1 Mi n awyetui lo nge fye ɓə ye ɓwa əmi n mii, jesnu n əmi amama ɓəzhnizhni fyewyi. Əə, sukwu, fye ɓwa əmi n mii! 2 Mi dnalo ń shewo ntu n fye ɓo, ń shewo Shekwoyi ədnawo nya pya. Mi la ɓəgbeshi n fyei, ga ənu gbmanyi; ga Kirisiti, nabai ma myi ma ga fye ngye ɓyinyikwoyi kwului tnadodnai n əwo akwnu. 3 Ama ədna wo mi lo nge ngye shi owa ɓə dna Hawawu kwoce n cece nukwoi nyi, əfye abwugba ɓa myi ɓa kwnuya n əfye atukwoga ɓəhnihni ń tnadodna nyai ga Kirisiti. 4 N əzaho wa ɓe wa zhni fye waazi Yeisu ədo nya, gbowo n Yeisui n yi ɓə zhni fye əwo waazi nyi, kwo nge fya gwo zafnu ədo gbowo n Zafnui n fye ɓə shni gwo nyi, kwo nabagyi ədo gbowo n ədoi n fye ɓə kpmi gwo nyi, fyaa kwo gwo ntna ɓədnai.

5 Ama mi ta zhninubwo lo nge mi zhni tnutnuloyi gnagbai nu tu n "atnutnuloyi ayaakwoda aba m." 6 Kwo shikwonyi nge, mi too gwo nyawu ɓədakpeda nya m, ama mi n ɓəyekpei lo. Yi kwu dəye wu fye pəipəi jesnu n nunui n zokwo dəhodəhoi.

7 Kwo ɓə zhni leifyi nu n əmi aba, əsa n mi ɓə gba əmihni tukwo, nabai ma la fye tu, mii zhni fye waazi Shekwoyi nabagyi manai nya, adaada? 8 Mi ɓə la anyafna aikilisiya aje, mii gwo bmazhni nɓa, nabai ma myi ma zhni fye tnutnu. 9 Njesnu əsa n mi ɓə kwnudna n fyei nyi, kwo mi ɓə n nyaho ɓei pma, mi to ɓə zhni akaya nu tu zahozahoyi m, ntuge əmiaje n ɓa ɓə kwnu n Makidoninya nyi, ɓa ɓə kwu anyaga mi, n mi ɓə n ɓa aɓoi pma. Mi to ɓə ye ma zè akaya tu fye n zokwo ho m, jesnu mi ɓə ye gwodu ma zhni nlonu. 10 Ɓəhnihni ngye shi gaiciyanunui Kirisiti nya ye shnidnadna lo n mi, zaho too lo n Akaiya əknyi n wo ɓa kpma mi əgbegyi ye m. 11 Ntu knyiɓei yi a? Ntuge mi ta ye fye lo m? Shekwoyi kpəlo nge mi ye fye lo!

12 Nlonu n mi ɓa gwodu ma zhni əɓo n mi zhni nyi, nabai ma znu aza yi knyi n ɓa ye a kwu ɓa kwudo nsnu dəidəi n yii n aɓoi n ɓa gyigbe n ɓai nyi.

13 Ntuge aza yi pya zhni atnutnuloyi katai nu, atnutnuloyi akwocednai ɓai pmyi əɓahni bma ɓai wu ngye atnutnuloyi Kirisiti nya. 14 Njesnu kwo to zhni əɓo wowoi nu m, ntuge Shetam n əwohni wo zhni wa pmyi əwohni bma wa wu ngye maləka bwuznagna nya. 15 Ntulonu, kwo to zhni əɓo wowoi nu, nge əwo afyenu zhni ɓa pmyi ɓahni bma ngye atnutnui ɓəfyece nya m. Əɓa azozhiba ɓə wu ngye shi əɓa tnutnu gwo ɓa ɓwa əkwo gyiba nu.

