1 To, mi nyaɓo lo: Shekwoyi ɓə la əwo aza aɓo na nu u? Kwo fyewyi! Mi zhni Israilayi nu n əmihni tukwo, Ibrahim yawyi, mi gbmi n Banyami əbye. 2 Shekwoyi to ɓə na əwo aza aɓo m, aza n wo ɓə n ɓai pmayekpé nyi m. Fye ta kpe əɓo əye lo ń Nyakagyigyiyi ncei da lo fyi nyaka ntu Iliya ɓo m, she wo ɓə tna Shekwoyi aɓwa, woi kpe Aisrailayi aɓo: 3 "Dagayi, ɓa kwu əho sheaɓəgwognayi wu, jesnu ɓa la əho bəgədi ɓaya; əmi nu ɓwa cegnyi, jesnu ɓa to gnyi ɓai ye ɓa wu mi nu m"? 4 Knyiɓei nu ɓə zhni Shekwoyi ɓəgbedna ga wo a? "Mi n aza adugwu-tnaabai wnakna zhilo ga əmihni, n ɓa too knyiakwokwo zhi Baali m." 5 Ntulonu ce, nsaiye aza cezhilo, n a ɓə tnu ɓa zhi, dna əmi shebmyashi. 6 Ngye n Shekwoyi shebmyashii nu, a gye kwo to ɓə nyi ntu əɓa atnutnu ɓo nu m; kwo ɓə gna kwo gnyi n tnutnu ɓo nu, shebmyashi to ɓə ɓa shna shebmyashi zhni m.

7 To knyiyi nu a? Ənya n Aisrailayi ɓə znashni n əwyei bmyibmyii, ɓa to ɓə ɓwa kwo shi m. Aza aknyiknyiyi nu fyi n ɓa, n ɓa ɓə ɓwa kwo. Ama azaje ɓə n abwugbai kpakalá, 8 ngye she kwo kafyilo:

"Shekwoyi ɓə la zafnu tnagənyikpe nya ga ɓa

awye n ɓa ta gyewyeba m

ɓədo n atnubwai to ɓai wo atnubwaɓo m,

nya n naiye ń kwo gnyi nyi."

9 Njesnu Dawuda gna lo:

"Fa əɓa tebwul nyagyi nya kwaa zè agbúlu kwa pyi ɓa agam,

abwonyice aba jesnu aɓotagbaba ga ɓa.

10 Fa əɓa awye ɓa kwu fyi wyegbma nabai to ɓa gyewyeba m,

jesnu ɓaa yakpe n əɓa abwokwnu nyalonyalo."

11 Njesnu mi nyaɓo lo: Ɓa ɓə cebwonyi nabai ɓa myiya n ɓa taa shni kalakwu nu m? Kwo fyewyi! Kwo wulo nge ntu əɓa abwi ɓo nu, n gnyignyi kwo la ɓe da Abyedo nabai kwa dna Israila shewo. 12 Ama ngye əɓa abwi kwo la zè nyaɓwa nu ga anyì, jesnu əɓa nuwnaɓwi kwo la zè nyaɓwa nu ntu n Abyedo ɓo; to, a gye nyaɓwa ɓə lá gna yaakwo zhnizhni, she a ɓə la ɓa je gwo fyi n nunui!

13 Mi gnyi mii daɓo n əfyei nu Abyedo. Shikwonyi əmi nu zhni tnutnuloyi Abyedo nya, mi gbma lo dna n əmi ɓəvyitnutnu. 14 Mi n awyetui lo nge n zokwo, ho mi ɓa zhni əmi aza Ayahudiyi ɓa woshe, jesnu azaho ɓa ɓwa gnyignyi n ɓa. 15 Ntuge ngye a ɓə na ɓa aɓo, kwonyi la ɓe anyì n aɓodownai n Shekwoyii; to, əɓa jegwogwo ɓə ɓe n knyiyii nu a, kwo to ɓə gbmi wyewyeyi nu ɓe ncei n əfyi m? 16 Ngye biledi pisai tnaknai n a ga nge nyaga kpmisnui, n kwo gyigyii lo, a gye əkwo ɓwugyi kwo gyigyii lo; ngye gbegye gyigyii lo, akpəge əkwo aɓwala gyigyii lo ce.

