1 Nlonu n aye awoceanyi avnu, ma jezelo Urishelima n kwnusnu n Banabai. Mi ɓə la Titusu la lo ncei ɓədo. 2 Mi ɓə vyi ɓəwyegye apita nu jesnu, ma sase fyaa n aza yi n ɓa zhni atukwoda n a ga ɓa mwamwa nyi. Ma wu ɓa waazi nabagyi manai nya n mi ɓə zhni ga Abyedo nyi. Mi ɓə ncei pma ma kwu kpe nge mi to ɓə gnyi mii znazna kwo ge mi kwu znazna ya dna n anyìgyi gbəloi m. 3 Dudulonu kwo Titusu n wo ɓə kwnusnu n mii nyi, a to ɓə yekwofyi wo nu nge wo znunya m, kwo shikwonyi wo ɓə zhni Girik nu. 4 Əɓəye ɓə laka gnyi ntuge agaiciyagayi akwocednayi ɓə kwu lofyi nu n əyi atasni; ɓai pmi yi gye fyaa, əyi loloya n yi ncei lo dna n Kirisiti Yeisu nyi, ɓai ye ɓa kwu yi zhni afyenu. 5 Yi to ɓə ga ɓa aba kwo fyewyi m, nabai ń a ɓa myi a kwu nabagyi manai gaiciyanunui wnaknazhi ga əfye.

6 Ama aza yi n a ɓə n ɓai ga mwamwa yaakwo nyi; kwo ɓa ɓə zhni anyika nu a, kwo to ɓə shnado n əmi aba m; Shekwoyii ta knyi aza knyiknyi nu n wo ɓa wu ɓa əwo bmyashi m; ɓa to ɓə ɓe mi nyaho ń əmi waazizhni m. 7 N əkwoɓwi, ɓa ɓə kwu kpe nge a la tnutnu waazizhni nabagyi manai nya fnyi mi əɓwa ntu atnanyaznuyi ɓo, n ɓwasnu shi a ɓə ncei ga Byitusu tnutnuloyi ntu anyaznuyi ɓo nyi. 8 Ntuge Shekwoyi, n əwo nu ɓə zhni apma n Byitusui n zhni tnutnuloyi n anyaznuyi aba nyi, əwo nu ɓə ɓwa je dna n mi woi zhniapma n mii ngye tnutnuloyi ga Abyedo. 9 Jemyis, Kefas n Yohanai; aza yi n ɓa nu ɓə zhni azhigwo nyi, ɓa ɓə la mi gwo n Banabai dna n jedoɓəzhni manai, əsa n ɓa ɓə gye shebmyashi ń a la ga mi nyi. Ɓa kwu ye nge yi lo da Abyedo n kasnu əɓa ɓa lo da anyaznuyi. 10 Əɓo vnyanya n ɓa ɓə ye nge ya gwodu n zhnii əkwo nu nge yi pa awyekwoyi ɓo; əɓo nu nyi n mi ɓə shni fafashi ge ma zhni.

11 Əsa n Kefas ɓə ɓe Antiyok nyi, ma gnyiapaapa n woi gnyi n əwo awye ntu əɓo ɓo n wo ɓə zhni nyi, kwaa zè nge wo ɓə la əwohni znuknyi. 12 Ntuge azaho, n ɓa ɓə kwnu n Jemyis aba, ɓa ɓə snu nabai n ɓa ɓe əwo aba nyi, wo ɓə zhni wa kwnu nyagyi gyi n Abyedoyii. Ama she ɓa ɓə kwu si, wa ya woi ta n avnui woi kpe əwohni ya n Abyedo, ntuge wo ɓə wó aza yi ədna n ɓa ɓə fyi n nyaznu okwu nyi. 13 Ayahudiyi aje ɓa kwu vyi əwo kwocedna, kwaa zè nge n əɓa kwocedna, kwo Banaba wo ɓə la ɓwuaba ce.

14 She mi ɓə gye nge ɓa ta zhni əɓo lo vyi gaiciyanunui nabagyi manai nya m, ma gna Kefas n əɓa awye vnyanya, "Ho zhni Yahudiyi nu, dudulonu hoi gyianyì ngye Abyedo, toge ngye Yahudiyi m. Kwo zè n wunanu hoi n Abyedoi gyice nge ɓa vyi Ayahudiyi kwnunu a?

15 "Əyi ń a ɓə ma yi n zhni Ayahudiyi nyi, ama toge Abyedo aleifyizhniyi m, 16 yi kpəlo nge əza ta ɓwa ɓogyikpmaya ntu owa ɓwashi ɓo nu m, ama n gaiciyagai nu dna n Yeisu Kirisiti. Ntulonu, əyihni ce, yi kwu gaiciyaga dna n Kirisiti Yeisu, nabai n a ɓaa aɓo kpma yi ya n gaiciyagai dna n Kirisiti, toge dna n owa ɓwashi m, ntuge dna n owa ɓwashi, əza to lo n wo ɓa ɓwa ɓəgyikpmaya m.

17 "Ama ngye əza zna ɓəgyikpmaya shni lo dna n Kirisiti, əyihni, Ayahudiyi, aa gye yi fyi zhi nsaiye n aleifyizhni nu, kwo to wu nu nge Kirisiti nu gnyi woi wu yi leifyizhni əgbá m? Nlonu to m, kpeekpe. 18 Ndei ń ma je anya mi n mi ɓə la vyiya nyi, ɓəhnihni nu ge mi zhni owa gnanaznuyi nu.

19 "Ntuge n owa yekpei nu ń mi ɓə fyí dna n owa, nabai ń mi ɓa myi ma gyianyì ga Shekwoyi. 20 A lá mi znudu n kwnusnu n Kirisitii, əmi nu to ye gyianyì m, ama Kirisiti nu gyianyì dna nsaiye n əmi. Anyìgyi ń mi gyi dna ń nayi nsaiye nyi, mi gyi ɓa dna n gaiciyai ga nu dna n Shekwoyi Nugwnu, əwo n wo ɓə ye mi, wa ga əwohni tukwo ntu əmi ɓo nyi. 21 Mi taa kna shebmyashi Shekwoyi nya ya ma n gnagna m, ntuge ń a ɓə ɓa ɓwa ɓəfyecezhni dna n owa, a gye Kirisiti əfyi kwo la zè gbəloi nu!"