14 Sh-evanghelu aestu a amirãriljei va hibã predicat pri tutã lumea, ca unã mãrtirii la tuti natsiunili sh-atumtsea va hibã bitisita."

29 "Tora dupã nvirinarea atsilor dzãli,

‘soarili va si scutidiseascã,

sh-luna nu va da lunjina a ljei.

Stealili va cadã dit tser,

sh-puterili a tserurilor va si trunduescu.’✝

30 Atumtsea va s-aspunã tu tser semnul a Hiljilui a Omlui. Tuti natsiunili a loclui va plãngã, cãndu s-veadã Hiljilu a Omlui yininda pristi norilji a tserlui cu puteari sh-mãriri mari. 31 Sh-elu va li pitreacã anghilji a lui cu boatsi vãrtoasi di trumpetã, sh-elji va adunã aleptsilji a lui di patru vimturili, di unã mardzinã a tserlui pãnã la alantã.

42 Stats dishtiptat, cã nu shtits tu tsi oarã va yinã Domnul a vostru. 43 Ma si shtits aestã, cã ma s-shtiea nicuchirlu a casiljei tu tsi oarã a noaptiljei va yinea furlu, va armãnea dishtiptat sh-nu va lu alãsa s-lji intra tu casã. 44 Trã aestã voi s-hits etimãsits, cã Hiljiu a Omlui va yinã tu atsea oarã cãndu voi nu lu ashtiptats."

20 shi s-nveatsã s-facã tuti aesti tsi mini am dimãndatã. Sh-ia, mini escu cu voi tuti dzãlili, pãnã tu bitisita a etiljei."

32 "Cãt di atsea dzuã sh-di atsea oarã, vãrã nu shtii, nitsi anghilji dit tser, nitsi Hiljilu, ma mash Tatãl.

1 Prindi s-u shtii aestã: tu dzãlili di ma nãpoi va yinã chiro greu. 2 Oaminjlji va hibã egoishtsi, tãmãcheari di pãradz, alãvdãtori, pirifanji, blãstimãtori, niascultãtori a pãrintsãlor, aharishti a buneatsãljei, nipistimenji, 3 ni-durutsi, ni-puitiutsi, zburãtori, ni-tsãnutsi, cãtilji, tsi nu l-vor buna, 4 prudotsi, cap-groshi, fudulji, cheflii ma multu di cãt dumnidzescu. 5 Atselji suntu dumnidzescu tu videari, ma alipidats a puteariljei a Dumnidzãlui. Sh-di aeshti dipãrteadz-ti.

17 ‘Tu dzãlili di soni, dzãtsi Dumnidzãlu, va s-undzeascã ashãtsi.

Mini va sã scurpisescu di Duhlu a meu

pristi tuts oaminjlji.

Hiljilji a voshtri sh-hiljili a voastri va s-prufitipseascã,

tinirlji a voshtri va veadã viziunea

sh-aushlji a voshtri va nyiseadzã.

18 Tu atseali dzãli va sã scurpisescu di Duhlu a meu

pristi huzmichearlji a melji sh-pristi huzmichearili a meali

sh-va s-prufitipseascã.

19 Va s-fac thavmati nsus pri tser

sh-seamni nghios pri loc,

sãndzi, foc sh-aburi di fum.

20 Soarili va si s-toarnã tu scutidi sh-luna tu sãndzi,

nãinti tra s-yinã dzua atsea marea sh-mãritã a Domnului.

21 Atumtsea caitsido tsi va s-acljeamã numa a Domnului, va s-ascapã.’

15 Aestã ma vã-u dzãtsem dupã zborlu a Domnului, noi tsi va armãnem yiu pãnã la vinita a Domnului, nu va him nãintea atsilor tsi murirã, 16 cã idyiul Domnu cu ursirea, cu boatsea a arhanghilui sh-cu trumbeta a Dumnidzãlui, va dipunã dit tser sh-mortsãlji tu Hristos va s-nyeadzã protslji. 17 Deapoea noi tsi him ninga yiu sh-avem armas, va him arãchit deadun cu nãshi tu niori tsi s-adunãm Domnul tu tser. Sh-ashã va him totãna deadun cu Domnul. 18 Diznjirdats-vã cu un-alantu cu aesti zboari.

