1 Nsaiye, əyi azaje azanugbai n anyikwozai, yi ncei pmalo fya kwu kpe shebmyashi əɓo ye n Shekwoyi la ga aikilisiya n Makidoninya. 2 Kwo shikwonyi ɓa ɓə fyi n əsnagyi shnishnii n mwumwu yaakwoi, ɓa ɓə n bwugbabwui nunui kwoi gyiya. Ɓa kwu mwa fyi n nyaga n əɓwai loloiya. 3 Ntulonu mi gbmiɓo lo nge ɓa ɓə kwu anyaga n aɓwai loloiya kwaa du əɓa akalá ya. Jesnu n əɓahni tukwoi, 4 ɓa tna yi əɓwa n əwyei bmyibmyii nge yi ga ɓa əsa ɓa dnaɓwa ń tnutnu ye ga Dagayi aza. 5 Jesnu ɓa zhni n du shi yi ɓə n əwyetu nyi: Ɓa ɓə kpmiya ɓa kwu əɓahni nu ga Dagayi kpa, nlonu, ɓa kwu ɓahni ga əyi ce, ngye shi Shekwoyi ɓəmwi nyi. 6 Ntulonu ya ɓa Titusu ge, shi wo ɓə la ya n kpmisnuyi nyi, nge wo kwu shebmyashi tnutnu ye pwozhni n əfye səpa cè. 7 Ama shikwonyi nge fye gyiabye lo dna n nyahonyahoi zhni nyi: dna n gaiciyaganunui, n ɓədadai, dna ɓəyekpe, dna n wyenyi ɓəhnihni nunui nya jesnu dna n yeyewu n yi la kwo vyaəna dna n fye nyi. Ntulonu, fye kwu zè agnakpezhniyi fyi n shebmyashi nyagaga nya.

8 Mi ta tu fye əgbe nu m, ama mi ye ma mwi əfye yeye ɓəhnihni nya, mii mwukwodo n azaje wyenyi nyai. 9 Ntuge fye kpe shebmyashi əyi Dagayi Yeisu Kirisiti nya ye lo, nge kwo shikwonyi wo ɓə zhni nyaɓwayi nu, dudulonu ntu əfye ɓo, waa zè wyekwoyi, nabai nge dna n əwo əsnagyi nu n fye ɓa kwu zè anyaɓwayi.

10 Njesnu dəye nu zhni əmi owaznuya ntu əɓo n kwo gnabmya lo dna n ɓəye. Ń əye n kwa duya nyi, əfye nu ɓə zhni kpmisnui, toge n ɓwasnu n nyaga m, ama n bwugbadna fya ga bmazhni. 11 Nsaiye, fye pwo tnutnu ye zhni, shi fya ya ɓəzhni n pwawoi dna nyi, nabai n fye ɓa myi fya pwo tnutnuzhni, ngye shi fye n azokwoi lo nsnu. 12 Ngye əɓa ɓəye nu ge ɓa ga, əɓa nyaga zhni gwogwoi nu, shi əza ncei lo, toge ənya n əza to ncei lo m.

13 Əyi ɓəye nu to nge azaje ɓa kwu snu, a ce a gyi əfye nu ce m, ama nabai n a ɓa kwu kwnusnu dəidəi n ajei. 14 N əsa ye, əfye nyaɓwa yaakwo ɓa kwu ɓa kwnu, nabai ge n wyihoi, əɓa nyaɓwa yaakwo ɓə kwu fye ka kwnu ce. Əyi awnagnyiba, əkwo nu ge, ya kwnusnu dəidəi n ajei, 15 ngye shi a cei kakpe lo: "Əza n wo ɓə la yezhi n mwa, wo to ɓə gye kwo n woi duwyi m, jesnu əza n wo ɓə yezhi n ɓwasnu cewyi, wo to ɓə gye kwo n woi gnagbagbai m."

16 Amisa ga Shekwoyi, ń wa dna Titusu əmi bwugba bmazhni nya pya n mi ncei lo ntu fye ɓo nyi. 17 Ntuge Titusu to ɓə ɓwa əyi ɓwatna nu gwogwo m, ama, wo ɓe da fye lo n əwohni ɓəpwawoii jesnu n agbmada yaakwoi. 18 Njesnu yi tnulo n woi n kwnusnu n əyi zadoi n aikilisiya vnyanya ci wo lo ntu əwo tnutnu nabagyi manai nya ɓo nyi. 19 Əɓo n kwo gnami da lo əkwo nu ge, aikilisiya nu ɓə knyí wo wa da yi apye, ya lo n anyagai n a ɓə yezhi nyi, ń yi ɓə ga, nabai ya ga Dagayi əwohni tukwo mwamwa, jesnu ya wu əyi wyenyi bmazhni nya. 20 Yi ye lo ya bwi ɓədada nukwoi əsi tu n nyaga ɓwaloya nya ye, n yi yezhi nyi. 21 Ntuge yi zhni lo pəceye ya zhni ənya n kwo bmya, toge n ɓwasnu n Dagayi awyeba m, ama n zanyikwoci awye cè.

22 Gbowo n dəyei, yi tnu fye lo n əyi zadoi n kwnusnu n ɓai, n wo kwu wohni wu yi n a zokwo gbowogbowo nge wo n əwyenyi lo, jesnu n gna dudu ɓo, ntu n əwo bwugba myignyi yaakwo nya ɓo dna n fye. 23 Ama ntu Titusu ɓo, wo zhni əmi zabaayi nu jesnu tnutnu kwnuzhniyi n əfye atasni; ntu n əyi azaje ɓo, əɓa nu zhni aza n aikilisiya ɓə tnu n ɓai, jesnu n ɓa ɓe Kirisiti n mwamwagai. 24 Ntucenu fye wu aza ye əfye yeye, cenuzhni yii gbma n fyei, nabai n aikilisiya ɓa gye kwo əwye.