1 Kwo to n apmai lo ma kanya ga fye ntu Dagayi aza bmazhni ɓo m. 2 Ntuge mi kpe əfye wyenyizhni əɓo lo ntu bmazhni ɓo, jesnu mii gyigbe lo n kwoi n Amakidoninyayi aba. Mii gna ɓa nge, tunyi ńtná, əfye n fye fyi n Akaiya nyi, fye ɓə n fyehnii yeyei fya ga anya; jesnu əfye bwugbadna ye nla bəgyé kwnu-agyewyi da tnutnu ɓo. 3 Ama mi tnu lo n əyi azajei, nabai n əyi gbegyi da n əfye ɓo tu n ɓəye, to kwo ɓə kwu zè gbəloi m, ama fya kwu zhi n əfyehnii yeyei, ngye shi mi ɓə da nge fye ɓa zhi nyi. 4 Ntuge ń Makidoninyayi ho wa ɓe n kwnusnu mii, to wa gye fye n fyehnii yeyei m, əyi nu n fyei ɓədo, n vnyinkwo ɓə wo yi ntu n əyi agwumyignyi ɓo.

5 Ntulonu ma gye kwo zhni ɓəshishi nu ma tnu n əmi azajei n mi abye ɓa kwu ɓe əfye aba kpa, nabai fya kwu pwo aɓoyezhi ɓo da əfye anyaga n ɓwaloloiyai, n fye ɓəə la əkwo ɓəgbeshi lá nyi. Nlonu n a ɓaa kwo yezhi n zhni nyaga ɓwaloya nya, toge ədo n aga ai ceawyi nyi m.

6 Fye pa dəye ɓo: əzahozahoyi n wa bye fyewyi, wo ɓə do fyewyi ce. Njesnu əzahozahoyi n wa bye n mwa wo ɓə do n mwa ce. 7 Zahozahoyi n fye, wo ga ngye shi əwo ədu ncei ye lo wa ga, toge woi lu əɓwa tnaatna, kwo ngye a yekwo fyi wo m, ntuge Shekwoyi ye əza nu n wo ɓa ga n bwugbai dadayi. 8 Njesnu Shekwoyi ɓa myi wa tu fye anabəlika n mwamwai, nabai n aɓo vnyanya jesnu nsahosahoi, fye ɓa ɓwa nyahonyahoi n fye n əkwo apmai, fye ɓa ɓwa anabəlika dna n tnutnu manai dəhodəhoi. 9 Ngye shi a cei kakpe lo:

"Ɓa la əɓa anyaga gnamyiya n ɓwaloloiyai ga asnayi;

əɓa ɓəfyecezhni kwo myishì lo nyalonyalo."

10 Nsayi, əza n wo ga nyabyeyi nyabye nyi, jesnu biledi nge nyagyi nyi, əwo nu ɓa ɓe fye anya ce, jesnu wa ɓe nyabye n əfye adobwi, jesnu wa zhni əfye ɓəfyecezhni nyayezhi nya kwa mwapata. 11 Fye ɓa kwu zè anyaɓwai n zokwo dəhodəhoi nabai n fye ɓa myi fya loɓwaya dna n ɓəhoɓəhoi zhni, jesnu ntu əyi ɓo, əfye ɓwaloloiya ɓa ɓe n amisagagai n Shekwoyi aba.

12 Tnutnu ye n fye zhni nyi, kwo ta ɓwa Shekwoyi aza nu nyaga n ɓa n əɓa apmai m, ama kwo gyiya lo kwoi vyi azokwo gbowogbowo, kwoi zhni ai sa Shekwoyi ami. 13 Ntu tnutnu ye ɓo, n fye la fyehni kwnuwu nyi, azaje ɓa ci Shekwoyi ntu əfye ɓədaɓəvyi ɓo, n kwo vyi əfye nabagyi manaida Kirisiti nya nyi, jesnu ntu əfye nyagná n ɓwaloloiya ɓo ga ɓa jesnu ɓədo n zahozahoyi. 14 Nlonu, dna n əɓa aduwazhni ga fye, əɓa bwugba ɓa lo da fye ntu shebmyashi dudui ɓo n Shekwoyi la ga fye nyi. 15 Amisa ga Shekwoyi ntu əwo nyaga ɓo, n a taa myi n əkwo tnuya nyi m!