1 Əmi azaje n amapwuyii, ndei ń a wna əzaho dna n leifyi, əfye n fye gyianyì fyi n Zafnu nyi, fye jezeɓe n əza yii n atnazhnii. Ama fye zhni pəceye n əfyehni, ntolonu m, əfyehni ce fya ɓwa mwumwu. 2 Fye bma aje akaya ashnawoi shi, əkwo nu ɓa zhni fya nu Kirisiti owa. 3 Ngye əzaho zhninubwo lo nge wo zhni nyaho nu to woi kwu nyaho nu zhni m, wo dna əwohni nu kwoce. 4 Zahozahoyi wo mwi əwohni, wa gye shi wo zhni aɓo ń wu. Nlonu n wo ɓa nya agbmada n əwohni ɓo, toge woi mwi əwohni ədo n zadoi m. 5 Ntuge zahozahoyi ɓa la əwohni akaya nu. 6 Dudulonu əza n a wu wo Shekwoyi ɓədagbma, kwo bmyalo wa gná əwo anya amanai vnyanya n əzai n wo wu wo Shekwoyi ɓəda nyi.

7 Fye to dna fyehni kwoce ho m: A ta kpe Shekwoyi agyè m. Ənya n əza bye əkwo nu n wo ɓa do. 8 Zahozahoyi ń wa bye ənya ntuge kwa da əwo nayi, dna ń nayi wo ɓə do nyabwodo; zahozahoyi ń wa bye ənya n kwo dá Zafnu, dna n Zafnu n wo ɓə do wyewyeyi nyalonyalo nya. 9 A to kwu yi ɓe n ɓəmanai zhnii m, ntuge əsa tutui ɓe lo yii gwo gyiba, ndei n yi to bmabwugba ya kwu fa zhni ɓo m. 10 Ntucenu, əsa ń yi ɓwa aba ncei, fa ya zhni ɓəmanai ga aza vnyanya, Nshnisnusnu aza yi n ɓa fyi n avyiyi apwuwa nyi.

11 Gye apaka ayaakwo pya n mi ka ga fye n əmihni aɓwai!

12 Aza yi n ɓa ncei pma əɓa ɓo kwa da aza ń nayi ɓəzhnii, əɓa nu yi əɓahni nabai ɓa yekwofyi fye nge fye znunya. Ɓətukwo gbmanyi n kwo zhni ɓai zhni lonu, əkwo nu nge ɓa bwusi n awyesnugbegye wu ntu Kirisiti znudu ɓo. 13 Kwo aza yi n ɓa n anyaznuznui lo nyi, ɓa ta shi owa əɓwa lo m; dudulonu ɓa ncei pma fya znunya, nabai n ɓa ɓá gyigbe ntu əfye anyaznu ɓo dna n nayi. 14 Mi ta ye lo ma gyigbe m nanyinanyi, akpəge dna n znudu əyi Dagayi Yeisu Kirisiti nya, ntu əkwo ɓo nu n a la anyì znudu n əmi aba n kasnu a lá mi znudu n anyì aba. 15 Nyaznu, kwo tnanyaznu to zhni nyaho nu m; ənya n kwo zhni ɓəkpokəloi əkwo nu zhni shnazhni woiwoyi. 16 Bwugbafu n snusnugyei ɓa lo aza aba vnyanya n ɓa shi ɓəgbetu ye ɓwa; kwa lo da Israila Shekwoyi nya.

17 Ənya n kwo laka nsaiye kwoi lo n abyei, zahozahoyi to je mi azhnì tu m, ntuge mi ń Yeisu Kirisiti acigwusai kpəlo n əmi nayi.

18 Shebmyashi əyi Dagayi Yeisu Kirisiti nya kwo kwnusnu n əfye zafnui, əmi azaje n amapwuyii. Amyi.