1 She gyikici ɓə la nazhi, Bwulus wa tnu amwutuyi ɓo, she wo ɓə kwu bwugba fyi ɓa kala, wa gna ɓa ami jesnu wa wna əzna lo Makidoninya. 2 Wa znazna dnalo n səpa yi, woi da aɓədagbma bwugbakaladna nya n mwa ga aza, n kpmasnu wa si Giris, 3 aba n wo ɓə la dna apya ngwnu-ata. Ntuge Ayahudiyi ho ɓə kwu əwo kwúlupa n ɓwasnu dna n əsa n wo ɓə ye wa piyalo Siriya nyi, ntulonu wa jezelo n Makidoninya zokwoi. 4 Aza n ɓa ɓə da wo apye nu ɓə nyi, Sopata Pyirus nugwnu Byeriyayi, Arisitakwus n Sekwundusii ɓai kwnu n Tasalonika, Gayus woi gbmi n Dabye, n Timotii ce; jesnu n Ticikwusii ɓədo n Trofyimwusii ɓai kwnu n Asiya əknyi. 5 Aza ye ɓə gyilo n əyi abye, ɓa lo ɓa pmi yi zhi n Trowas. 6 Shi Gnanaznu awyefna ɓə kwu zo fna, ya lo əya nuwnanya n Fyilibyi ya ɓwa anyipyei ngwnu-atnu, ya snu n əyi azajei zhi n Trowas; yi ɓə kwu fyi n abaayi anyipyei ngwnu-tnaaba.

7 N nyipyei kpmisnui laadi nya, ya yezhi n abagbmanyi ntuge ya gyi Dagayi nyagyi. Bwulus wa daɓo n azai, shikwonyi wo ɓə ncei pma wa fa ɓa n əfyegyizhii nu, wa daɓo nya sadù. 8 Apyitila bəgyé ɓə vyaana kpe n nyakwnudotu aba n yi ɓə gwnudo fyi nyi. 9 Əɓyikasa ai yi wo nge Itikwus, n wo ɓə tu n wyegye, əgyewna kwului kwaa wo kwu, shi Bwulus ɓə daɓo waa mwasa. She wo ɓə la wnagye kwulu, wa kaya shi n əknyi n nyakwnudotu baayi, a la wo n fyífyii. 10 Bwulus wa kashi shnilo əknyi, wa ta əwohni ya tu n əɓyikasa yi, wa kwu əwo aɓwa kpe wo. Wa gna, "Agwu to vnyi fye m, wo n wyewyeyii lo!" 11 Nlonu wa je gwnulo nyakwnudotu wa gná Dagayi nyagyi, ɓa gyi. She wo ɓə kwu əɓo da nya fyegyizhi, wa fa ɓa, wa lo. 12 Aza ɓa la əɓyikasa yi lo ncei n apyi n wyewyeyi, jesnu ɓa kwu atnazhni yaakwo nya ɓwa.

13 Ya kwu gyilo n abye, yii lo əya nuwnanya aba, jesnu ya lofyi n əya nuwnanya lo Assos, aba n yi ɓə lo yii la Bwulus dna n əya nuwnanya. Wo ɓə kwu aɓo ye kpeafye ntuge wo ɓə gnyi woi lo abaayi n apitai nu. 14 Shi wo ɓə shegwnu yi n Assos, wa lodna n əya nuwnanya da yi, ya gwodu lo Myitilin. 15 Əfye kwa gyi zhi, ya lofyi n əya nuwnanya ya ɓe vyivyiwyi n Kiyosii. She əfye ɓə je gyi zhi, ya piya kpe n Samos, jesnu əfye kwa gyi zhi ya si Myiletus. 16 Bwulus ɓə la bwugbadna nge wo ɓa sa Afyisus duya nabai to wa gyi əsa dna n Asiya əknyi m, ntuge awye ɓə n woi ya, wa si Urishelima; n kwo ɓa yezhni dna n pyentikwos əwyi.

17 Dna n Myiletus, Bwulus wa tnu Afyisuyi ikilisiya abyeda ɓo. 18 She ɓa ɓə si da wo, wa gna ɓa: "Fye kpəlo she mi ɓə gyianyì əsa vnyanya n mi ɓə kwnusnu n fyei, ənya n kwo laka n nyipyei kpmisnui n mi ɓə loɓe Asiya əknyi nyi. 19 Mi ɓə kwu tnutnuzhni ga Dagayi dna n tukwogba yaakwo ɓədo n awyenyii, jesnu dna n mwumwu napyei ntu əmi Ayahudiyi anuwnui kwúlupa ɓo. 20 Fye kpəlo nge mi to ɓə bmabwugba ma zhni waazi ɓəhoɓəhoi nya, n kwo ɓa snu n bmazhnii n əfye aba m, ama ma wunya zhi n əfye aba, jesnu n aza bəgyé aba, mii vyi apwuwa n apwuwai. 21 Mi kwu da Ayahudiyi n Agirikiyii nge ɓəshishi nu ɓa pmyiɓe da Shekwoyi dna n abwuye, jesnu ɓa kwu gaiciyaganunui dna n əyi Dagayi Yeisu.

