1 Mi da gaiciyanunui nu dna ń Kirisiti; mi ta ceakata nu m. Əmi tukwovnyi kwoi gbmi mi əɓo dna n Zafnu Gyigyiyi 2 nge mi n bwugbawnu yaakwoi lo, jesnu bwugbazhii tnazoi fyilo ń əmi ədu. 3 Ntuge a wo mi lo ngye a ɓə ɓaa əmi nu tuknyi, jesnu aa mi znuya ń Kirisiti ntu əmi aza ɓo, aza yi ń ɓa nu zhni əmi əbye nyi, 4 Aisrailayi. Əɓa nu zhni anugwnuzezè agwogwoyi; əɓa nu n latu zafnu nyai, aɓəgbeshi, n owa gwogwoi, mwamwaga fyi n Dagayipwuwa ɓədo n aɓəgbeshii. 5 Adada-azakwoi zhni əɓa nya nu, jesnu ń əɓa nu ń a tnu Masifu əbye nayi nya. Əwo nu zhni Shekwoyi tu ń aza vnyanya, a ɓa ci wo nyalonyalo! Amyi.

6 Kwo to lo ngye Shekwoyi ɓədagbma kwo la gbakalá nu m. Ntuge aza vnyanya nu to ń ɓa n əbyeisa ń Israila, ń ɓa zhni Aisrailayi nu m. 7 Toge shi ɓa zhni əwo ayawyi nu nyi, ce nu ɓa zhni, əɓa vnyanya, ɓa kwu zè Ibrahim aɓyi m. Kwo snusnu nu ge, "Dna ń Ishakwu ofye nu, ń a ɓə kpé əho ayawyi əye." 8 Fyi n aɓədagbma ədo, nge aɓyi nu to, ń a ɓə kwu ɓa anubwo a ma ɓa ń nayifye nu, ń ɓa zhni Shekwoyi aɓyi m, ama aɓyi aɓəgbeshi nya nu, ń a yi ɓa ge Ibrahim aɓyi. 9 Ntuge a ɓə shi əɓəgbe ye nlai nu: "N əsa n a ncei knyishi, mi ɓə jezeɓe jesnu Saratu ɓə ɓwa Əɓyinugba."

10 Kwo to ɓə ɓwa zotu n ɓai nu m, ama kwo ɓə la si Libyeka aɓyi, ń a ɓə lá əɓa nubwo n əsagbmanyii, n əyi dada Ishakwui nyi. 11 Dudulonu, a ɓəə snu n a ma àpwo, kwo ge ɓa snu ń ɓa zhni əɓo manai kwo nukwoi; nabai ń a ɓa wu Shekwoyi ɓəmwi ntu zaknyiknyi ɓo kwaa myignyi: 12 toge n atnutnui nu m, ama ntu n əza nu, n wo ɓə yi ɓa nyi, a gna wo ge, "Zadnagbmai ɓə la dna n zanawyii snuta." 13 N ɓwasnu shi a ncei kafyilo: "Mi ye Yakwuɓwu lo, ama mi wnunu lo n Isuwai."

14 To yi ɓa gna dəye nge nanu a? Shekwoyi zhni tnagaiciyazhniyi nu u? Kwo fyewyi! 15 Ntuge wo ɓe gna Mwusa,

"Mi ɓa gye əza snusnu nu, n mi ye ma gye wo snusnu,

jesnu mi ɓa wna əza snusnu, n mi ye ma wna wo snusnu."

16 Ntucenu, kwo to kpema n zanyikwoci ɓəmwi nu kwo ɓəzhni m, ama tu ń Shekwoyi snusnugye. 17 Ntuge Nyakagyigyiyi ɓə gna Fyirauna: "Mi ɓə lá ho wu n ɓwasnu ń tu n ɓəye tukwo nu, nabai n mi ɓa wu əmi kala tu n əho, n a ɓa da əmi əye ɓo dna ń anyì vnyanya." 18 Ntucenu Shekwoyi gye əza nu snusnu, n wo ncei pma wa gye wo snusnu, jesnu wa kpe əza bwugbakala, n wo ncei pma wa kpe wo bwugbakala.