6 Trã atsea s-nu durnjim ca alantsãlji, ma s-vigljem shi s-him dishtiptats. 7 Cã atselji tsi dormu, dormu noaptea, sh-atselji tsi s-mbeatã, s-mbeatã noaptea. 8 Iarã noi, tsi him a dzuãljei, s-him dishtiptats, avãnda nviscut pistea sh-vrearea ca cheptarlu, sh-nãdia trã ascãpari ca acupiritura a caplui. 9 Cã Dumnidzãlu nu nã ari bãgatã trã nãriri, ma trã loari ascãparea prit Domnul a nostru, Isus Hristos.

34 Bãgats oarã tsi ininjli a voastri si nu s-vã angreacã di mãcãri, di biuturi sh-di mirãchili a banãljei aishtei, tsi atsea dzuã s-nu vã yinã niashtiptatã. 35 Cã va s-yinã ca un cearcu pristi tuts atselji tsi bãneadzã tu fatsa a tut loclui. 36 Trã atsea, stats dishtiptat sh-rugats-vã totãna tra s-hits axii s-ascãpats di tuti atseali tsi va yinã shi s-ishits nãintea a Hiljilui a Omlui."

8 Ma unã tsiva s-nu agãrshits, multu-vruts: cu Domnul unã dzuã easti ca unã njilji di anji, sh-unã njilji di anji ca unã dzuã. 9 Domnul nu amãnã cu tsãnearea a tãxiriljei a lui, cum minduescu niscãntsã cã elu amãnã. Ma easti arãvdãtor cu voi, sh-nu va tra s-chearã vãrã, ma tsi tuts s-toarnã tu mitãnjiusiri. 10 Dzua a Domnului va yinã ca un fur. Atsea dzuã tserurili va chearã cu vrondu, elementili a naturãljei va s-aspargã di foclu, sh-loclu sh-itsido tsi suntu tu nãsu va s-ardã tuti.

11 Macã tuti aesti va s-aspargã, atumtsea tsi oaminji prindi s-hits voi? Voi prindi s-fãtsets unã banã sãmtã sh-dumnidzãsitã, 12 ashtiptãnda sh-cilistisãnda ti apruchearea a dzuãljei a Dumnidzãlui, di la cai tserurili ljea foc sh-va s-aspargã, sh-elementili a naturãljei arsã di dugoarea va s-tucheascã. 13 Ma noi, dupã tãxirea a lui ashtiptãm tseruri nolji sh-loc nou, tu cai bãneadzã ndriptatea.

51 Ia, ma vã aspun un mistiryiu: Tuts nu va murim, ma tuts va nã alãxim, 52 dinãoarã, cãt s-ncljidz shi s-discljidz ocljilji la trumpeta di soni. Cã va batã trumpeta sh-mortsãlji va s-nyeadzã niaspartsã sh-noi va nã alãxim.

1 Deapoea vidzui un tser nou sh-un loc nou. Tserlu di prota sh-loclu di prota s-dusirã sh-amarea nu easti ma. 2 Deapoea vidzui Cãsãbãlu atsel Sãmtu, Ierusalemlu atsel noulu dipunãnda dit tser, di la Dumnidzãlu sh-eara azãrãsitã ca nveastã stulisit trã dzinirli a ljei. 3 Atumtsea avdzãi unã boatsi analtã dit thron cai dzãtsea: "Ia, tenda a Dumnidzãlui easti cu oaminjlji! Sh-elu va s-bãneadzã cu nãshi sh-elji va hibã populu a lui. Idyiul Dumnidzãlu va s-hibã deadun cu elji. 4 Dumnidzãlu va ashteargã cathi lacrimã dit ocljilji a lor, sh-moartea nu va hibã ma, nitsi jali, nitsi vãitari, nitsi dureari nu va aibã ma, cã atseali di prota tricurã."