1 To, əza n wo zhni Yahudiyi, wo gnabmyagnyi lo n wunanu a? Kwo nyaznu n knyi apmai nu lo a? 2 Gnabmyagnyi lo n mwa kwokwo dna n səpa dəhodəhoi! Kpmisnui, Ayahudiyi nu n a kwu Shekwoyi aɓədagbma fnyi ɓa əɓwa nyi.

3 To, ngye azaho ɓə zhni atna-ɓəgbenuyi nu ma a? Əɓa tnagbenunu ɓo ɓa wnu Shekwoyi gaiciyazhninunu ya? 4 Kwo taa yezhni m, kpeekpe! Fa Shekwoyi waa zhni gaiciya, ń kasnu zanyikwoci dəhodəhoi waa zhni katayi, ngye she kwo kafyilo:

"Nabai ń a ɓa wu nge ho zhni gaiciya nu əsa n ha daɓo

jesnu haa knyitu n əsa n ha da owa ncei."

5 Ama ngye əyi tnaɓəfyecezhni gbmi Shekwoyi ɓəfyecezhni ɓe lo ncei pəipəi, to, yi ɓa gna dəye ɓo nge nanu a? Nge Shekwoyi zhni tnagaiciyazhniyi nu, n wo ɓe n əwo minagyii napyei kpe n yi nyi? (Mi zhni apma n zanyikwoci ɓənubwozhnii nu.) 6 Ɓəhnihni kwo to lo nlonu m! Kwo ɓə gna kwo wulo nlonu, Shekwoyi ɓə da anyì owa n wuna a? 7 Əzaho ɓá myi wa gna ge, "Ngye əmi tnagaiciyazhni bma Shekwoyi gaiciyazhninunu lo, jesnu kwoi ɓe n əwo latui, knyiyi nu zhni ai ye n mii znuknyi nge mi zhni leifyizhniyi a?" 8 Knyiyi nu zhni ɓanyi taa da she azaho ci yi aɓəcici nge yi gna, "Fa ya zhni əɓo nukwoi nu nabai əɓo manai kwa gbmiɓe a?" Əɓa knyiznu kwnuce lo!

9 To, yi ɓa zo ɓəye zhi nge nanu a? Yi gnabmyazhi lo nu? Aawo! Ntuge yi la əɓo luznutu nge Ayahudiyi n Abyedoyii vnyanya ɓa wulo ngye aje nu, ɓa fyilo ń aleifyi kalá snuta. 10 Ngye she kwo kafyilo:

"Əza gbmanyi ho to lo n wo zhni ɓəfyeceyi m, kwo gbmanyikaka;

11 əzaho to lo n wo n awyegai lo m,

Əza to lo gbmanyi ń wo zna Shekwoyi shni m.

12 Aza vnyanya ɓa la awye pmyiya,

əɓa vnyanya ń kwnusnu ɓa kwu zè azagbəlo;

əza to lo ń wo zhni əɓo manai lo m,

kwo zaknayi."

13 "Əɓa ashaɓwo zhni avnyigwo nu n gwuya zhi;

əɓa anyitala n kwocednai shiɓwa."

"Əmwi ogbma-owa nya nu fyi n əɓa agbe."

14 "Əɓa agbe nunui lo n aknyikpei n bwugbalilii."

15 "Əɓa apita n pyepyei ntuge ɓa zè amiya;

16 agbmazhni n əsnai nu fyi n əɓa azokwo,

17 jesnu zokwo bwugbafu nya ɓa ta kpe kwo əye m."

18 "Shekwoyi dnawo to lo n əɓa awyeba m kpeekpe."

19 Nsaiye yi kpəlo nge ɓəhoɓəhoi n owa ncei da lo, kwo daɓo n aza yii nu n ɓa fyi n owa snuta, nabai n əgbe dəhodəhoi kwaa cepyi jesnu anyì vnyanya ɓa ɓe n anyadokwui n Shekwoyi aba. 20 Ntucenu a to ɓə yi zahozahoyi nge ɓəfyeceyi n əwo awyeba ntu ń owa ɓwashi ɓo m; ama kwo snusnu nu nge, dna n owa, yi n ɓəpai lo ntu əyi aleifyi ɓo.

21 Ama nsaiye a kwu Shekwoyi ɓəfyecezhni wu, gbowo n ədoi ń kwo dna ń owa nyi, ədo ń Owa n Sheaɓəgwognayii ɓə la əkwo ɓəgbmi nyi. 22 Ɓəfyecezhni ye n kwo gbmi ń Shekwoyi nyi, kwo ɓe dna n gaiciyaganunui dna ń Yeisu Kirisiti, ga aza vnyanya n ɓa kwu gaiciya ga. Yahudiyi to kakai lo n Abyedoi m, 23 ntuge aza vnyanya ɓa kwu leifyi zhni jesnu ɓanyi kwu gba kpekpegye n Shekwoyi latu aba, 24 jesnu aza ɓa kwu ɓəgyikpmaya ɓwa n adaada ntu n əwo shebmyashi ɓo, dna n shnashna n kwo ɓə ɓe dna n Kirisiti Yeisui nyi. 25 Shekwoyi ɓə ga Kirisiti nu n zhni ɓəkaya nyagbmi, dna n əwo amizeya; a ɓa gwo kwo dna n gaiciyaganunui. Wo ɓə zhni dəye nabai wa wu əwo ɓəfyecezhni nu, ntuge dna n əwo bwugbaɓwa wo ɓə kwu aleifyi fa zhi, n a ɓə zhni ń sapa ntna tatagai. 26 Wo ɓə zhni dəye nabai wa wu əwo ɓəfyecezhni nu dna n əsa ye, nabai waa zhni gaiciyada jesnu əza ń wo pmya aza yi n ɓa kwu gaiciyaganunui fyi n Yeisu.

27 To, nsaiye, əgbegyiba gnyi n nanu a? A la əkwo əɓwa gbmiya. Ntu n knyi owai ɓo a? Ntu n owa ɓo n kwo ye atnutnu? Aawo, ama ntu n owa ɓo n kwo ye gaiciyaganunui. 28 Ntuge yi la gyitu nge əza zhni tna-ɓəgyii nu dna n gaiciyaganunui toge ń atnutnu owa ɓwashi nya m. 29 Kwo Shekwoyi wo ɓwa Shekwoyi Ayahudiyi nya nu zhni? Wo to zhni Shekwoyi Abyedo nya nu ce m? Əə, Shekwoyi Abyedo nya ce, 30 shikwonyi Shekwoyi n ɓwasnu lo gbmanyi nu, n wo ɓə kpmaɓəgyiya n anyaznuyi dna n gaiciyaganunui ɓədo n atnanyaznuyii jesnu dna n gaiciyaganunui gbmanyigbmanyi. 31 To, yi ɓaa kwu owa zhniagbma n gaiciyaganunui yei? Kwo to lo nlonu m kpeekpe! N əkwoɓwi, yi ɓa kwu owa shiɓwa.