19 Zaknayi dna n əfye, ɓa gna mi: "To knyiyi nu zhni Shekwoyi woi ye ma yi aɓo a? Nyika nu ɓa myi wa gnyiapaapa n əwo ɓəmwi a?" 20 Ama ho zhni nyika nu, əho zanyikwoci, ha daɓo n Shekwoyi a? "Ənyazhnizhni ɓa gna əza ń wa zhni kwo nyi, ‘Knyiyi nu na zhni, ho nyi zhni mi n wu nlai a?’ " 21 Kwo ta yezhni shakwnumiyi, wa zhni apma n əznù gbmanyigbmanyii; wa mi shakwnu ntu apma knyiknyii ɓo jesnu adəho, ntu apma asukwui pya ɓo m?

22 N kwa zè ge Shekwoyi wo la knyi wa wu əwo minagyi napyei jesnu wa wu əwo kalá, wa ɓwamì yaakwo n anyazhnizhnii əwo minagyi nya; a ɓə zhni ɓa ntu əɓa agbmazhni ɓo nu. 23 N kwa zè ge wo ɓə zhni dəye nabai wa wu əwo latu yaakwo nu, ń anya ń wo ɓa wu ɓa snusnugye nyi, aza ń wo ɓə ye ɓa zhi n sapa ntu latu ɓo, 24 kwo əyihni, aza n wo ɓə yi ce nyi, toge fyi n Ayahudiyii nu ɓwasnu m, ama ɓədo n Abyedoyii ce. 25 Ngye shi wo ɓə da dna n Hosiya pafyi:

"Mi ɓə yi ɓá nge, ‘əmi aza’ ń ɓa to ɓə zhni əmi aza nu nyi m;

jesnu mi ɓə yi wo ge ‘əmi əza yeyeyi’ n wo to zhni əmi əza yeyeyi nu m,"

26 jesnu,

"Dna ń aba ń a ɓə gna ɓa,

‘Fye to zhni əmi aza nu m,’

n abaayi nu, n a ɓə yi ɓa ‘Shekwoyi wyewyeyida aɓyi.’ "

27 Ishaya ɓə ceawyi ntu Israila ɓo:

"Kwo Aisrailayi, ɓa kwu mwa bəgyé ngye amwi n ɓa ma n shikwo,

aza nu n ɓa ɓə cezhi n ɓa ɓə pwo.

28 Ntuge Dagayi ɓə dna

anyì n tata, n əwo ɓədagbmai n pyepyei jesnu ntna bwugbadoshna.

29 Kwo ɓwasnu lo ngye shi Ishaya ɓə kwu shnida nu:

"Akpəge Dagayi Ikwoda Duduyi Vnyanya

Wa kwu ayawyii ho fa zhi yi,

yi ɓə ɓa kwu zè ngye Sodom,

yi ye ɓəə kwu wulo ngye Gwomwora."

30 To yi ɓa gna dəye nge nanu a? Nge Abyedo n ɓa to ɓə zna ɓəfyecezhni shni m, ɓa la kwo ɓwa, ɓəfyecezhni ń a ɓwa kwo dńa n gaiciyaganunui; 31 ama Aisrailayi ń ɓa ɓə vyi owa ngye zokwo ɓəfyecezhni nya, ɓa too ɓwa kwo tukwo shi m. 32 Knyiɓei nu ɓə kpma ɓa əkwo ɓwa a? Ntuge ɓa to ɓə vyi kwo apita dna ń gaiciyaganunui nu m, ama ngye ɓa ɓə ɓwa kwo n atnutnuzhni nu. Ɓa ɓə la gbidokwnunu kpe ń kwuta bwonyice nya. 33 Ngye shi kwo kafyilo:

"Gyewye, mi shi kwuta dna n Siyona ń kwo zhni aza lo ɓai knyiabwonyi

jesnu apmá ń kwo zhni ɓai myiya, jesnu əza ń wa ga gaiciya ń wo, a to ɓə dna wo vnyinkwo m, nanyinanyi."