna nyigwnu wa la wo nlonu wa shi wo ngye əwo nugwnu. 22 A kwu ɓəyekpe dəhodəhoi n wyemwa n Amasariyi nya wu Mwusa jesnu əwo ɓədada ɓədo n əwo aɓəzhnii ɓə n kalái dna.

23 "She Mwusa ɓə kwu aye ɓwa shiinyi, wa dnabwugba wa lo əwo aza gnaɓyi, Aisrailayi. 24 Wa gye zaknayii gnyi Masariyi woi wna wo əsnu, ntulonu wa lo wo bma wo, jesnu wa gbata ga wo, waa Masariyi wu. 25 Mwusa ɓə zhninubwo nge əwohni aza ɓa kwu kpe ge Shekwoyi nu ɓəə gnyi woi zhni apma n woi, wa ɓa gwoya, ama ɓa to ɓə kpe ce əye m. 26 Əfyé kwa gyi zhi, Mwusa wa gye Aisrailayi ngwnu-aba n zhi ɓai snugwu. Wa yì wonyi nabai wa kwu əɓa ogwuwnazhi, woi gna, ‘Əfye, fye zhni əfyehnifyehni nu; knyiyi nu zhni fyenyi ye fya wuaje əɓwa a?’

27 "Ama əza n wo ɓə gnyi woi wna əzabaayi əsnu nyi, wa ce Mwusa aɓwaya gnyi n gnagna wa gna, ‘Nyika nu n la ho zhni əbegyiyi n owadayi tu n əyi tukwo a? 28 Ho zhninubwo ge ho ɓa wu mi nu shi ho wui Masariyi nsu nyi?’ 29 She Mwusa ɓə wo lonu, wa bwusi lo Myidiya, aba ń wo ɓə la sase dna n zhni zhiɓeyi jesnu wa kwu aɓyinugbai ɓwa ngwnu-aba.

30 "Shi aye shiinyi ɓəə la duya, maləka wa kpeya da Mwusa dna n əná-anyitala n abwugizhi dna n zhabwikawu n wo vyivyiwyi n Sinai Əpei. 31 She wo ɓə gye ɓəye, ca wo wo ənyai n wo ɓə gyewye nyi. Shi wo ɓə yegwu ntuge wa shiawye vyivyiwyi, wa wo Dagayi woi gna: 32 ‘Əmi nu zhni Shekwoyi əfye adada nya, Shekwoyi Ibrahim nya, Ishakwu n Yakwuɓwui.’ Mwusa wa vnyi n ədnai jesnu to wa ye wa je awyeshi m.

33 "Nlonu Dagayi wa gna wo, ‘La abwada kwnu, ntuge aba n ho gnyi nyi, əknyi gyigyiyi nu. 34 Ɓəhnihni mi kwu əmi aza snuwna gyewye dna n Masar. Mi kwu əɓa əmìdo wo, jesnu mi la shnizhi nu ma lo ɓa ya. Nsaiye ɓe, mi ɓa tnu ho tnutnu lo Masar.’

35 "Mwusa ye nu ɓwasnu n ɓa ɓə la wo aɓəna n aɓədagbma yei, ‘Nyika nu n la ho zhni əbegyiyi n owadayi a?’ Shekwoyi n əwohni tukwoi nu ɓə tnu n woi waa zhni əɓa əbegyiyi n gnyiyii, dna n maləka n wo ɓə kpeya da wo dna n zhabwi nyi. 36 Wa kwnu ɓa ya n Masar jesnu wa zhni aɓo wowoi n aznùi dna n Masar, n Shikwo Byei jesnu, aye shiinyi fyi n zhabwikawu.

37 "Mwusa ye nu n wo ɓə gna Aisrailayi, ‘Shekwoyi ɓə la sheɓəgwognayi kala gnyi ga fye, ngye əmi, dna n əfye aza atasni.’ 38 Wo ɓə dna n adogwnuba dna n zhabwikawu, n kwnusnu n maləkai n wo ɓə daɓo n woi tu n Sinai Əpe nyi, jesnu n əyi azakwoyii; wa gwo aɓədagbma awyewyeyi nya wa kwu ɓa ga nabai ai ga yi.

39 "Ama əyi azakwoyi to ɓə ye əwo ɓəda ɓwashi ɓo m. N əkwoɓwi, ɓaa əwo aɓəna jesnu fyi n əɓa adu, ɓaa jezelo Masar. 40 Ɓa gna Haruna, ‘Zhni ashekwoyi ga yi n ɓa ɓá gyilo n əyi abye. Ama Mwusa ye n wo ɓə kwnu n yii n Masar nyi, yi ta kpe əɓo əye lo n kwo kwu zhni wo m!’ 41 Əsa nu n ɓa ɓə zhni əshna dna n nakwoɓyiyi dogbe. Ɓa kwnu anyakwnukwnu ga kwo, jesnu ɓa dagbma fyi ń ənya n əɓa aɓwa ɓə zhni. 42 Ama Shekwoyi waa awye pmyiya n əɓa aba, jesnu wa kwu ɓa ga fyi nabai ɓa gba nyipyei n əpyai ɓədo n akpasii. Dəye kwo la lodo n əɓoi n kwo kafyilo n sheɓəgwognayi pafyi:

" ‘Israila aza,

fye ɓə kwu ɓe mi n anyakwnukwnui n anyagai n aye shiinyi fyi n zhabwikawu?

