1 Dəye nu ɓa zhni əmi gnaɓyi əɓwa taayi nya n əfye aba. "Ɓəshishi nu ɓəhoɓəhoi kwa wna tukwo n aɓəkwnuyii ngwnu-aba kwo ngwnu-ata." 2 Əsa n mi ɓə kwnusnu n fyei əɓwa baayi nyi, mi ɓə la ɓəye pma fye kwnù. Nsaiye mi je kwo da lo, to mii gnyi m: She mi ɓə jezeɓe, mi to ɓə fa aza yi n ɓa ɓə kwu aleifyizhni n sapai nyi kwo azaje m, 3 shikwonyi fye zna ɓəgbmi shnilo nge Kirisiti nu daɓo dna ń mii. Wo to gbakalá lo n əwo aɓəzhni n fyei m, ama wo n kalái lo dna n əfye atasni. 4 Nabai a kwu kpəge ɓəhnihni nu, a ɓə la wo znudu dna n kalágba, dudulonu wo n wyewyeyi lo n Shekwoyi kalái. Nlonu cè, yi fyilo n kalágbagbai n wo, dudulonu n Shekwoyi kalái yi ɓa gyianyì n kwnusnu n woi fyi n əyi tnutnuzhni, n kwnusnu n fyei.

5 Fye pmi əfyehni, fya gye kwo fye ye fyilo n əfye gaiciyaganunui; fye mwi əfyehni. Fye n kwo əɓoi wnashi lo nge Kirisiti Yeisu dnalo n əfyehni mii? N fye ta kpəlo m, agye fye to gyi mwumwu ye m. 6 Njesnu mi n gaiciyai ga lo ge fye ɓa kpeye nge yi too myiya n əyi mwumwu m. 7 Nsaiye yi zhniaduwa ga Shekwoyi lo, nge fye to zhni ɓəhoɓəhoi n kwo to bmyalo m; toge nabai aza ɓa gye nge yi la kwnuzhi n mwumwu nu m, ama nabai fya zhni əɓo n kwo bmya, kwo kwoi wu ngye yi ɓə la myiya. 8 Ntuge yi taa zhni ɓəhoɓəhoi n kwo gnyiapaapa n gaiciyanunui m, ama n ɓwasnu ntu gaiciyanunui ɓo. 9 Yi nya agbmada nsahosahoi n yi fyi n akalágba ama əfyehni da fye n akalái fyilo; jesnu əyi aduwazhni nu nge fya kwu je anunui zè. 10 Dəye nu zhni mii ka aɓo ye ga fye, she mi to gnyilo nyi m, nabai nge she mi ɓə ɓe, mi to ɓə zhni apma n ikwoi dna n minagyi m; ikwo n Dagayi la ga mi nyi, ntu n fye mimi ɓo nu, toge n əfye myimyiya ɓo m.

11 N kpmasnu, əmiaje azanugbai n anyikwozai, fye zhni bwugbabwui! Fye yì fyehni fya kwu zè anunui, fye ga aje bwugbamyizhi, fye kwu zhi n bwugbai gbmanyi, fye kwu zhi n bwugbafui. Njesnu Shekwoyi yeyeda n bwugbafui wo ɓa kwnusnu n fyei.

12 Fye ɓyi aje əgna n ɓwadodna gyigyiyii.

13 Shekwoyi aza n ya vnyanya ɓa tnu fye lo n əɓa gnaɓyii.

14 Fa shebmyashi Dagayi Yeisu Kirisiti nya, n yeye Shekwoyi nyai, n jedoɓəzhni Zafnu Gyigyiyi nyai ɓa kwnusnu n əfyei vnyanya.