1 Əɓo ń mi gnyi mii da nu nyi, ndei əsa n əgwúgyiyi ye gnyi n zhni əɓyi nu, wo to shnado lo n fyenuyi m, kwo shikwonyi nyaɓwa apyiznutu nya vnyanya kwo zhni əwo nya nu. 2 Əgwúgyiyi ɓaa dna n azokwowúyi akwnu nu ɓədo n awyeznushiyii nya əsa n əwo dada ncei znutu. 3 Ntulonu ce, əsa n yi to ɓəə kpmiawye m, yi ɓə fyi zhi n fyenu tnutnu nu, fyi n zafnu anyì aɓəfyefyi faafaai. 4 Ama shi əsa n a ɓə ncei shi nyi kwo ɓə la si cimcim, Shekwoyi wa tnu n əwo Nugwnui, nyikwoza wa ma wo. A ma wo dna n owa ɓwashi cala, 5 wa shna aza yi n ɓa fyi n owa, nabai n a ɓa gwo ɓa fyi ge anugwnu ashishiyi. 6 Ntuge fye zhni əwo anugwnu nu, Shekwoyi ɓə la tnu n əwo Nugwnu Zafnui fyi n əyi adu, Zafnu n wo yi, "Abba, Dada." 7 Ntulonu ho to ye zhni fyenu nu m, ama Shekwoyi əɓyi, shikwonyi ho zhni əwo əɓyi nu nyi, Shekwoyi wo la ho je əgwúgyiyi zè.

8 N sapai, əsa ń fye to ɓəə kpe Shekwoyi əye nyi m, fye ɓə zhni afyenu nu fyi n anya akwnu n ɓa to ɓə zhni ashekwoyi nu m. 9 Ama nsaiye n fye kwu Shekwoyi kpeye nyi; kwo a gna nge Shekwoyi n fyei kpeye lo; kwo zè n wunanu fyei jezelo da anya akalágbai jesnu akwnuyi atnawyekpmiwuyi a? Fye ncei pmalo fya kwu je əɓa afyenu nu zhni njesnu? 10 Fye n anyipyei tnutnulo fyei ga ɓa mwamwa, n apyai, n asai, n ayei! 11 Mi dnalo n ədnawo, da əfye ɓo, sakwnú a gye mi la əmihni lúya gbəloi kpe n fye.

12 Mi gyi fye əwye əmi azaje n amapwuyii, fye kwu zè ngye əmi, ntuge mi la əmihni zè ngye əfye. Fye too zhni mi əɓənukwoi m. 13 Ngye shi fye kpəlo nyi, nyasna ɓo nu ɓə zhni ma kpedna ma zhni waazi nabagyi manai nya ga fye, 14 kwo shikwonyi əmi nyasna ɓə zhni mwumwu nu n əfye aba, fye to ɓə shí mi n wyegbacii n aɓəciyayi m. N əkwoɓwi, fya gwo mi ngye mi ɓə zhni Shekwoyi maləka nu, ngye əmi nu ɓə zhni Kirisiti Yeisu n əwohni tukwo. 15 To, nsaiye, əmi anabəlika əfye anya zhi ń nanu a? Mi ɓa gbmi fye əɓo, kwo ɓə gna kwo ɓə ɓaa yezhni, fye ɓə ɓaa əfye awyekwnunu kwnu fya kwu ɓa ga mi. 16 Mi la zè əfye nuwnuyi nu nsayi, ntuge ma gna fye gaiciyanunui?

17 Aza yi ɓa n əwyei nyinyíi lo nabai ɓa kwu fye wnafyi, ama toge ntu n əɓo manai ɓo m. Ənya n ɓa ye, əkwo nu nge, ɓaa fye kaya n əyi nabai fya ce fya nyiwye ntu əɓa ɓo. 18 Kwo bmyalo əza waa gnyi n əwyei nyinyíi, ndei n əkwo ɓətukwo bmyalo, jesnu əza waa gnyi nlonu nsahosahoi, to ɓwasnu ge əsa nu n mi gnyilo n əfye aba m. 19 Əmi aɓyi ayeyeyi, aza n mi la je lodna n ɓyimanyasna, nya əsa n a ɓə lá Kirisiti je pwo dna n fye, 20 a wo mi lo ngye mi ye kwnugnyi lo n fyei nu nsaiye, maa əmi bəgye shnado, ntuge əfye əɓo wo mi lo!

21 Fye gna mi, əfye n fye ncei pma fya kwu fyi n owa snuta nyi, fye ta kpe əɓo ye lo n owa ncei da m? 22 Ntuge a cei kakpe lo nge Ibrahim ɓə n anugwnui ngwnu-aba, gbmanyi nyikwoza fyenu nya, baayi, n nyikwo lalayi loloiya da. 23 Əwo nugwnu n nyikwoza fyenu yi, a ɓə ma wo vyi nayi ɓəzhni nu, ama əwo nugwnu n nyikwo loloiyai, a ɓə ma wo ntu zafnu ɓəgbeshi ɓo nu.

24 A la aɓo ye kwu n zhni ɓədogbe nu: Anyikwo ye n zhni aɓəgbeshi ngwnu-aba nu. Ɓəgbeshi gbmanyi nu gbmi n Sinai Əpe, əkwo nu zhni Haga n wo ɓə ma aɓyi ɓa kwu zhni afyenu nyi. 25 Nsaiye, Haga nu zhni Sinai Əpe n kwo dna n Arabyiya əknyi nyi, n kwo gbedolo n Urishelima əzhiyaakwo nsaiye nya, ntuge wo dnalo n fyenu tnutnu n əwo aɓyii. 26 Ama Urishelima n kwo tu n əshemi nyi, əkwoo da zhni loloiya nu jesnu əwo nu zhni əyi əya. 27 Ntuge a cei kafyilo:

"Dagbma, nyikwoza lama,

əho n ho too shni əɓyi ma nyi m;

ɓəwyi agbmada nya jesnu ha ɓəwyi n əgbei la,

əho n ho too shni lodna n əɓyima nyasna nyi m;

ntuge aɓyi nyikwoza ɓwawnayi nya

ɓa du əza nya lo n wo n ənui lo nyi."

28 Nsaiye, əmi azaje azanugbai n anyikwozai, fye zhni aɓyi ɓəgbeshi nya nu ngye Ishakwu. 29 Dna nsayii, nugwnu n a ɓə ma wo dna n nayi nyi, wo ɓə kwu nugwnu n a ɓə ma wo dna n ikwo Zafnu nya nyi wu awyesnugbegye ɓo. Əɓo gbmanyigbmanyi nu zhni nsaiye. 30 Ama knyiɓei nu n Nyakagyigyiyi ncei da lo a? "Gbmi nyikwoza fyenu nya ya n əwo nugwnui, ntuge nyikwoza fyenu nya nugwnu to ɓəi kwnu əgwúgyi n əɓyi nyikwoza loloiya nyai m nanyinanyi." 31 Ntucenu, əmi azaje n amapwuyii, yi to zhni aɓyi nyikwoza fyenu nya nu m, ama nyikwoza lalayi loloiya nya.