1 Əfye Agalatiyi amama! Nyikanu kwu agwuzhenyi wu fye a? N əfye awyeba nu n a ɓə kwu Yeisu Kirisiti wu tu pəipəi ń znuznuidu. 2 Mi ye ma ɓwa əɓo gbmanyi nu kpeye ń əfye aba: Fye ɓə gwo Zafnu n atnutnu owa nyai nu, kwo n gaiciyagai nu ń əɓo n fye ɓə wo nyi a? 3 Fye kwu zè amama nu nlai? Shi fye ɓə ya znazna fyi n Zafnu, fyei ye fya zo n fyi n nayi nu nsayi? 4 Əfye azhnìgye n mwa ɓa kwu zè gbəloi nu; ngye ɓa kwu agbəloi nu zhni? 5 Ntulonu mi nyaɓo lo njesnu, Shekwoyi ga fye əwo Zafnu, woi zhni aɓəwowoi fyi n əfye atasni n owa atnutnui nu, kwo n gaiciyagai nu ń əɓo n fye kwu wo nyi a? 6 Ntulonu ce, Ibrahim "ɓə la gaiciya ga Shekwoyi, jesnu aa kwo ba dna wo ge ɓəfyecezhni."

7 Nlonu, fye ɓwa awyega, nge aza yi nu n ɓa n gaiciyagai lo, əɓa nu zhni Ibrahim aɓyi. 8 Nyakashi ɓə kwu ɓəye pmawyegye nge Shekwoyi ɓə la ɓəgyikpmaya n Abyedo dna n gaiciyaga, jesnu waa nabagyi manai pma əwyidna ga Ibrahim: "Abye vnyanya ɓə ɓwa anabəlika ntu əho ɓo nu." 9 Ntulonu aza yi n ɓa kpema gaiciyaga nu ɓa n anabəlikai lo n kwnusnu n Ibrahimii, əza gaiciyagayi.

10 Ntuge aza vnyanya n ɓa kpmima n owa tnutnu nyi, ɓa fyi ń knyitu nu, ngye she kwo kafyilo: "Knyituyi nú n zahozahoyi n wo to gwodu wa zhni ɓəhoɓəhoi n kwo kafyilo n Pafyi Owa nya m." 11 Kwo wulo pəipəi nge əza to lo n wo kpema n owa, n wo ɓa ɓwa aɓəkpmaya n Shekwoyi aba m, ntuge, "ɓəfyecezhniyi ɓa gyianyì n gaiciyagai nu." 12 A to n owai mi tu ń gaiciyaga nu m; n əkwoɓwi kwa gna, "əza n wo zhni aɓo ye, wo ɓa gyianyì n ɓai nu." 13 Kirisiti ɓə la yi shna ń knyitu owa nya, waa zè knyitu ntu əyi ɓo, ntuge kwo kafyilo: "Zahozahoyi zhni knyituyi nu ń wo gyitu lo n znudu shnuwna." 14 Wo ɓə shna yi nabai nge anabəlika n a ɓə ga Ibrahim nyi, n ɓa ɓá myi ɓa ɓe da Abyedo dna n Kirisiti Yeisu, nabai ge dna n gaiciyaga nu n yi ɓa gwo ɓəgbeshi Zafnu nya.

15 Əmi azaje n amapwuyii, fye fa ma la ɓədogbe she a gyianyì fyegyifyegyi nyi. N ɓwasnu ngye shi əzaho taa myi wa ɓe kwo wa pmyi zanyikwoci ɓəgbeshi ma n gnagna ń a la kwo myishì dna n ofye nyi m, kwo ɓwa wu nlonu nu n ɓəye. 16 A ɓə kwu aɓəgbeshi zhi Ibrahim ɓədo n əwo nyabyei. Nyakagyigyiyi to gna "ń anyabyei" nu m, n kwo ɓa gyi nge aza bəgyé m, ama "n əho nyabyei," n kwo wu nge zaknayi nu, əwo nu zhni Kirisiti. 17 Əɓo ń mi zhninubwo əkwo nu nyi: owa, ń a ɓə ɓe n kwoi n aye 430 avnu nyi, kwo ta pmyi ɓəgbeshi kwokwoi mà n gnagna ń Shekwoyi ɓə la shni shishi nyi, nabai kwaa ɓəgbeshi la ya m. 18 Ngye əgwú kpema n owa nu, to, a gye kwo to ye kpema n ɓəgbeshinu m; ama Shekwoyi dna n əwo shebmyashi ɓə ga Ibrahim kwo dna n ɓəgbeshinu.

19 To knyiyi nu ɓə zhni a shni owa ye gaga a? A ɓə ɓe n kwoi ntu owa gnanaznu ɓo nu kwoi nya əsa n əza Nyabye ń a ɓə shi kwo əgbe nyi woi la ɓe. A ɓə ga owa ń amaləka akwnu nu jesnu aa kwo ga ɓəwnazhiyi wa wna kwo akna. 20 Ama kwo wu nge ɓəwnazhiyi du okwu gbmanyi ya lo; ama Shekwoyi nyi gbmanyi nu.

21 Ntucenu, owa gnyiapaapa lo nu n Shekwoyi ɓəgbeshii? Kwo fyewyi! Ngye owa n a ɓə la ga nyi, kwo ɓə ɓa ga wyewyeyi, akpəge ɓəhnihni ɓəfyecezhni ɓə ɓa ɓe n owai nu. 22 Ama Nyakagyigyiyi n kwu nyahonyahoi gwufyi n leifyi akwnu, nabai ənya n a ɓə shikwo əgbe nyi, n a ga kwo dna n gaiciyaga nu dna n Yeisu Kirisiti nyi, n a ɓa kwu kwo ga aza yi n ɓa ga gaiciya nyi.

23 Gaiciyaga ye ɓə snu n kwo ɓe, ai kwu yi wnafyi n owa zhalu, n gwufyi nya əsa n a ɓə ye a gbmi gaiciyaga ɓe ncei. 24 Ntulonu owa ɓə zhni əyi zokwowuyi nu nya əsa n Kirisiti ɓə ɓe ya myi ya ɓwa ɓəgyikpmaya dna n gaiciyaga. 25 Nsaiye she gaiciyaga ye kwo la ɓe nyi, yi to ye shna fyilo n zokwowuyi akwnu nu m.

26 Ntulonu dna n Kirisiti Yeisu əfye vnyanya fye zhni Shekwoyi aɓyi nu dna n gaiciyaga, 27 ntuge əfye vnyanya n a ɓə zhni fye batizima fyi n Kirisiti nyi, fye kwu Kirisiti kpe əfyehni. 28 Yahudiyi to ye shnasnu lo kwo Abyedo, kwo fyenu kwo əza loloiya, kwo a gna nge zanugbayi n nyikwozai m, ntuge əfye vnyanya fye zhni gbmanyi nu dna n Kirisiti Yeisu. 29 Ngye n fye zhni Kirisiti anya nu, nlonu a gye fye zhni Ibrahim nyabye nu, jesnu əgwúgyiyi ngye shi ɓəgbeshi lo nyi.