1 Nlonu Agiripa wa gna Bwulus, "A la aba ga ho ha daɓo ga əhohni."

Ntulonu Bwulus, wa ta əɓwa ya wu, wa da əwohni ɓəda: 2 "Əsu Agiripa, mi gye kwo n mii zhni əɓo manai nu ma gnyagnyi gnyi n əho abye n naiye ma dna Ayahudiyi aɓəmaɓəgbe vnyanya n ɓa ncei kpe mi nyi, 3 n shnisnusnu ntuge ho kpe Ayahudiyi akwnunu aɓo əye lo vnyanya ɓədo n əɓa aɓəshefyiajei. Ntucenu, mi ɓa ho lo, ha kna mi tnubwa pəceye.

4 "Ayahudiyi vnyanya ɓa kpəlo she mi ɓə shni anyì gyigyi n wu; ənya n kwo ɓə laka mii ye zhni əɓyicewyi, n əmi anyìgyi yayasa, mii ye dna n əmihni əknyi, jesnu dna n Urishelima cè. 5 Əsa la mwa she ɓa ɓə kpe əmi əye, jesnu ngye ɓa ncei pmalo ɓa gbmiɓo, nge mi ɓə la vyi okwu, toge n əzawyenyigbma nyai m, dna n əyi kwnunu, mii gyianyì n zhni Farisiyi. 6 Nsaiye ntu əmi awyetu ɓo nu; əɓo n Shekwoyi ɓə la shi əyi azakwoyi əgbe nyi, n a da owa n mii n naiye. 7 Dəye nu zhni ɓəgbeshi n əyi abye ngwnu-awoceaba zhi n awyetui, she ɓa zhni Shekwoyi tnutnu n əwyei bmyibmyi; n nyipyei ɓədo n sukwoi. Əsu Agiripa, n tukwoi tu n awyetu ye ɓo nu, n Ayahudiyi ye zhi ɓai kpe mi aɓo. 8 Knyiyi nu ɓa zhni əzaho n fye wa dnabwugba nge kwo zhni əɓo ɓədnai nu Shekwoyi woi kwu afyífyiyi kala a?

9 "Əmihni ce, kwo ɓə la mi kwnuawye nge kwo ɓə bmya ma zhni ɓəhoɓəhoi shi mi ɓə ɓá myi ma gnyiapaapa n Yeisu Nazeretiyi əyei. 10 Njesnu əɓo ye nu ɓwasnu n mi ɓə dna mii zhni dna n Urishelima. N apirisiti tukwoda ikwoi nu n mi ɓə fyi Dagayi aza bəgyé n zhalu, jesnu əsa n a ɓə wu ɓa, mi ɓə la ɓwa gbmitu n ɓa. 11 Asa n mwa bəgyé n mi ɓə zhni mii vyi Ayahudiyibwokwnu ma zhni a ga ɓa tata, jesnu ma zhniatna nabai ma tu ɓa kalá ɓa da atukwopmi ɓəda. Əɓa wyenashe ɓó ɓə n mii zhni agbmada ɓo nu, kwa zhni ma vyi ɓa lo azhiyaakwo n aknyi ajei ma wna ɓa.

12 "N wyihoi, mi ɓəə gnyi mii lo Damaskwos n ikwoi shi ɓədo n tnutnugbegyii apirisiti tukwoda nya. 13 Əsu Agiripa, ngye n nyipyei atukwogwnui, əsa n mi ɓə dnalo ncei n zokwo, ma gye bwuznagna kwoi kwnu n əshemi n du nyipyei n fnafna, kwoi knaya n shegwnu mi ɓədo n əmi azna-kwnuznayii. 14 Əyi vnyanya ya myiya zhi n əknyi, jesnu ma wo bəgye kwoi gna mi n Ibraniyi nyitalai, ‘Soolu, Soolu, knyiyi nu zhni hoi shé mi əwyena a? Kwo dnaɓo lo ha gnyiapaapa n ho ədoduyii.’

15 "Nlonu ma nyaɓo, ‘Nyika nu n hoi a, Dagayi?’

