1 Bwulus, Kirisiti Yeisu tnutnuyi, n a ɓə yi wo, nabai waa zhni tnutnuloyi jesnu n knyignyi ntu Shekwoyi nabagyi manai ɓo; 2 nabagyi manai n Shekwoyi ɓə la əkwo ɓəgbeshi tunyi n sapa nyi, kwo ɓə kwnu ń əwo sheaɓəgwognayi agbe nu, dna ń Nyakazhi Gyigyiyi. 3 Nabagyi manai ye ntu əwo Nugwnu ɓo nu, əza ń a ɓə ma wo vyi zanyikwoci ofye, wo ɓə zhni Dawuda yawyi nu, 4 ama dna ń gyigyi əfye Zafnu nya, a ɓə la wo knyignyi Shekwoyi Nugwnu dna n kalá əwo kalala nya n əfyi: Yeisu Kirisiti əyi Dagayi. 5 Dna n əwo nu, ń yi la shebmyashi gwo ɓədo ń atnutnuloyi-zhnizhnii, nabai ya yi Abyedo vnyanya ɓa vyi gbetu n kwo gbmiɓe n gaiciyaganunui ntu əwo əye ɓo. 6 Əfyehni ce fye fyilo ń Abyedo, ń a la ɓa yi ge ɓa kwu zhni Yeisu Kirisiti anya nyi.

7 Nyakashi ye, kwo lo da aza nu vnyanya n ɓa fyilo ń Roma, ń Shekwoyi ye ɓa lo jesnu n a la ɓa yi ɓa kwu zè əwo aza agyigyiyi.

Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.

8 Kpmisnui, mi sa Shekwoyi ami lo dna n Yeisu Kirisiti ntu əfye ɓo vnyanya, ntuge a da əfye gaiciyaganunui əɓo lo vnyanya fyi ń anyì. 9 Shekwoyi, ń mi zhni əwo tnutnu dna ń əmi zafnu dna n waazizhni, əwo Nugwnu nabagyi manai nya. Əwo nu zhni əmi ɓəgbmiyi, she mi pá əfye ɓo lo ciici 10 dna ń əmi aduwazhni nsahosahoi vnyanya. Mi zhniaduwa lo ge nsaiye n kpmasnu dna ń Shekwoyi ɓəye, ń zokwo ɓa gwuya ga mi ma ɓe əfye aba.

11 A wo mi əpwa lo nge ma ɓe əfye aba ma gye fye əwye nabai ma ga fye zafnu anyaga ho, fya ɓwa kalá; 12 əkwo nu nyi nge, əfye ɓədo əmii, ń yi ɓa myiaje gaiciyaganunui zhi n kwnusnu. 13 Əmi azaje, azanugbai n anyikwozai, mi to ncei pmalo fya kwu zhi n ɓəyeɓwui m, ntuge mi ɓə la əmihni ye aɓwa bəgyé ma ɓe əfye aba (ama to ai ye mi ge mi ɓe m, nya nsaiye) nabai n mi ɓa myi ma ɓwa avyiyi aje fyi n əfye aza cè, n ɓwasnu she mi kwu ɓwa fyi n Abyedo aje nyi.

14 Kwo n mii zhni ɓəshishi nu n Agirikiyi aba ɓədo ntna Agirikiyii, jesnu ń aza acecei aba n amamai. 15 Cenuzhni minyi nunui gnyi n əpwawoi ma zhni nabagyi manai waazi ga əfye ce, ń fye fyi ń Roma nyi.

16 Nabagyi manai vnyinkwo ta wo mi lo m, ntuge əkwo nu zhni Shekwoyi kalá n kwo ɓe n gnyignyii n zahozahoyi aba n wo ga gaiciya: kpmisnui n Yahudiyi aba, nlonu lo da Abyedo. 17 Ntuge dna ń nabagyi manai nu ń a la Shekwoyi ɓəfyecezhni kpeyawu; ɓəfyecezhni ń a zhni kwo dna ń gaiciyaganunui, n kwo ya n kpmisnui kwoi lo kpmasnui, n ɓwasnu she a ncei kafyilo: "Ɓəfyecezhniyi ɓa gyianyì n gaiciyaganunui."

