1 N anyipyei ngwnu-atnu avnu, pirisiti dnagbmai Ananiyasi, wa shnilo Kaisariya n abyeda hoi ɓədo n owayekpeyii, ai yi wo ge Tatullus, ɓa ɓe n əɓa aɓəmai kpe Bwulus n gwomna abye. 2 She a ɓə yi Bwulus ɓe ncei n əmi, Tatullus wa da əwo ɓəda tu n Bwulus tukwo n gnyi n Fyelisi abye, "Yi kwu mwasa yii sase fyi n bwugbafu dna n əho begyisa, əho ɓəwyegye n kpaai, kwo la ɓe yi n aɓəzhnizhii n əknyi ye. 3 O Fyelisi əza duduyi! N ɓwahoɓwahoi jesnu n zokwo dəhodəhoi, yi kwu əho aɓəzhnizhi ye gyewye, jesnu a da yi lo n mwa zam. 4 Ama nabai to ma gna ho gnagna lo abye m, mi ɓa ɓa, nge ho ɓwabwugba n yii, ha kna yi tnubwa əsa cewyi.

5 "Yi la əza ye wna woi zhni aɓogala, woi ma agyikici dna n Ayahudiyi atasni dna n anyì vnyanya. Əwo nu zhni gyikicizhni tukwoda, Anazereniyi okwu nya; 6 wo ɓə zhniatna wa tu Dagayipwuwa cegye; ntulonu ya wna wo jesnu [yi ɓə ɓaa owa znuya tu n əwo, shi əyi owa lo.] 7 Ama bəzheyaakwo Lisiyas, wa ɓe wa fna wo n əyi akwnu n akalái, 8 wa ga əwo aɓəmayi gbetu nge ɓa ɓe əho aba. Əsa n ha nya wo aɓo fnyinyifnyinyi n əhohni tukwoi, ho ɓa ɓwa gaiciyanunui aɓo ye nya vnyanya n yi ɓe ncei kpe n əwo tukwo nyi."

9 Ayahudiyi aje ɓa tu aɓəma ye bwokwnu, ɓai gbmiɓo nge aɓo ye zhni gaiciya nu.

10 She gwomna ɓə ga wo aba nge wo daɓo, Bwulus wa dnaɓəgbe: "Mi kpəlo nge əsa la mwa, she ho ɓə ya owada dna n əknyi ye; ntulonu agbmada mi lo ma dnaɓəgbe əɓa aɓəma nya. 11 Ho ɓa myi ha nyaɓo ntna ɓədnai, ha wo nge anyipyei too du awoceaba ya, she mi ɓe gwnulo Urishelima mi ga mwamwa m. 12 Əmi aɓəmayi to ɓə gye mi gnyi mii naɓo n zahozahoyi dna n Dagayipwuwa, kwo mii fyi deeji abwugba aɓwaya dna n Ayahudiyibwokwnu kwo gnyi n ɓwahoɓwahoi dna n əzhiyaakwo m. 13 Njesnu ɓa ta myi ɓa gbmiɓo ɓe ncei pəipəi, n ɓa gnyi ɓai kpe mi nyi, nge gaiciya nu m. 14 Dudulonu, mi la ye nge mi ga Shekwoyi əyi azakwoyi nya mwamwa lo ngye shi mi vyi Zokwo nyi, ədo n ɓa yi nge okwu. Mi n gaiciyai ga lo n nyahonyahoi n kwo vyi Owa jesnu n adoi ń ɓa kafyilo n Sheaɓəgwognayi, 15 jesnu mi n awyetu gbmanyigbmanyii nu lo n Shekwoyi, shi aza ye ncei lo nyi, nge əfyikalakwu lo ntu aɓəfyeceyi ɓo n akpizhniyii. 16 Ntulonu mi snukwnú ciici maa əmihni tukwovnyi shi n tna-ɓogyi n Shekwoyi abye ɓədo n zanyikwocii.

17 "She mi ɓə la Urishelima fa aye bəgyé, ma ɓe əmi aza n anyagai ntu awyekwoyi ɓo jesnu ma ga Shekwoyi anyaga. 18 Mi ɓə gyigyii shi kwnunu ncei tu; she ɓa ɓə gye mi n dna n Dagayipwuwa ashilagyí, mii pwo pmyapmya kwnunu kwu ɓo. Deeji to ɓə zhi n mii; kwo nge mi ɓə n əɓwai dna n gyikici m. 19 Ama Ayahudiyi ho lo, ɓai kwnu n Asiya əknyi, kwo ɓə gwo, ɓa ye zhi lo n ya, n əho abye, nabai ɓa daɓo, ngye ɓa n ɓəhoi lo tu n əmi tukwo. 20 Kwo aza ye n ɓa zhi n ya nyi; akpəge ɓa da ɓəkasa n ɓa ɓə ɓwa mi ncei, əsa n mi ɓə gnyiagnyi gnyi n Sahindiri abye nyi; 21 akpəge ɓəda ye nu gbmanyi, n mi ɓə ɓəwyi, əsa n mi ɓə gnyi ncei n əɓa abye: ‘Ntu afyífyiyi kalakwu ɓo nu n mi gnyi ai da mi owa n naiye n əho abye.’ "

22 Nlonu Fyelisi, n wo ɓə kpe Zokwo ye, aɓo əye dəidəi nyi, waa owa kwu zhi. Wa gna, "Əsa n Lisiyas, bəzheyaakwo ɓə ɓe, mi ɓə znu əho ɓəda ya." 23 Wa ga bəzhetagyida əgbe nge a la Bwulus dna n abagwuyi akwnu, ama a la əsnuya-aba ga wo jesnu ɓa ye nge əwo anugwnudo ɓa vyi wo əɓo.

24 N anyipyei bəgyé avnu, Fyelisi wa ɓe ɓədo n əwo nyikwoi Durosila, n wo ɓə zhni Yahudiyi nu nyi. Wa tnu Bwulus ɓo, nlonu wa kna wo tnubwa, she wo ɓə daɓo ntu gaiciyaganunui ɓo dna n Kirisiti Yeisu. 25 Shi Bwulus ɓə daɓo ntu ɓəfyecezhni ɓo, əza əwohni wnashi ɓədo n owadai n kwo ɓe lo n abye nyi, ədna kwa wo Fyelisi jesnu wa gna, "Kwo la kwnu lonu nsaiye! Ho ɓa myi ha fa aba ye. Əsa n ma gye kwo bmya, ma tnu ho əɓo." 26 Dna n əsa ye, wo ɓə gnyi woi tu əwye nge Bwulus ɓa ga wo gbebyi nu, ntulonu waa gnyi woi tnu wo əɓo ciici woi daɓo n woi.

27 She aye ngwnu-aba ɓə la duya, Pwosiwus Fyesitus wa gyibe tu Fyelisi, ama ntuge Fyelisi ɓə ye wa ga Ayahudiyi bmyashi nu, waa Bwulus fa dna n zhalu.