Esperar no Senhor

14 Mhuwile Zumbe Mnungu,

utoge usekwingila chevu,

weye mkawiile yehe.

13 Mna miye nahuwila kugamba,

neniuone uwedi wa Zumbe Mnungu,

mwe isi ya wata ugima.

14 Mhuwile Zumbe Mnungu,

utoge usekwingila chevu,

weye mkawiile yehe.

Nt’hogola kwa Zumbe Mnungu

1 Zumbe Mnungu niye ung’azi wangu naho niye akuniyokola,

nogohe ani?

Zumbe Mnungu anamila kwa yose yaihile,

hina cha kogoha.

2 Umwo waihi wakanikump’hukila,

wakaunga wakikome,

awo wak’hondo wangu naho wakomi,

nawakobadike niyo wagwa.

3 Hata uneva fyo dyose dikanitemangiza,

miye henogohe,

hata heziilwa ni nk’hondo,

miye neninde na mhuwi du.

4 Mbuli imwenga humlombeza Zumbe Mnungu,

kint’hu icho huzungula,

miye nikale mwe nyumba ya Zumbe Mnungu wikazi wangu wose,

vileke niuone uwedi wa Zumbe Mnungu,

na kumlombeza ulongozi wakwe.

5 Kwaviya umwo makunt’ho yakanizila,

yehe naanifise mwe diheha dyakwe,

naho naaniike hant’hu hatondowale halanga ho luwe.

6 Name neninde kulanga ha wank’hondo wanitemangize,

nenimlavile nt’hambiko kwa kwanga na kinyemi uko kwe dihema dyakwe dikukile,

nenikeme na kumtogola Zumbe Mnungu.

7 Unitegeleze weye Zumbe Mnungu umwo hakuiila,

unionele mbazi unink’he uhituzi.

8 Moyo wangu wanigamba mwa weye, "So umvike Zumbe Mnungu,"

Zumbe Mnungu, miye neza huvike.

9 Usekukefisa vileke nise kukuona,

Usekunionela maya,

usekuleka kumkaula mndima ywako,

kwaviya weye kunda wambizi wangu,

usekunileka,

weye Mnungu myokozi ywangu.

10 Hata uneva tate na mnala wana nileka,

mna Zumbe Mnungu naanidime.

11 Weye Zumbe Mnungu nihinize miye yadya ukuunga nidamanye,

naho unilongoze mwe sila heiina wiihi,

kwaviya wank’hondo wangu wabinda wingi.

12 Usekunasa, wank’hondo wangu wanitende ivo wakuunga,

kwaviya walava uwona wa lulimi,

wanitisa wakakeha kwa kukeduvya.

13 Mna miye nahuwila kugamba,

neniuone uwedi wa Zumbe Mnungu,

mwe isi ya wata ugima.

14 Mhuwile Zumbe Mnungu,

utoge usekwingila chevu,

weye mkawiile yehe.

Ukemi wa nt’hogola

1 Nehimgoja Zumbe Mnungu kwa uhuwilwa,

anivaga indilo yangu.

2 Anihausaga mwe dibome diihise,

naho anihausaga mwe nt’hope,

na kuniika hant’hu hatondowale,

na kuniika vedi lugendo lwangu.

3 Anihinizaga wila mhya,

ukemi wa kumtunya Zumbe Mnungu ywetu,

want’hu wabindile wingi nawogohe na kuhuwila,

na kumhuwila Zumbe Mnungu.

4 Ana kinyemi mnt’hu yudya akumhuwila Zumbe Mnungu,

mnt’hu hekukelunganya na want’hu wakukeduvya,

want’hu wasaguke wa kuvika milungu yawe yo udant’hi.

5 Weye Zumbe Mnungu ywangu, kudamanyila mbuli zibindile wingi,

naho mizungu yako mwetu heikuwazika,

kudamanya mbuli za kweheela kwetu, naho hakuli naadahe kuikimalisa,

neniyabwelekeze na kuyalonga,

mna yabinda wingi mwo kuyasimuila.

6 Weye hukuunga nt’hambiko hegu malavo,

mna kukomola magutwi yangu,

malavo ya kokwa na malavo ya kuusila wavu huyaungile

7 Naho nalongaga, "Ni miye aha,

ayo huungwa nidamanye yawandikwa mwe kitabu che sigilizi.

8 Kukint’hiza yadya ukuunga mwangu ni kinyemi kwangu,

sigilizi yako hiitozesa kwa moyo wangu wose."

9 Hisimuila mbuli zedi zo uyokozi,

ho mduganyo mkulu wa want’hu,

enga ivo ukumanya Zumbe Mnungu,

miye hilemele kuibwelekeza.

10 Hilekile kulonga uwagilwa wako unink’hile,

hibwelekeza mazuwa yose kugamba ni weye myokozi mhuwilwa,

hiufisile lukunde lwako mwo mdugano mkulu wa want’hu,

uwedi wako na uhuwilwa wako.

11 Weye Zumbe Mnungu usekunikindila uwedi wako,

uwedi wako na uhuwilwa wako, waniamilaga mazuwa yose.

Malombezo yo wambizi

12 Makunt’ho heyekuwazika yanizungulukaga,

wavu wangu wanigwilaga, hyadahaga kuuona,

watendesaga kunda mwingi kujink’ha zifili zangu.

miyename hifa chefu.

13 Uunge mwenye Zumbe Mnungu kuniyokola,

Zumbe Mnungu usunguze kwiza kunambiza.

