1 Ntulonu mi la əmi bwugba dna ge mi taa je fye gnaɓyi ɓe, n kwo ɓa ɓe fye n snasnai m. 2 Ngye mi ɓə la bwugba knyi fye, nyika nu cegnyi lo wa ga mi agbmada akpəge əfye n mi la fye knyibwugba nyi a? 3 Mi ɓə ka kwo ngye shi mi ɓə ka nyi, nabai nge əsa n mi ɓəə ɓe, mi too ɓəə ɓwa bwugbawnu n aza yii nɓa gwo ɓa ga mi bwugbabwui nyi m. Mi ɓəə n bwugba myignyii n əfye vnyanya, nge n fye ɓa dnaɓwado n əmi n agbmadai. 4 Ntuge mi ɓə ka kwo ga fye dna n agwunyaznu yaakwo nu, jesnu n bwugbaknyii n awyenyii n mwa, toge nabai ma wnu fye bwugba m, ama mii ye fya kpé shi mi yé fye lo nsnu.

5 Ngye əzaho wo la ɓe n bwugbawnui, wo too wnu mi bwugba nsnu shi wo ɓə wnu əfye vnyanya bwugba nyi m; to ma da kwo n zhinazhizhii m. 6 Tata n azabəgye ɓə ga wo nyi kwo n woi kwnukwnui lo. 7 Nsaiye n əkwoɓwi, fye gwo fya zo wo abwi jesnu fya fu wo bwugba, nabai to wa gbakalá n bwugbawnu n duwyi m. 8 Mi gyi fye əwye nu nge fye la əfye yeyewu je myignyi ga wo. 9 Əɓo n kwo ɓə jezhni ma ka nyaka ga fye nyi, əkwo nu nge ma gye kwó fye ɓa gnyiagnyi dna n mwumwu, jesnu fya kwu zhni aɓəvyiyi n nyahonyahoi. 10 Zahozahoyi n fya kwu abwizo wo, mi kwu abwizo wo ce. Jesnu əɓo n mi kwu əkwo abwizo; ngye əɓəho ɓəye nyi abwizo nya; mi kwu abwizo zo n Kirisiti abye ntu əfye ɓo, 11 nabai n Shetam taa znu yi akpé m. Ntuge əwo agbá to n yii ɓwuye lo m.

12 Nsayi shi mi ɓə lo Trowas mii da nabagyi manai Kirisiti nya, jesnu ma gye nge Dagayi wo la kpakwo gwuya ga mi, 13 dudulonu, mi to ɓə n bwugbafui m, ntuge mi to ɓə gye əmido Titusu əwye n ɓo m. Ntulonu ma gna ɓa ami, jesnu ma gwodu lo Makidoninya.

14 Ama mi sa Shekwoyi ami lo, n wo gyilo n əyi abye ciici ngye a wnawnai fyi n Kirisiti nasalagyi əzna nya, jesnu woi zhni apma n yii, yii gná asni adadai myi əwo əye yekpé nya n abahobahoi. 15 Ntuge n Shekwoyi aba, əyi nu zhni Kirisiti anya asnidaí fyi n aza yi atasni, n a gnyi ɓa lo nyi, jesnu ń aza yii aba n ɓa lo ɓai ɓwu nyi. 16 N əzaho aba, asní əfyi nya nu, ama n əzado aba, asní adadai nu n ɓa ɓe n wyewyeyii. Njesnu nyika nu kwnuce lo, n tnutnu ye pya ɓo a? 17 Yi to wulo ngye bəgyé nu m, yi ta kwnú Shekwoyi ɓəda lo ya ɓwa gyiba m. N əkwoɓwi, dna n Kirisiti, yi daɓo zhi n Shekwoyi abye nu, ɓəhnihni nya, ngye aza yi n Shekwoyi nu na tnu n ɓai.