1 Fa zahozahoyi waa əwohni gadna ń aikwoda akwnu, ntuge ikwo to lo m, akpəge ədo ń Shekwoyi wo la shi nyi. Ikwo ń kwo lo nyi, Shekwoyi nu ɓə shi kwo. 2 Ntucenu, zahozahoyi ń wo gnyiapaapa lo n ikwoi, wo gnyiapaapa n ənyai nu n Shekwoyi wo la shi, jesnu aza yi n ɓa zhni ce, ɓa ɓe ɓahni n owadai nu. 3 Ntuge abegyiyi to zhni anya ədnanazhii nu ń aza yi aba ń ɓa zhni aɓo manai nyi m, ama ń aza aba n ɓa zhni aɓo nukwoi, ɓa wodna. Ho ncei pmalo ha gnyi ntna ədna ikwoda nya? Akpəge ho zhni əɓo ń kwo bmya jesnu ń a ɓa ci ho. 4 Ntuge əza n ikwo dna ń əwo akwnu, wo zhni Shekwoyi tnutnuyi nu, nabai n aɓo ɓa lo n bmya. Ama ń fya zhni əɓo nukwoi, fye wodna, ntuge abegyiyi ta la əbeyaakwo ntna ɓətukwo m. Ɓa zhni Shekwoyi atnutnuyi nu, aminagyi shiyi nabai ɓa ga aɓənukwoizhniyi tata. 5 Ntucenu, kwo zhni ɓəshishi nu fya kwu əfyehni ga fyi ń aikwoda akwnu, toge n ɓwasnu ntu ń tata ɓo m, ama jesnu ntu n bwugbafu ɓwa əho tukwovnyi nya ɓo.

6 Dəye nu je əɓo zhni ń kwo zhni fyei gba gədu, ntuge aikwoda zhni Shekwoyi atnutnuyi nu, ń ɓa kwu əɓa əsa ga vnyanya ntu əbegyi ɓo. 7 Fye ga zahozahoyi ənya n fye ń əkwo ətai shi wo: N fye n gədui nu shi əta, a gba gədu; n gnyikwogyi nu, akpəge a gba gnyikwogyi; ngye mwamwaga nu, akpəge a ga mwamwa; ngye lalatu nu, akpəge latu.

8 Fye to kwu zhi n atai shi m, akpəge yeyewu əta, ədo n taa zo kwo gba nyi m, ntuge zahozahoyi ń wo wu azaje yeye wo kwu owa nu. 9 Aɓəgbetu nu nyi, "Fye taa zhni anagbái m," "Fye taa wu əza m," "Fye taa wyivyi m," "Fye taa mwi əzado ənya m," jesnu kwo n aɓəgbetu ajei n ɓa lo, a n ɓai wnafyi vnyanya n ɓəgbetu ye nu: "Ye əho kwnuzhiyi ngye əhohni." 10 Yeyewu ta wu kwnuzhiyi əɓwa m. Ntucenu yeyewu nu zhni owa nunu.

11 Njesnu fye zhni ɓəye, shi fye kpəlo əsa pya n kwo gnyi nyi: Snukna kwo lá fye lu si, ń fye ɓa kwnúagyewyi n əgyezhni, ntuge əyi gnyignyi kwo la gnawó vyivyiwyi, a fa əsa n yi ɓə kpmi gaiciyaga nyi. 12 Sukwo kwo lá ga zo; fyegyi ɓwace lo fyewyi nu. Ntulonu yi la atnutnu awyegbma nya kpmaya jesnu ya kpe akwnukaya bwuznagna nya. 13 Fye fa ya zhniaɓo ń cefyé, ngye yi fyi n nyipyei nu, toge ngye yi fyi ń nyasni n əjezhnii m, toge n anagbáizhni n ajewna asisi nyai m, toge n anyàwu n shewoi m. 14 N əkwoɓwi, fye kwu əfyehni pwi n Dagayi Yeisu Kirisitii, jesnu to fya zhni əɓonubwo she fye ɓa kwu əfyehni dafyi n agbmada nayi ɓəmwi nya m.