14 Wakuunga kunikoma,

wengile soni na kuona kinyulu,

awo wakuunga nisulumile,

naho wadunduge na kuhuza.

20 Suwe chamkawiila Zumbe Mnungu,

yehe niye wambizi wetu na nk’hindo yetu.

21 Mwa yehe suwe kina kinyemi,

kwaviya chahuwila mwe dizina dyakwe dikukile.

22 Weye Zumbe Mnungu, lukunde lwako helwiina uheelo lwikale mwetu,

kwaviya suwe chakuhuwila weye.

5 Namgojela Zumbe Mnungu,

naho naihuwila mbuli yakwe.

6 Namgojela Zumbe Mnungu,

namgojelesa kujink’ha mwamizi akuugoja mtondo.

5 Miye ninyamale nimgoje Mnungu du,

kwaviya miye namkawiila yehe ekedu.

34 Mhuwile Zumbe Mnungu na kutoza sigilizi zakwe,

yehe naye naakuvikile uikaile isi,

na kuona waihi wakabanangwa.

5 Mhuwile Zumbe Mnungu kwa moyo wako wose, use kuhuwila ubala wako mwenye. 6 Umkumbukile Zumbe Mnungu mwe mbuli zako zose, yehe naye naakwamile mwe zisila zako zose.

3 Naho hiyo ivo du, chakeduvila masulumizo kinanayo kwaviya kimanya masulumizo yegela kufinyiliza, 4 kufinyiliza nako kwegala lugendo lwedi naho lugendo lwedi ulo lwegala kawiilo.

11 Mnungu awenk’heni ludole kwa udahi wo ukulu wakwe vileke mdahe kunda na ugoja mwe kila kint’hu kwa kufinyiliza.

Kufinyiliza no kulombeza

7 Kwa ivo wandugu, finyilizeni mpaka kwiza kwakwe Zumbe. Mlimi agojela vihandigwe vilave ulozo ukuungiswa, afinyiliza mpaka zinye fula za nk’hongo na zo mzigilizo. 8 Nanywe mwaungwa kufinyiliza, kimaleni mtogile mwo mhuwi wenyu kwaviya Zumbe ehagihi no kwiza.

11 Chawetanga awo, wavikilwa, kwaviya nawafinyiliza. Mwiva mbuli yo ufinyilizo wa Ayubu, naho mmanya ivo Zumbe amdamanyile ho lukomelezo, kwaviya Zumbe kamema mbazi no wedi.

22 Nyuwe mkukizwa kale umuye kwa kuzumila ikindedi, kwa kuwaunga weenyu haheina utondwe, ivo kombekeni kunda na lukunde kwa moyo wenyu wose. 23 Kwaviya mwink’higwa ugima mhya, hiyo udya ukulawa mwe mbeyu ikubanika, mna kulawa mwe mbeyu heikubanika, kwa sila ya ulosi wa Mnungu wili mgima naho wekala mazuwa yose. 24 Iwandikwa kugamba,

"Want’hu wose enga mani,

naho ukulu wawe utendese, ni enga bwali dya kwe mbago.

Mani yanyuluka, niyo mabwali yahugutuka.

25 Mna Mbuli ya Zumbe yekala mazuwa yose."

Ulosi wa Mnungu uwo ni idya Mbuli Yedi ibilikizwe kwenyu.

9 Zumbe hana kisese mwe kukint’hiza kiya alagane enga ivo wamwenga wakufanyanya. Mna ni mbazi zakwe Mnungu kwenyu, hakuunga mnt’hu yeyose abanangwe, mna want’hu wose waleke wavu wawe.

Mliganyizo wa awali mlongo

1 "Naho, Useuta wa kulanga nounde enga ivi. Wali mlongo waguhaga vimuli vawe niyo wagenda kumhokela mlombi. 2 Washano mwa ao wandaga wahezi, washano watuhu wandaga wabala. 3 Wadya wahezi waguhaga vimuli vawe, mna hawaguhile hamwenga na mavuta ya kongezela. 4 Mna wadya wabala vandaga wakeikila mavuta mnenge shupa zawe yo kugela mwe vimuli vawe. 5 Mlombi uyo hasunguzaga kwiza, vilekile wose wakupile niyo wagona nt’hongo.

6 "Mna ize ibuze kilo cha gati want’hu niyo wakonga kwanga, ‘Mlombi keza! Mwinuke mumhokele!’ 7 Wadya wali niyo wenuka woseni no kuvidamanya vimuli vawe. 8 Wadya wahezi niyo wawagamba wadya wabala, ‘Kink’hageni mavuta ludodo, vimuli vetu vazima.’ 9 Wadya wabala niyo vawagamba, ‘Bule! Haya kikint’he choseni nyuwe na suwe. Iteni kwe duka mkakeguile.’ 10 Mna Umwo wandaga wakaita kokugula mavuta, mlombi niyo engila, wadya wali wakeikilaga lumwe niyo wengilanya no mlombi kwe ndoza, ulwivi niyo lwavugalwa.

11 "Halongole, wadya watuhu nawo niyo weza wakagamba, ‘Zumbe! Zumbe! Kikomoele!’ 12 Zumbe niyo awahitula, ‘Nawagambilani ikindedi, hiwamanyizeni.’ "

13 Yesu niyo abindiliza kwa kugamba, "Elo indeni meso kwaviya hammanyize kwizilwa kwenyu nokunde ni ini!