1 Cilimenj, ascultats pãrintsãlji a voshtri tu Domnul, cã aestã easti cu ndriptati. 2 "Tinjisea tatãl a tãu sh-muma a ta," cai easti dimãndãciunea di prota cu tãxiri, 3 "tra s-hits ghini shi s-bãnats trã mults-anji pri loc."✝

4 Pãrintsã, s-nu lji nãrits cilimenjlji a voshtri, ma crishtetsilji cu disiplinã sh-cu dimãndãciunjili a Domnului.

5 Voi sclayi, ascultats nicuchirlji a voshtri pri loc cu tinjii sh-cu fricã, sh-cu inimã curatã, ashãtsi ca Hristolu, 6 nu huzmitipsits trã videari tra s-lji arsits a oaminjlor, ma ca huzmicheari a Hristolui cai-fac vrearea a Dumnidzãlui cu tutã inimã. 7 Huzmitipsits cu bunã-vreari, ca a Domnul sh-nu ca a oaminjlor, 8 shtinda cã atsel tsi fatsi ghini, cum s-hibã sclav icã liber, va s-ljea arãsplãtirea di la Domnul. 9 Sh-voi nicuchiri, purtats-vã ghini cu elji sh-nu lã cãnusits, shtinda cã sh-voi sh-sclayilji a voshtri avets idyiul Domnu tu tseruri, cai nu tsãni hãtãrea a vãrui.

10 Tu soni, nvãrtushits-vã tu Domnul sh-cu fuchia a puteariljei a lui. 11 Nvishtets-vã cu tutã armatura tsi nã da Dumnidzãlu, tra s-putets si stats vãrtoshi contra a murafetsilor a draclui. 12 Cã noi nu alumtãm contra a truplui sh-a sãndzilui, ma contra a protsilor, contra a autoritãtsilor, contra a domnitorilor aishtei lumi scutidisitã sh-contra a fuchiilor sufliteshti sh-arali tu locurili tsereshti. 13 Trã atsea loats tutã armatura a Dumnidzãlui, tra s-putets s-ncuntrats dzua atsea araua, shi s-armãnets vãrtoshi dupã tsi s-avets alumtat pãnã tu soni. 14 Armãnets vãrtoshi shi strindzets mesea cu curaua a alihiljei shi nvishtets ndriptatea ca cheptar. 15 Ncãlcats-li cicioarili shi s-hits etinji trã dimãndari evanghelu a paciljei, 16 sh-di ma multu, tsãnets pistea ca apãrarea, cu cai putets s-astindzets tuti gilitili focoasi a arãului. 17 Bãgats helmeta a ascãpariljei shi spata a Duhlui, tsi easti zborlu a Dumnidzãlui.

18 Rugats-vã cathi oarã tu Duh, prit itsi rugãciuni sh-spigiurari. Trã atsea, stats dishtiptat sh-ipiminisits tu rugãciunjili a voastri trã tut populu a Dumnidzãlui. 19 Rugats-vã sh-trã mini, tsi Dumnidzãlu s-nji da zboarili, tsi s-grescu cu curaiu shi s-fac cunuscut mistiryiul al evanghelu, 20 trã cai mini escu ambasador tu prãnghi. Rugats-vã tsi s-dimãndu evanghelu cu curaiu cum prindi.

21 Tihicul, fratili a nostru vrut sh-huzmichear pistimen tu Domnul, va s-vã spunã itsido trã mini, tra si shtits cum escu sh-tsi fac. 22 Ma lu pitrec la voi, tra si shtits cum him shi s-vã da diznjirdari a ininjilor a voastri.

23 Pace a fratsilor sh-a surãrilor, sh-vreari cu pisti di la Dumnidzãlu Tatã sh-di la Domnul Isus Hristos! 24 Harul s-hibã cu tuts atselji cai vor Domnul a nostru Isus Hristos cu vreari di daima!