22 "Njesnu nsaiye, Zafnu Gyigyiyi wo la myìtu mi, mi gnyi mii lo Urishelima nu, ama mi ta kpe əɓo əye lo n kwo ɓə ɓwa mi n ɓwaayi m. 23 Əɓo n mi ɓwa kpəlo əkwo nu nge, Zafnu Gyigyiyi kwnù mi lo nge dna n əzhiyaakwo dəhodəhoi, zhalu n azhnìgyei zhilo ɓai pmi mi. 24 Dudulonu, mi too gye əmi wyewyeyi n apma hoi n əmi aba m; əmi ɓəmwi gbmanyi əkwo nu ge, mii pwo əmi anyìgyi ɓo, jesnu mii kwu tnutnu zozhni n Dagayi Yeisu wo la ga mi nyi; tnutnu nabagyi manai ɓəgbmi Shekwoyi shebmyashi nya.

25 "Nsaiye, mi kpəlo nge, əzahozahoyi to lo n əfye, ń mi kwnú laɓa yii zhni waazi Shekwoyi əbemi nya, n wo ɓə je əmi əwyegye m, kpeekpe. 26 Ntucenu, n naiye mi gna fye nu nge, mi to n ɓətui lo ń zahozahoyi ami, n fye m. 27 Ntuge mi to ɓə wo ɓwato ma wu fye Shekwoyi ɓəye nunui m. 28 Fye kwu əwyewna əfyehni, ɓədo n agəlucei vnyanya n Zafnu Gyigyiyi wo kwu fye zhni aɓəwyednayi nyi. Fye kwu zhni aknyiknayi Shekwoyi ikilisiya nya, ədo n wo ɓə si n əwohni amii nyi. 29 Mi kpəlo nge shi mi fa fye, acamcam anapyei ɓə loɓe fyi n əfye atasni, ɓai wna gəluce əsnu. 30 Kwo aza fyi n əfyehni atasni, n ɓa ɓə kwukazhi, ɓai gbmi gaiciyanunui aɓoaje nabai ɓai kna amwutuyi ga əɓahni. 31 Ntulonu, fye kwu zhigwu! Fye pá nge dna n aye ngwnu-ata; mi to ɓə fa əzahozahoyi kwnù ɓo, n nyipyeii, n sukwoi, ɓədo n əmi awyenyii m.

32 "Nsaiye, mi fyi əfye n Shekwoyi akwnu nu ɓədo n ɓədagbma əwo shebmyashi nyai, n kwo ɓa myi kwa mi fye, jesnu kwa ga fye əgwú dna n aza yi atasni vnyanya n ɓa gyigyiyi lo. 33 Mi to ɓə kwnufnafna əzahozahoyi azulufa nya, kwo zinali kwo aje m. 34 Əfye n əfyehni tukwoi, fye kpəlo nge əmi aɓwa ye nu ɓə zhni tnutnu, ma ɓwa əmi apmanya, ɓədo n əmi atnutnu kwnuzhniyi anyai. 35 Dna n ɓəhoɓəhoi n mi ɓə kwu zhni, mi ɓə kwu wu fye nge, n tnutnu kalazhni nya ye pyai nu nlai, n yi ɓa bma akalágbai zhni, fyei pá Dagayi Yeisu aɓədagbma ɓo, n wo ɓə da n əwohni tukwoi: ‘Kwo dulo n anabəlika əza wa ga azaje ənya, a fa ədo n wo ɓa gwogwo nyi.’ "

36 She Bwulus ɓə la pwo ɓəda ɓo, wa ceakwokwo shi n kwnusnu n ɓai vnyanya, wa zhniaduwa. 37 Əɓa vnyanya ɓa ciɓwi, ɓai yama wo jesnu ɓa shepma wo. 38 Əɓo n kwo ɓə wnu ɓa bwugba n du, əkwo nu zhni əwo ɓəda ge, ɓa taa je əwo awyeba wyegye m, kpeekpe. Nlonu ɓa gna wo ami lo əya nuwnanya aba.