17 Ngye a la aɓwala ho bmaya, jesnu əfye, kwo shikwonyi fye zhni zaitu aɓwala zhabwi nya nu, ń a pa amwula fyi n ashnuwna ajei, ama nsaiye fye kwnusnu lo n nuwnagbmai n kwo kwnu n zaitu gbegye nyi, 18 fye to gye əfyehni ngye fye kwu du aɓwala adəyi nya nu m. N fya zhni nlonu, fye pa ge: Əfye nu to n agbegyei shi m, ama agbegye nu n fyei shi. 19 To, fye ɓa myi fya gna, "A ɓə bma aɓwala ya nabai ń a ɓa pa əmi nu gyi." 20 Gaiciya nu. Ama a ɓə bma ɓa ya ntu ń əɓa tnagaiciyaga ɓo nu, əfyeeda zhi n gaiciyaganunui nu. Fye to kwu zhni atukwomwayi m, ama fye kwu fyi n vnyivnyi nu. 21 Ntuge ngye Shekwoyi to ɓə fa aɓwala ahnihnii m, wo to ɓə fa fye ce m.

22 Ntucenu fye pa Shekwoyi abmyazhni ɓo, n bwugbanazhii: bwugbanazhi n aza yii n ɓa ɓə myiya nyi, ama abmyazhni ɓo, ndəi fya gwodu fyi ń əwo abmyazhni. Ntolonu m, əfyehni ce, a ɓə la fye ceya. 23 Jesnu ndei n ɓa to kwu shenu fyi ń tnagaiciyaga nu m, a ɓə kwu ɓa pamwula, ntuge Shekwoyi ɓa myi wa je ɓa amwula pa. 24 Yi kpəlo ge, ngye a ɓə ce fye n zhabwi zaitu shnuwna nu, n a ta shni kwo zhni lonu nyi m, a kwu fye pamwula n zaitu shnuwna apyi nyai, a taa gna aɓwala shnuwna yi nya amwulapapa nu n əɓahni zaitu shnuwna yi m!

25 Mi to ncei pmalo fya kwu zhi n ɓəyeɓwi asigyi ye nyai m, əmi azaje azanugbai n anyikwozai, nabai n tukwomwa taa kwu nu əfye bwugba m. Israila wo lá bwugbakalákpe towo n səpa ho, nya əsa n Abyedo bəgyé, n nunui, shi a ncei tu, ɓə kwu loɓe, 26 jesnu n zokwo ye, Israila vnyanya ɓə kwu pwo. A ncei kafyilo: "Gnyiyi ɓə gbmiɓe n Siyona nu. Wo ɓə la tnashekwoyi ədnawo gbmiya ń Yakwuɓwu.

27 "Dəye nu zhni əmi ɓəgbeshi n ɓai

she mi ɓə la əɓa aleifyi kwuya."

28 Ntu aɓo n ɓa fyi n nabagyi manai nyi, ɓa zhni anuwnuyi nu ntu əfye ɓo; ama ntu azaknyi ɓo, ɓa zhni ayeyei nu ntu adada-azakwoi ɓo, 29 ntuge Shekwoyi nyaga n əwo yiyii a taa kpe ɓa doshna m. 30 N ɓwasnu shi n əsa ho, fye ɓə zhni atnaɓəgbetunuyi nu, ń Shekwoyi aba, ama nsaiye fye kwu snusnugye ɓwa, ntu əɓa tnaɓəgbetuvyi ɓo. 31 Ntulonu nsaiye əɓahni ɓa kwu zè atnaɓəgbetunuyi nabai n əɓahni ce, n ɓa ɓá gwo snusnugye nsaiye ntu Shekwoyi snusnugye ɓo n əfye aba. 32 Ntuge Shekwoyi wo la zahozahoyi pa dna n tnaɓəgbetuvyi nabai n wo ɓa gye ɓa snusnu əɓa vnyanya.

33 Oo, nyaɓwa loloyi Shekwoyi wyemwa nya n ɓəyekpei!

Əwo owada ń a taa myi n kwo pmi m,

jesnu əwo awogyei n a taa myi ń ɓa vyi m!

34 "Nyikanu lo n wo kwu Dagayi bwugba kpeye a?

Kwo nyika nu zhni əwo ɓəwuyii a?"

35 "Nyika nu lá ənya shni Shekwoyi ga a,

n Shekwoyi ɓa gba wo əkwo əta a?"

36 Ntuge n əwo aba nu jesnu ǹ əwoi nu jesnu ntu əwo əɓo nu ń anya vnyanya zhi.

Latu nyalonyalo nya zhni əwo nya nu! Amyi.