18 Shekwoyi minagyi napyei gnyilo kwoi kpeyawu ɓe ń əshemi tu aza atnashekwoyi adnawoi tukwo ɓədo ǹ akpízhniyii vnyanya ń ɓa ce gaiciyanunui aɓwaya ntu əɓa kpízhni ɓo. 19 Shikwonyi əɓo ń a ɓa myi a kpeye ntu Shekwoyi ɓo, kwo wulo pəipəi ń əɓa aba, ntuge Shekwoyi wo kwu kwo wu ɓa pəipəi. 20 Ntuge tunyi n anyì zhnizhni əsa, Shekwoyi alu manai ń a ta gye ɓa awye nyi m; əwo kalá nyalonyalo nya, n əwo alu ikwo vnyanya nyai; a kwu ɓa gyewye pəipəi, jesnu ai ɓwa əɓa awyega ń anya ń a kwu zhni nyi, ntulonu aza to n aɓoɓwashi lo m.

21 Ntuge kwo shikwonyi ɓa ɓə kpe Shekwoyi əye, ɓa to ɓə la wo tu ngye Shekwoyi kwo ɓa sa wo ami m, ama əɓa aɓənubwozhni ɓa kwu gbmiaje jesnu əɓa amama abwugba ɓa kwu fyi wyegbma. 22 Kwo shikwonyi ɓa ɓə yi ɓahni ge ɓa cecei lo, ɓa kwu zè amama. 23 Jesnu ɓa shna Shekwoyi latu do n anyadogbei ń a ɓə zhni ɓa n wu ngye zanyikwoci n wo fyí nyi, n alui, ń anyafwanyai jesnu ń anyai n ɓa kwó n nubwoi nyi.

24 Ntucenu Shekwoyi wa kwu əɓa aleifyi ɓəpwawo, ajewna tnagyii nya, fa fyi ń əɓa adu, ntu əɓa anayi àɓyii-kwnuya əɓo n ajei. 25 Ɓa shna Shekwoyi gaiciyanunui ədo n akatái, jesnu ɓa ga anya azhnizhniyi mwamwa, ɓa zhni ɓa tnutnu, ɓa fa Shekwoyi anya vnyanya zhniyi, əwo nu n a ci wo nyalonyalo nyi. Amyi.

26 Ntu dəye ɓo, Shekwoyi wa kwu ɓa ga fyi n gyewna pwawo avnyinkwo nya. Kwo əɓa anyikwo ɓa shna gyewna ofye do ń adoi ń ɓa to fyilo n ofye m. 27 Ń ɓwajesnu lonu, azanugbai ce, ɓa kwu fa gyewna ɓo n anyikwozai dna ń ofye, ɓa kwu nú zhi n gyewna pwawoi n azanugbai ajei. Azanugbai ɓa zhni avnyinkwo aɓo n azanugbai ajei. Cenu ɓə zhni ɓa gwo tata n kwo ɓə gwogwo n ɓai ntu əɓa abaɓwi ɓo.

28 Tu n dəye əshe, n ɓwasnu shi ɓa to ɓə gye kwo kwnuce lo ɓa kwu Shekwoyi yekpé wnafyi m, ntulonu Shekwoyi wa kwu ɓa fa fyi ń bwugba ajegbmii, nabai ɓa zhni əɓo n kwo to gwo ɓa zhni m. 29 Ɓa kwu nu zhi n əkpizhni dəhodəhoi, n əɓo nukwoi, n fnanai ɓədo n ajegbmii. Ɓa nunui lo n shewoi, zawu, anyàwu, kwocedna, ɓədo n aɓəshinmì n ajei ń bwugba. Ɓa zhni aɓəshnayi nu, 30 agnagbazhniyi, Shekwoyi anuwnuyi, asnusnuikpe, atukwognanakwoi jesnu agbegyiyi; ɓai kpe azokwo awoiwoyi aɓo nukwoi zhni nya; ɓai znu əɓa azamayi ɓəgbetu gna; 31 ɓa to n gənyikpei lo m, gbenu to lo m, yeye to lo m, snusnugye to lo m. 32 Kwo shikwonyi ɓa kpe Shekwoyi gbetu ɓəfyece nya əye lo, nge aza yi ń ɓa zhni aɓo ye ɓa gwo ɓa fyí, ɓa ta ɓwa gwogwodu nu n aɓo ye zhnii m, ama ɓai tuɓwa, n aɓo n aza yi zhni nyi.