1 Ntuge yi kpəlo nge anyì lubwi, n yi fyi n kwo nyi, n kwa laya, yi n nyakwnui lo n kwo gbmi n Shekwoyi aba, pwuwa nyalonyalo nya n əshemi, n a to mi kwo n zanyikwoci aɓwai nu m. 2 Nsaiye, yi domì lo jesnu n awyekwoyi ge a kpe yi əshemi aje, 3 ntuge ń yi n ajekpei kpəlo, a taa je yi wyegye n zhi n aɓwotoloi m. 4 Ntuge əsa n yi fyilo n lubwi ye, yi fyilo n kwo yii domì nu, dna n azhnìgye n bwugba shnawoi, ntuge yi to ncei pmalo ya kwu zhi ntna ajekpe kpei m; ama a kwu aje əshemi nya kpe yi, nabai n wyewyeyi ɓa kwu ənya n kwo zhni nayifyifyii nya myi. 5 Nsaiye əza n wa zhni yi ntu ɓəye ɓo nyi, Shekwoyi nu, n wo la Zafnu ga yi, ətasaya nya, ntu n əɓownashi ɓo n kwo ye ɓeɓelo.

6 Ntucenu, yi n agwui myimyiilo n əsahosahoi, jesnu yi kpəlo nge, əsa n yi ye ɓwa fyilo n nayi pwuwa nu, yi taya lo nu n Dagayii. 7 Ntuge yi gyianyì dna n gaiciyaganunui nu: toge n anyai n yi gyewye nyi m. 8 Mi gna fye, yi n agwui myimyiilo, jesnu yi ɓa gnaye, yaa kwnuya n nayi jesnu ya kwu fyi n apyi kwnusnu n Dagayii. 9 Ntulonu, yi la kwo zè əyi ɓəmwi ya zhni əɓo n kwo da wo, kwo yii fyi n apyi n nayi, kwo yii la kwnuya n kwo. 10 Ɓəshishi nu ge əyi vnyanya ɓə yezhi n Kirisiti owada shnikpegye abye, nabai zahozahoyi n yi, wo ɓə gwo ənya n kwo zhni əwo nya, ntu anya ɓo n əza ɓə kwu zhni woi ye dna n nayi; kwo manai nu kwo nukwoi.

11 Ntucenu, she yi kpe Shekwoyi ədnawo ɓo əye lo nyi, yi zhni lo shi yi ɓa myi ya tna azaje aɓwa nabai ɓa kpe kwo əye nlonu ce. Njesnu ɓa vyi əkwo ɓəvyitnutnu cewo. Ama Shekwoyi kpe ɓəhoɓəhoi əye lo tu ń yi tukwo pəipəi, jesnu mi awyetui lo nge kwo wulo pəipəi n əfye atukwovnyi cè. 12 Yi ta ye ya ci əyihni nu n əfye aba m, ama yi ga fye aba n fye ɓa gbma n yii, nabai n fye ɓa myi fya fyi aza yi aɓəgbe n ɓa gbma n anyai n a gyewye nyi, a fa ənya n kwo dna n ədu nyi. 13 Ngye yi la kwnuya n əyi ací, shi azaho da lo nyi, a gye ntu Shekwoyi ɓo nu; ngye yi ye fyilo n əyihni ací; a gye ntu əfye ɓo nu. 14 Ntuge yeye Kirisiti nya gyitu lo n əyi, ntuge kwo ǹ yii kwnuawye lo nge zaknayi ɓə la fyí ntu aza vnyanya ɓo, jesnu ntucenu, aza vnyanya ɓə kwu fyí. 15 Njesnu waa fyí ntu aza vnyanya ɓo, nabai nge aza yi n ɓa n wyewyeyi lo, to ɓa ye gyianyì ntu əɓahni ɓo m, ama ntu n əwo ɓo n wo ɓə fyí n əɓa ɓo jesnu aa wo lakala nyi.

16 Ntulonu ənya n kwo lakala nsaiye, kwoi lo nabyei, yi to ye gye zahozahoyi lo n anyì awyei m. Kwo shikwonyi yi ɓə kwu Kirisiti shiawye n zokwo ye, yi to ye zhni lo nlonu m. 17 Ntucenu, ngye zahozahoyi dnalo n Kirisiti, shnazhni woiwoyi n la ɓe, aɓo akwokwoyi ɓa la duya aɓo awoiwoyi n kwu ɓe! 18 Aɓo ye vnyanya ɓa kwnu n Shekwoyi nu, n wo lá əwohni aɓəwnazhi n yii dna n Kirisiti nyi, jesnu waa ga yi ɓəvyitnutnu aɓəwnazhi nya nyi. 19 Nge Shekwoyi ɓə gnyi woi ye anyì ɓədo əwohni nu dna n Kirisiti, toge woi ba aza aleifyi kpe ɓa m. Njesnu wo lá ɓəvyitnutnu aɓəwnazhi nya fnyi yi aɓwa. 20 Ntulonu, yi zhni Kirisiti atnutnuloyi nu, ngye Shekwoyi gnyi woi zhni apma n yi, woi tna aza əɓwa nabai ɓa kwu zè əwo anugwnudo. Yi tna fye əɓwa lo ntu Yeisu ɓo: Fye kwu yeɓədo n Shekwoyii. 21 Shekwoyi ɓə zhni əza n wo to ɓə n abwi m, waa wo zè abwida ntu n əyi ɓo, nabai ge dna n wo yi ɓa kwu zè aɓəfyeceyi Shekwoyi nya.