16 Mi je ɓəda lo: zahozahoyi to la mi zè mama m. Ama n fye zhni lonu, akpəge fye la mi gwo n ɓwasnu shi fye ɓa gwo mama nyi, nabai n mi ɓa gyigbe fyewyi. 17 Dna n nayi-agwumyignyi əgbegyi nya ye, mi ta daɓo ngye shi Dagayi ɓa da nu m, ama ngye mama. 18 Shikwonyi bəgye gyigbe lo shi anyìda gyi nu nyi, əmihni ce ɓa gyigbe. 19 Fye ɓə la amama gwo fyi n agbmadai, shikwonyi fye gye nge fye cecei lo! 20 Ɓəhnihni, fye zhni lo fyaa zahozahoyi gwo n wo dna fye n fyenu tnutnu, kwo n wo gwo fye anya, kwo n wo gyi fye fyi, kwo wo la əwohni wu, kwo n wo ce fye pmi n awyeba. 21 Dna n əmi vnyinkwo, mi la ye nge yi to ɓə n akalái fyi ntu nce m!

Ənya n əzahozahoyi ncei pma wa gyigbe ntu kwo ɓo; mi daɓo ngye mama nu, mihni ncei pmalo ma gyigbe tu n ɓa. 22 Ɓa zhni Aibraniyi nu u? Nlonu əmihni ce. Ɓa zhni Aisrailayi nu u? Nlonu əmihni ce. Ɓa zhni Ibrahim ayawyi nu u? Nlonu əmihni ce. 23 Ɓa zhni Kirisiti atnutnui nu u? (Mi la gbmi n əmi ací nu mii daɓo n lai.) Mi du ɓa lo. Mi kwu tnutnu gnazhni n du ɓa, mi la lo zhalu n aɓwai mwa bəgyé, a kwu mi lu n gnadu n əwyei bmyibmyi, jesnu maa wo vyivyiwyi n əfyii n aɓwai mwa bəgyé. 24 Aɓwa ngwnu-atnu, Ayahudiyi ɓa zo mi knalufnyi aɓwa shiita-ceiciwagbmanyi. 25 Aɓwa ngwnu-ata a lu mi n asnuknai, znugbmanyi a knyi mi akwuta, aɓwa ngwnu-ata əya nuwnanya kwa vyiya n mii dná, nya wyizo ɓwugyi ɓədo n əkwo sukwoi tu n shikwo. 26 N əsahosahoi, mi tu lo n əzna. Mi ɓə dna n azhnìgye əlà nya, azhnìgye avyì nya, azhnìgye əmi aknyida nya, azhnìgye Abyedo nya, azhnìgye zhiyaakwo nya, azhnìgye əzhi nya, azhnìgye tu n shikwo, jesnu n azhnìgye avyiyi akatá nyai. 27 Mi kwu tnutnu zhni dna n azhnìgye jesnu mii lo əzna ciici n tna əgyewna, mi kpe myikwnu ye lo, n nuwna myikwnui jesnu mii zna ciici ntna nyagyi, əse ɓə kwu fu mi jesnu maa gnyi n ɓwotoloyii. 28 N dəye avnu vnyanya, mii ɓwa nayi-nagwnu fyegyifyegyi tu n əmi aɓəsna ɓo ntu n aikilisiya ɓo vnyanya. 29 Nyika nu gbakála lo to ma wo akalágbagba maa? Nyika nu lodna n leifyi jesnu too əkwo əná kwa gyi mi n əmi maa?

30 Ngye kwo zhni ɓəshishi nu ma gyigbe, mi ɓa gyigbe n aɓoi nu n ɓa wu əmi akalágba. 31 Shekwoyi n Dada Dagayi Yeisu nyai, n a ɓa ci wo nyalonyalo nyi, wo kpəlo nge mi ta ceakata nu m. 32 Dna n Damaskwos n Əsu Aretas əbegyi sa, gwomna ɓə zhni Adamaskwoyi ɓa gwu əzhiyaakwo nabai nge a wna mi. 33 Ama a ɓə la mi dna n cekwnu a gbmiya n mii n wyegye gəlu nya jesnu ma fyaya n əwo akwnu.