1 Əyi ń yi n gaiciyanunui lo n dnakalá nyi, kwo gwo ya ɓwabwugba n azai ń ɓa to ncei lo n dnakalá m, jesnu to ya zna əyihni ɓəgbmada nu shni m. 2 Zahozahoyi ń əyi, wo zhni əɓo ń kwo ɓa da əyi akwnuzhiyi ntu n əkwo apma ɓo; nabai ya mi ɓa, ɓa mwa. 3 Kwo Kirisiti n əwohni, wo to ɓə zhni əɓo nu ń kwo da wo m, ama ngye shi kwo kafyilo, "Aza yi akpmiknyi, n ɓa knyi ho nyi, ɓa la kaya kpe ń mi." 4 Ntuge nyahonyahoi ń a ɓə ncei kashi n sapa, kwo ɓə kakpe ntu əyi nyawu əɓo nu. Nabai dna n bwugbaɓwa n əkwo nyawui fyi n Anyakagyigyiyi, jesnu n bwugbakaládnai n kwo ga nyi, n yi ɓa myi ya ɓwa awyetu.

5 Fa Shekwoyi n wo ga bwugbaɓwa n bwugbakaládnai nyi, wa ga fye bwugbadna gbmanyigbmanyi ntu n aje ɓo, ədo pya n Kirisiti Yeisu ɓə ncei nyi, 6 nabai n bwugbai gbmanyi, jesnu n bəgyei gbmanyi, n fye ɓa myi fya ga Shekwoyi latu n Dadai, əyi Dagayi Yeisu Kirisiti nya.

7 Nlonu, fye gwo aje aɓwa-aba-aba, n ɓwasnu shi Kirisiti ɓə gwo fye nyi, nabai kwa ɓe Shekwoyi n cicii. 8 Ntuge əmi nu gna fye nge, Kirisiti wo la zè Ayahudiyi tnutnuyi n Shekwoyi gaiciyanunui apita, nabai aɓəgbezhi n a ɓə zhi əyi adada-azakwoi nyi, ń a ɓaa kwu ɓa wnashi, 9 jesnu ntuge, nabai n Abyedo ɓa myi ɓa ga Shekwoyi latu ntu əwo snusnugye ɓo. Ngye shi a ncei kafyilo:

"Ntucenu mi ɓa ci ho dna ń Abyedo atasni;

Mi ɓa kwoanyi əho əye cici nya."

10 Njesnu, kwo gna lo,

"Əfye Abyedo fye nya agbmada ɓədo n

əwo azai."

11 Njesnu,

"Fye ci Dagayi, əfye Abyedo vnyanya;

fa aza vnyanya ɓa kwoanyi cici nya ga wo."

12 Njesnu, Ishaya gna lo,

"Jesse gbegye ɓə gbmiwye,

əza n wo ɓə laka gnyi woi gyibe tu n abye;

dna n əwo nu n Abyedo ɓə tuwye."

13 Fa Shekwoyi awyetu ɓa nu fye n agbmadai vnyanya ɓədo n bwugbafui shi fye kpema n wo,

nabai ń fye ɓa nu fyei gyiya n awyetui

dna n kalá Zafnu Gyigyiyi nya.

14 Əmi n əmihni, kwo la mi kwnuawye, əmi azaje n amapwuyii, nge əfye, n əfyehni tukwo, fye nunui lo n əɓo manai, n nunui n ɓəyekpei jesnu n kwnuce fya ga aje gbega. 15 Dudulonu mi kwu ənya ka ga fye n əgbei myimyii dəidəi kpe n aɓəho ntuge ma je fye əɓa ɓəpá njesnu, ntu shebmyashi ɓo n Shekwoyi ɓə ga mi nyi 16 maa zè Kirisiti Yeisu tnutnuyi ga Abyedo. Wa ga mi pirisiti tnutnu, ma zhni Shekwoyi nabagyi manai waazi, nabai n Abyedo ɓa myi ɓa kwu zè nyaga gwogwoyi ń Shekwoyi aba, ń pmyapmyai n Zafnu Gyigyiyii.

