Filho de Deus

3 Heye ndo lung’halo lwa ukulu wa Nguluwi, na kiwhana ng’hatu na vyoyali heye Nguluwi, yoiyegamiza isi kwa ulonzi wake luwele na ludali. Hanga loyasindile kuwahovuga wanhu wihe wa hewo, nakekala ako kuchanya kilanga, ubanzi wa kudilo wa Nguluwi Mkulu.

Ukulu wa Mwana wa Nguluwi

4 Mwana ndo mkulu kusinda mhilisi wa kilanga, kota vila itagwa loyapegwe na Nguluwi ndo likulu kusinda itagwa lyawo.

14 Nawo ulonzi nauwa munhu, naukala kwa hetwe. Natwe natuwona welile wake, welile wake uwele ndo Mwana wa udewele wa Mhaza, naumema uganililo na kukomya.

18 Haduhu munhu yamuwene Nguluwi ne hado. Ila mwana wa udewele yewhanile na Nguluwi yawele yelumbile na Mhaza, ayo ndo yatuzelese mbuli za Nguluwi.

17 Lelo, Yesu nakawalonjela, "Mhaza wa heni kangukola mijito mazuwa gose, nani ndangudita hiho."

18 Kwa chiwalo cha ulonzi awu, vilongozi wa Wayahudi nawalutilila kupala nzila ya kumkopola Yesu, haiwele kota nakabena mzilo wa Zuwa lya Kwesela hela ila kwa vila nakalonga kota Nguluwi ndo Mhaza wa heye, ahyo nakewhaniza na Nguluwi.

Petili kangukunda kota Yesu ka mwana wa Nguluwi

13 Yesu loyafichile nzingo ya Kaisalia Filipo, nakawauza walanguswa wa heye, "Wanhu wangulonga Mwana wa munhu ka whaani?" 14 Nawamwidichila, "Wanji wangulonga hegwe ndo Yohani Mbatiza, wanji wangulonga hegwe ndo Eliya, na wanji wangulonga hegwe ndo Yelemiya ama yumwe wa waloli." 15 Yesu nakawauza, "Na hemwe ndaze, mwangulonga heni nda whaani?" 16 Simoni Petili nakedichila, "Hegwe ndo Kilistu Mlohozi, Mwana wa Nguluwi yawele mkomu."

16 Lelo Yesu loyasindile kubatizigwa, baho du ulanga naugubuka na nakamona Muhe wa Nguluwi yodulika kota ng’hunda na kwima mchanya mwa heye. 17 Lizi kulawa kilanga nalilonga, "Ayu ndo mwana wa heni ndimganile, nanojezwa na heye."

15 Chila munhu yalingulonga kwa mlomo wa heye kota Yesu ndo Mwana wa Nguluwi, Nguluwi kangikala mgati mwa munhu ayo, naye kangikala mgati mwa Nguluwi.

9 Nguluwi nakalajila igano lya heye kwa kumlajiza Mwanage wa udewele kuli isi, leka tuwe na ukomu kwa kukolela heye. 10 Igano lya kukomya ndo ali, haiwele kota hetwe natwali tumganile Nguluwi, ila heye nakatugana na nakamlajiza Mwanage yawe nhambiko ya uhanyisi kwa kutulavila gehile ga hetwe.

8 Kwa vila yalingudita gehile ndo wa Limazoga, mina Limazoga lidita gehile kulawa mwaluko. Ila Mwana wa Nguluwi nakoya muisi kuwifya mijito ja Limazoga.

12 Yoneche yalingumkunda Mwana wa Nguluwi kanawo ukomu awo, yula yohambe yamkunde Mwana wa Nguluwi, kahela ukomu.

16 Kwa vila Nguluwi nakaigana isi mbaka nakamlavya Mwanage wa udewele, leka chila yomkunda yaleche kwajilila, ila yawe na ukomu wa mazuwa gose.

21 Kota vila Mhaza vyoyowazilipulaga wabagame na kuwapa ukomu, hihyo du naye Mwana kawapaga ukomu wala yalinguwagana. 22 Mhaza hambe yamtaguse munhu yoneche, mbuli yeng’ha ya utaguso nakamlechela Mwana, 23 leka wanhu weng’ha wamhulichize Mwana kota vila vyowalingumhulichiza Mhaza. Yohambe yamhulichize Mwana halingumhulichiza Mhaza yawele yamlajize.

25 Ndikomya ndanguwalonjela, mhela wanguya, naufika, uwele wabagame wolihulika lizi lya Mwana wa Nguluwi, nawo wawele woihulika wowa na ukomu. 26 Kota vila Mhaza vyoyawele mwaluko wa ukomu, hihyo du ndo nakamha Mwanage yawe mwaluko wa ukomu.

12 Ila wala wanhu waubochele na waukundile, nauwapa ludali lwa kuwa wana wa Nguluwi, 13 wawele hawapondigwe kwa danda ne kwa igano lya lukuli ama kwa igano lya munhu, ila kwa igano lya Nguluwi.

20 na sambi ndangikala, ila siwele heni kahi, ila Kilistu ndo yalingikala mgati mwa heni. Kikala aku kondilingikala sambi ndangikala kwa makundo, makundo ga kumkunda Mwana wa Nguluwi yanganile na kuulavya ukomu wa heye kwa chiwalo cha heni.

4 Ila loufichile mhela wula utanganiche, Nguluwi nakamlajiza Mwanage yawele nakapondigwa na mdala, naye nakekala kwa kulongozwa na malajizo, 5 leka yawagombole wala walingulongozwa na malajizo leka hetwe tuditigwe kuwa wana wa Nguluwi.

6 Kwa vila hemwe lelo mwa wanage, Nguluwi nakamlajiza Muhe wa Mwanage mnhumbula ya hemwe, Muhe yawele ngulila "Aba," Ilinguzeleka "Mhaza."

10 Mina, lotwali tung’hali wang’honyo wa heye, Nguluwi nakatuhanyisa na heye kwa kubagama kwa Mwana wa heye. Kwa vila lelo natuhanyiswa na heye, yangulajila ng’hatu toloholigwa kwa ukomu wa Kilistu.

6 Mina kwa chiwalo cha hetwe, mwana nakapondigwa,

natupegwa mwana mlume,

naye kopegwa ludali lwa kulongoza,

kochemigwa, "Yalingulonga mbuli za luhala, yalingububuwaza" na,

"Nguluwi Yawele na Mong’ho" na,

"Mhaza wa mazuwa gose" na,

"Mndewa wa kikala goya."