1 Kwo zhni ɓəshishi nu ma gyiabye mii gyigbe. Kwo shikwonyi gyiba to lo n əza ɓa ɓwa m, mi ɓa gwodu ma da ɓəwyegye ɓədo n aɓəkpmiyawui n ɓa kwnu n Dagayi aba nyi. 2 Mi kpe əzaho ye lo dna n Kirisiti, n aye ngwnu awoceanyi n ɓa la duya nyi, n a ɓə la wo lagwnu lo ncei n əshemi taayi. Kwo, ce ɓə zhni lonu dna n nayi nu kwo toge dna n nayi nu m, mi ta kpəlo m; Shekwoyi nu kpəlo. 3 Njesnu mi kpəlo nge əza ye; kwo dna n nayi kwo toge dna n nayi m, mi ta kpəlo m, ama Shekwoyi nu kpəlo; 4 Wa gwnulo paradisi Shekwoyi aza nya, wa wo aɓo n a taa shnida m, aɓo n a taa ye əza wa da m. 5 Mi ɓa gyigbe ntu əza ye pya ɓo nu, ama mi taa gyigbe ntu əmihni ɓo m, akpəge ntu əmi akalágbagba ɓo. 6 Kwo ngye mi ɓə ɓa knyi nge ma gyigbe, mi taa zè mama m, ntuge gaiciyanunui nu n mi ɓa da. Ama mi la fa, nabai n əzaho ta zhni əmi nubwo n du əɓo n mi zhni, kwo n mi da, 7 kwo ntu n aɓəkpeyawu ayaakwo adudui ye ɓo m. Ntucenu, nabai to ma mwa əmihni tukwo m; a ɓə la kalágba ga mi dna n nayi, n əkwo nu zhni knawui n əmi nayi nyi, Shetam tnutnudayi; kwoi gna mi gnagna, kwoi wu mi anyì. 8 Aɓwa ngwnu-ata, mii gyi Dagayi əwye nge wo la kwo gbmiya n mi. 9 Ama wa gna mi, "Əmi shebmyashi n hoi kwnukwnui lo, ntuge əmi kalá zhni kwa zè nunui dna n kalágbagba nu." Ntucenu mi ɓa gna əgbegyigyi nu n agbmadai ntu əmi akalágbagba ɓo, nabai n Kirisiti kalá ɓa ya tu n mi. 10 Cenuzhni, ntu Kirisiti ɓo, mi dagbma dna akalágbagba, n akpmiknyi, dna n azhnìgye, dna n awyesnugbegye ɓo, dna n aɓəsnu. Ntuge she mi dna n akalágba, n əsayii nu n mi ɓwa akalá.

11 Mi la əmihni zè mama, ama əfye nu na dna mi nce. Fye ɓo kwnuce fya ci mi, ntuge mi to zhni tnutnuloyi gnagbai nu n "atnutnuloyi gnatutui" aba m, kwo shikwonyi mi to zhni nyaho nu m. 12 Mi ɓə la əwyepa dna n əfye atasni, mii wu ɓəzhnizhni aznù tnutnuyi gaiciya nya, n aɓo awowoi n aɓo wowoi. 13 Fye ɓə kwu zè gbàgbài n wunanu n aikilisiya aje aba akpe nge she mi to ɓə zè akaya nu tu fye ma? Ntu ɓənukwoi ye ɓo, fye kwu abwizo mi!

14 Nsaiye mi la əmihni ye nabai ma ɓe fye gnaɓyi əɓwa taayi nya, jesnu mi to ɓə la zè akaya tu fye m, ntuge ənya n mi ye nyi, əfye anyaɓwa nu to m, ama əfyehni nu. Nshnisnusnu aɓyi nu taa mwa anya zhi ntu n əɓa azamayi ɓo m, ama azamayi nu ntu n əɓa aɓyi ɓo. 15 Ntulonu mi ɓa wu nyahonyahoi n mi ncei lo ntu fye ɓo n agbmadai, jesnu maa əmihni wuya ɓədo. N mi ye fye lo n mwa, fye ɓa ye mi ciwyi? 16 Kwo nyilo nge, mi too zè akaya tu fye m. Dudulonu, əza cece n mi zhni əkwo nu nyi, mi ɓəə wna fye n əgbái nu! 17 Mi ɓəə la fye gyifyi n əzaho akwnu n aza n mi ɓə tnu fye ncei nyi? 18 Mi ɓə gna Titusu nge wo lo da fye, jesnu ma gna əyi zanugbai do nge wo vyi wo. Titusu ɓə la fye gyifyii? Yi to ɓə zhni əɓo fyi n apita fye gbmanyi n Zafnu gbmanyi nu m?

19 Əyi anugwnudo ayeyei, fye zhninubwo lo nge yi da əyihni əgbe ɓəda nu ga fye? Yi daɓo n Shekwoyi awyeba nu ngye aza n ɓa fyilo n Kirisiti; jesnu nyahonyahoi n yi zhni lo, ntu n fye akalá fyi ɓo nu.

20 Ntuge ədna wo mi lo, nge she mi ɓə ɓe, mi to ɓə snu fye shi mi ncei pmalo ma gye fye n wu m, jesnu fye to ɓə snu mi shi fye ncei pmalo fya gye mi n wu m. Ədna wo mi lo nge kpəsnu a ɓə gye anyàwu, shewo, napye, gnawohni bwugbaɓəye, əyewnuya, agnagba, tukwomwa ɓədo n abagayai. 21 Ədna wo mi lo, nge she mi ɓə ɓe jesnu əmi Shekwoyi ɓə la mi gbà n fye abye, jesnu mii wnubwugba ntu bəgye ɓo n ɓa ɓə kwu leifyi zhni jesnu to ɓai yeabwi cegyetu nya m, asisiɓozhni nya m, ɓədo n shakpenukwoi n ɓa kwu ɓahni ga fyi n ɓa nyi.