"Dagayi wa dnaɓəgbe, ‘Əmi nu Yeisu, əza n ho gnyi hoi shé wo əwyena nyi. 16 Nsaiye, laka gnyagnyi. Mi la kpeya da ho jesnu mi la ho knyi n zhni ɓəgbmiyi; əɓo nya n ho kwu gyewye nyi jesnu n ho ɓa gyewye n mi nyi. 17 Mi ɓa gnyi ho n əho aza akwnu, ɓədo n Abyedoyii. Mi tnu ho tnutnu lo da ɓa nu 18 ha gwu ɓa awye ya, ha kwnu ɓa n wyegbma lo bwuznagna aba, jesnu ha kwnu ɓa n Shetam kalá lo da Shekwoyi, nabai n ɓa ɓá myi ɓa gwo aleifyi abwizo, jesnu a kwu ɓa fyi n aza yi atasni n a la ɓa pmya n gaiciyaganunui dna n mi.’

19 "Əsu Agiripa, ntulonu, mi to ɓə wo əshebemi tnutnu əɓyi m, 20 Kpmisnuyi ga aza yi n ɓa fyi n Damaskwos, nlonu kwa lo da aza yi n ɓa fyi n Urishelima nyi, kwa lo da Ayahudiyi vnyanya jesnu nlonu kwa lo da Abyedo. Mi ɓə zhni waazi nabai ɓa yeabwi nu ɓa pmyiɓe da Shekwoyi jesnu ɓa wu əɓa abwuye fyi n əɓa aɓəzhni. 21 Cenu ɓə zhni Ayahudiyii ho ɓa wna mi dna n Dagayipwuwa ashilagyí jesnu ɓa zhnatna ɓa wu mi. 22 Ama Shekwoyi wo kwu mi bmazhni nya n naiye; ntulonu, mi gnyi n ya mii gbmiɓo nu ga azanaawyii ɓədo n azayaakwoi. Mi ta da əɓədo nu n du əɓo n sheaɓəgwognayi ɓə da n Mwusai nge ɓa ɓə zhni nyi m; 23 nge Kirisiti ɓə gyeazhnì, əwo nu ɓə la zhni əza kpmisnuyi n wo ɓa laka n əfyi, woi ɓe n ɓədatnu bwuznagna nyai ga əwo aza ɓədo n Abyedoyii."

24 Gnyi n aba ye Fyesitus wa znu Bwulus aɓəmaɓəgbe dna ya. Wa sáce wo, "Ho to ye dnalo n əhohni ací m. Əho nyaba yaakwo kwo la ho zè cijeyi."

25 Bwulus wa dnaɓəgbe, "Fyesitus əza duduyi, mi to jeaci nu gnyi m, əɓo n mi gnyi mii da nyi, gaiciya nu jesnu n dna n ofye. 26 Əsu dami lo n aɓo yei, jesnu mi ɓa myi ma daɓo n əgbei yayai ga wo. Ɓəye la mi kwnuawye nge ɓəho to lo, n aɓo ye, n kwo n woi znudna lo m; ntuge a to ɓə zhni kwo ma n gnagna nu m. 27 Əsu Agiripa, ho n gaiciyai ga lo n sheaɓəgwognayi? Mi kpəlo nge ho ncei ga lo."

28 Nlonu Agiripa wa gna Bwulus, "Ho zhninubwo nge, dna n əsa fyewyi ye, ho ɓa tna mi aɓwa maa zè Kirisitivyiyi?"

29 Bwulus wa dnaɓəgbe, "Kwo əsa fyewyi, kwo kwo la mwasa; mi zhniaduwa ga Shekwoyi lo nge toge əho gbmanyi m, ama aza vnyanya n ɓa kna mi tnubwa lo n naiye, n ɓa ɓá kwu zè ngye əmi ama toge n agbma yei fyi m."

30 Əsu wa laka gnyi n kwnusnu n gwomnai n Byenisii, n aza yii n ɓa ɓə sase fyi n kwnusnu n ɓai nyi. 31 She ɓa ɓə la kwnu n nyakwnu, ɓa ya ɓəda n ajei. "Əza ye too zhni ɓəhoɓəhoi n kwo kwnuce lo n əfyii kwo zhalu m."

32 Agiripa wa gna Fyesitus, "Əza ye to ɓə gna nge wo kwu ɓwuci lo Kaisa aba nu m, mi ɓə ɓaa wo loya."