1 To, nsaiye, yi ɓa da dəye nge nanu a? Yi ɓa gwodu n aleifyizhnii nu nabai Shekwoyi shebmyashi kwa gna mwamwa a? 2 Kwo fyewyi! Əyi ń yi ɓə kwu fyí fyi n leifyizhni; kwo ɓa yezhni n wuna ya gwodu dna n anyìgyi leifyizhni nya a? 3 Kwo fye ta kpəlo nge əyi vnyanya ń a ɓə zhni yi batizima fyi ń Kirisiti Yeisu nyi, nge a ɓə zhni yi batizima fyi n əwo əfyi nu m? 4 Ntucenu, a ɓə kwu yi kwnubyi n woi dna ń batizima lo əfyi, nabai n ɓwasnu ngye she a ɓə lá Kirisiti kala ń əfyi dna ń latu Dada nya nyi, əyihni ce ń yi ɓa myi ya gyianyì wyewyeyi woiwoyi nya.

5 Ntuge ngye a ɓə la yi kwnuyeɓədo n woi dna n əwo əfyi nlai, ɓəhnihnii a ɓə la yi kwnuyeɓədo n woi dna ń əwo kala la. 6 Ntuge yi kpəlo nge a ɓə la əyi əza kwokwoi kwnu znudu n woi, nabai ń a ɓaa nayi leifyizhni nya əɓo duya, ntuge to ya kwu je leifyi afyenu zhni m; 7 ntuge zahozahoyi ń wo la fyí, a la wo gnyi n leifyi.

8 Nsaiye ngye yi ɓə kwu kwnu fyí n Kirisitii, yi n gaiciyagai lo nge yi ɓə kwnu anyìgyi n woi. 9 Ntuge yi kpəlo nge shi a ɓə la Kirisiti kala ń əfyi nyi, wo taa je fyí m; əfyi to ye n kalái lo tu ń əwo tukwo m. 10 Əfyi ń wo ɓə fyí nyi, wo ɓə fyí leifyi əfyi nu znugbmanyi ntu aza vnyanya ɓo; ama anyìgyi ń wo gyi nsaiye nyi, wo gyianyì ga Shekwoyi nu.

11 N ɓwajesnu n zokwo ye, fye gye əfyehni n zhni afyífyiyi ń aleifyizhni, ama awyewyeyida ń Shekwoyi, fyi ń Kirisiti Yeisu. 12 Ntucenu fye to ye leifyi, nge kwo gyibe, fyi ń əfye anayi n ɓa fyí nyi m, nabai fya vyi əkwo aɓəpwawo nukwoi m. 13 Fye to ga aleifyi əfye nayi əga dəhodəhoi kwaa zè əkpí tnutnuzhninya m, fye zezè fya kwu əfyehni ga fyi ń Shekwoyi akwnu nu, ngye aza yi ń a la ɓa kwnuɓe ncei ń əfyi, ɓe wyewyeyi aba; jesnu fya ga wo əfyehni anayi aga ngye ɓəfyece atnutnunya. 14 Ntuge leifyi to ɓə ye gwodu kwo ye zhni əfye Dagayi m, ntuge fye to fyi ń owa snuta nu m, ama fyi ń Shekwoyi shebmyashi.

15 To, yi zhni n wunanu a? Yi zhni aleifyi nu ntuge yi to fyi n owa snuta nu m, ama fyi ń shebmyashi? Kwo fyewyi! 16 Fye ta kpəlo nge əsa ń fya ga əfyehni fyi ń əza akwnu, fyaa vyi əwo gbetu ngye afyenu, fye zhni əza yi afyenu nu, ń fye vyi wo gbetu nyi m; kwo fye kwu zhni leifyi afyenu nu, n kwo lo n azai ń əfyi nyi, kwo afyenu ɓəgbetuvyi nya n kwo lofyi n azai ń ɓəfyecezhni nyi m? 17 Ama yi sa Shekwoyi ami lo nge, kwo shikwonyi fye ɓə zhni afyenu nu fyi ń aleifyizhni, fye ɓə kwu vyi gbetu ofye nyawu nya n əfye adui vnyanya, n fye zhi fyei shi kwo əɓwa nyi. 18 A la fye gnyi ń leifyi jesnu fye kwu zè afyenu ɓəfyecezhni nya.

19 Mi da dəye dna ń zanyikwoci awyega nu, ntu əfye akalágba ɓo fyi ń əfyehni nayi. N ɓwasnu ngye she fye ɓə zhni fyei ga əfye anayi ngye afyenu aɓoajegbmi nya, jesnu fyi ń əkpízhni gna-abye-lolo nya, ntulonu nsaiye fye kwu əfyehni ga fyi ń fyenu ɓəfyecezhni nya kwa ɓe n gyigyii. 20 Əsa ń fye ɓə zhni afyenu leifyi nya, fye ɓə kwnukwnuiya n ɓəfyecezhni aknawna. 21 Knyi gyibai nu ń fye ɓə ɓwa nsayi, n aɓo, n ɓa wo fye vnyinkwo lo nsaiye nyi a? Aɓəyi ɓə zo n əfyii nu! 22 Ama nsaiye, ń a la fye loya n aleifyi jesnu fye nyi kwu zè Shekwoyi afyenu, gyiba n fye ɓwa, kwo lo n fyei n gyigyi nu, jesnu əɓo n kwo gbmiɓe əkwo nu zhni wyewyeyi nyalonyalo nya. 23 Ntuge leifyitnutnu tagba nya zhni əfyi nu, ama Shekwoyi nyaga zhni wyewyeyi nyalonyalo nya nu, dna ń Kirisiti Yeisu əyi Dagayi.