43 Fye la dagayilubwi Molek nya shignyi jesnu n kpasii əfye shekwoyi Refam nya, ashna n fye ɓə zhni nabai fya gba ɓa. Ntucenu mi ɓa tnu n fyei fyi n okwnula wnawna n fyi n Babyila abye.’

44 "Əyi azakwoyi ɓə n Dagayilubwi, owa ɓəgbeshi nyai shi n kwnusnu n ɓai fyi n zhabwikawu. A ɓə zhni kwo shi Shekwoyi ɓə ga Mwusa əgbe nu, ngye ədo n wo ɓəə kwu gyewye nyi. 45 She ɓa ɓə la Dagayilubwi gwo, əyi azakwoyi fyi n Joshuwa əsa, ɓa ɓe n kwoi shi, əsa n ɓa ɓə gyi abye yi əknyi n okwnui, n Shekwoyi ɓə nya ɓa ya nyi. Kwo ɓə la dna n əknyi yi nya Dawuda əsa, 46 n wo ɓə kwu Shekwoyi bmyashi agbmada wo nyi, jesnu wa nyaɓo nabai wa zhni ashiba ga Shekwoyi Yakwuɓwu nya. 47 Ama Sulemanu nu ɓə mi nyakwnu ga Shekwoyi.

48 "Kwo shikwonyi, Ikwoda Duduyi Vnyanya taa dna n anyakwnu n azanyikwoci nu naa mi n əɓa aɓwai m. Ngye shi sheɓəgwognayi ncei da lo: 49 Dagayi da lo:

" ‘Əshemi nu zhni əmi əbeshnikpegye,

jesnu əknyi nu zhni əmi apitakpeba.

Knyi nyakwnui pya nu n fye ɓa mi ga əmi a?

Kwo əmi asnusnuba gnyi n nanu a?

50 Əmi aɓwa nu to ɓə zhni anya ye vnyanya m?’

51 "Əfye atukwo agnanakwoyi! Əfye adu n atnubwai ye zhi lo n tnanyaznui. Fye ɓwa wulo ngye əfye azakwoyi nu: Fyei gnyiapaapa n Zafnu Gyigyiyii ciici. 52 Sheɓəgwognayi ho ɓə nyì n əfye azakwoyi to ɓə she wo əwyena m? Ɓa ɓə dudu ɓa kwu aza yi wu n ɓa ɓə da ɓəwyegye Ɓəfyeceyi ɓəɓe nya ɓo nyi. Nsaiye fye la wo ɓwi jesnu fye la wo wu, 53 əfye n fye la owa gwo n amaləka ɓə gwo ga fye nyi, ama fye too shi kwo əɓwa m."

54 She Sahindiri aza ɓə wo dəye, ɓa kwu pwunu jesnu ɓa gyi əɓa anyikna ntu n əwo ɓo. 55 Ama Istifanus, n nunui n Zafnu Gyigyiyii, wa kpewyewu n əshemi wa gye Shekwoyi latu, jesnu Yeisu n gnyiagnyi gnyi n Shekwoyi ɓwaizheɓwa. 56 Wa gna, "Fye shiawye, mi kwu gye əshebemi n gwuya gnyi jesnu Əza Nugwnu n gnyiagnyi gnyi n Shekwoyi ɓwaizheɓwa."

57 Ntu n dəye ɓo, ɓa kwu əɓa atnubwa gwu jesnu, ɓa fyiakwu n abəgye akalá nyai, əɓa vnyanya ɓa yepwi wo, 58 ɓa gnyì wo, ɓa gbmi wo ya gnyi n əzhiyaakwo əbmyi jesnu ɓa ya wo akwuta knyi. Əsa ń aɓəgbmiyi ɓə lo akwutaknyi, ɓa kwu əɓa aje ya zhi n əɓyikasa aba ai yi wo ge Soolu.

59 Ɓai ye zhi ɓai knyi wo akwuta, Istifanus wa zhniaduwa, "Dagayi Yeisu, gwo əmi wyewyeyi." 60 Nlonu wa myiya shi n əwo anyikwutukwoi wa ciɓwi, "Dagayi, to la leifyi ye ba fyi ɓa m." Shi wo ɓə kwu ɓəye da, wa wnagye.