1 Yi la ya yii ci əyihni nu njesnu u? Kwo yi ncei pmalo, ngye shi azaho zhni nyi, ya ɓe fye n paka ɓəgbmi nyai, kwo fya ka ɓəgbmi paka ga yii a? 2 Əfye n əfyehni atukwoi, əfye nu zhni əyi paka, n kafyi n əyi adu, əzahozahoyi kpe əkwo əɓo ye lo jesnu ai ba. 3 Fye kwu wu nge fye zhni paka nu n kwa gbmi n Kirisiti aba, əyi aɓəvyitnutnu gyigyi, n a to ka kwo n nyakanuwna nyai m, ama n Zafnu Shekwoyi wyewyeyida nyai, toge n kakpe n paala akwuta nya m, ama n apaala zanyikwoci adu nya.

4 Yi n myignyi ye pyai lo ntu Kirisiti ɓo nu n Shekwoyi abye. 5 Toge yi kwnuce lo nu n əyihni ɓo, ya gwo nyaho ga əyihni m, ama əyi ɓwaɓye gbmiɓe n Shekwoyi aba nu. 6 Wo kwu yi zhni atnutnuyi aɓwaɓyei n ɓəgbeshi woiwoyi; toge paka nya m, ama Zafnu nya; ntuge paka wu əza nu, ama Zafnu ga wyewyeyi.

7 Nsaiye ngye ɓəvyitnutnu n kwo ɓe n əfyii nyi, n əkwo nyaka ɓə kwnukpe n kwuta paala nyi; ɓə ɓe n latui nu, to Aisrailayi ɓai myi n ɓa shi Mwusa awye znuu, ntu əkwo latu ɓo nyi m; kwo shikwonyi, əsa fyewyi nya nu ɓə ɓwasnu, 8 Zafnu latu nya taa gnadu nu n latu m? 9 Ngye ɓəvyitnutnu n kwo ɓə ɓe n əknyiznui nyi, ɓə n latui, akpəge ɓəvyitnutnu n kwo ɓə ɓe n ɓəfyecezhnii nyi, ɓaa gnadu nu n latu. 10 Ntuge, ənya n kwo ɓe n latui, kwo to ye n latui lo nsaiye m, n a mwi kwo ədo n latu taashnibài m. 11 Ngye ənya duduiya ɓə ɓe n latui, to, a gye ənya n kwo lo nyalonyalo, kwo ɓaa gnadu nu n latu!

12 Ntucenu, shikwonyi yi n awyetu ye pyai lo, yi n agwui myimyiilo dəidəi. 13 Yi to wulo ngye Mwusa nu m, n wo ɓə zhni woi pwi əje n əwo awyeba, nabai to Aisrailayi ɓa myi ɓa shi ənya duduiya zozo awye m. 14 Ama əɓa abwugba ɓa kwu shni, ntuge nya n naiye tukwopwuje yi ye pwu lo, əsa n a ba ɓəgbeshi kwokwoyi ncei. A too kpma kwo ya m, ntuge n ɓwasnu dna n Kirisiti nu n a kpma kwo ya. 15 Kwo nya n naiye, əsa n a ba Mwusa ncei, tukwopwuje ye pwu lo n əɓa adu. 16 Ama əsa n zahozahoyi wa pmyiawye wu Dagayi, tukwopwuje yi kwa kpmaya. 17 Nsaiye Dagayi zhni Zafnu nu, jesnu aba n Zafnu Dagayi nya nyì, loloya lo n ɓo. 18 Nlonu əyi vnyanya n yi to n awyei pwuanya lo nyi m, yi shi Dagayi latu awye, jesnu a shna yi do fyi n əwo dogbe n kwnusnu n latu gnaɓeɓe nyai, n kwo gbmi n Dagayi aba n wo nu zhni Zafnu nyi.