17 Ntucenu mi gbma lo dna ń Kirisiti Yeisu dna ń əmi tnutnuzhni ga Shekwoyi. 18 Mi taa ye ma daɓo tu n ɓəhoɓəhoi m, akpəge tu n əɓo ń Kirisiti wo kwu zozhni dna ń mi, kwoi zhni Abyedo ɓai vyi Shekwoyi ɓəgbetu ntu əɓo ɓo n mi kwu da jesnu mi kwu zhni; 19 dna n kalá aznù wu nya n aɓoawowoi, dna n kalá Shekwoyi Zafnu nya. Ntulonu ənya n kwo laka n Urishelima n kwo lo kwoi shegwnu laɓa n Ilirukwum nyi, mi kwu Kirisiti nabagyi manai waazizhni n nunui. 20 Əmi ɓəmwi nu ciici ma zhni waazi nabagyi manai nya n aba n a to ɓə shni Kirisiti yekpé m, nabai ń mi taa gnyi mii mi ənya tu ń zado shnipa m. 21 N kwa cecelonu, ngye shi kwo kafyilo:

"Aza yi ń a to ɓə gna ɓa əwo ɓo nyi m, ɓa ɓə gyewye

jesnu aza yi n ɓa to ɓə wo m, ɓa ɓə ɓwa awyega."

22 Ciici əɓo ye nu kpma mi əfye aba ɓeɓe.

23 Ama nsaiye, she aba to yee lo ntuge ma zhni tnutnu n əknyisəpa ye nyi m, jesnu shikwonyi mi kwu aye bəgyé ɓwa awyeikwo mi ma ɓe fye gnaɓyi. 24 Mi n ɓəyei mwushi lo mii zhni lonu əsa n mi ɓə lo Asbaniya nyi. Mi n awyetui lo mii gye fye əwye əsa ń mi ɓə duya ncei n əfye aba jesnu fyei bma mi zhni n əmi znazna, mii kwu agbmada wo əmi dnadna nya n fyei əsa fyewyi. 25 Dudulonu nsaiye, mi la gbmidna n zokwo mii lo Urishelima mii zhni Dagayi aza tnutnu ń abaayi. 26 Ntuge Makidoninya n Akaiyai ɓə kwu agbmada wu, əsa n ɓa ɓə ga bmazhni ntu n Dagayi aza awyekwoyi ɓo n ɓa fyi n Urishelima nyi. 27 A ɓə kwu ɓa da ɓa zhni kwo, jesnu ɓəhnihni ɓa n əkwo ətai shi ɓa lo. Ntuge ngye Abyedo ɓa kwu Ayahudiyi zafnu anabəlika ɓwa dna n əɓa ɓwa, a gye ɓa n ətai shi Ayahudiyi lo, ɓa gná əɓa anyaɓwa anyashishi nya n kwnusnu n ɓai. 28 Ntulonu shi mi ɓə lá pwo əmi tnutnu ye, jesnu mii gye nge ɓa la anyakwnukwnu ye gwo, mi ɓəə lo Asbaniya, mii bmá ma ɓe fye gnaɓyi. 29 Mi kpəlo nge she mi ɓə ɓe da fye, mi ɓə ɓe n Kirisiti anabəlika mwumwui nu n nunui.

30 Mi gyi fye əwye, əmi azaje n əmi amapwii, dna n əyi Dagayi Yeisu Kirisiti ɓədo n yeye Zafnu nyai, nge fye dnaɓwado n mii, dna n əmi snunutú, fyei zhniaduwa ga Shekwoyi ntu əmi ɓo. 31 Fye zhniaduwa ga Shekwoyi nge mi ɓaa pwo n Yahudiya atnavyiyi akwnu, njesnu nge anyakwnukwnu n mi ɓə lo ncei n Urishelima nyi, nge Dagayi aza ɓə gwo ɓa n agbmadai, 32 nabai n mi ɓə ɓe əfye aba n agbmadai dna ń Shekwoyi ɓəmwi, jesnu n dna əfye gwodo n fye ɓa ɓwa zhishni. 33 Shekwoyi n wo ga bwugbafu nyi, wo kwnusnu n fyei, əfye vnyanya. Amyi.