1 Trã atsea mini, Pavlu, hãpsãnitul al Hristos Isus trã itia a voastrã, pãngãnji, 2 sigurã cã avets avdzãt di nicuchiripsirea a harului al Dumnidzãu tsi nji-eara dat a njia trã voi, 3 cã prit un discupiriri nji si featsi cunuscut a njia mistiryiul, ashãtsi cum scriai ma nãinti cu putsãni zboari. 4 Cãndu s-li cãntats atseali, voi va putets s-achicãsits cãt ghini u cunoscu mistiryiul a Hristolui. 5 Aestu mistiryiu nu s-featsi cunuscut a oaminjlor di etili atseali tricuti, ma tora prit Duh si discupri aestã a apostuljilor sh-a prufitsilor a lui sãmtsã, 6 tsi prit evanghelu pãngãnjlji s-hibã deadun mushtinitori, deadun mãdulari tu un trup sh-urtac deadun tu tãxirea a Hristolui Isus. 7 Mini mi feciu huzmichear a aishtui evanghelu prit doara a harului al Dumnidzãu tsi nji si deadi a njia prit lucrarea a puteariljei a lui.

8 A njia, a ma njiclui di tut populu a Dumnidzãlui nji si deadi aestu har trã dimãndari la pãngãnjlji ayishtearili nipitrumti al Hristos, 9 shi s-lji lunjineadzã tuts trã nicuchiripsirea a mistiryiul, tsi eara ascumtu di tu etili di ma nãinti tu Dumnidzãlu tsi adãrã tuti. 10 Ashãtsi tora, elu vrea prit bisearicã s-fãtsea cunuscuti a pareilor sh-a puterilor tu locurili tsereshti, frunimeatsa di-multi-soi al Dumnidzãu. 11 Dumnidzãlu u featsi aestã dupã nãetea a lui eternã tsi elu lu mplini tu Hristolu Isus, Domnul a nostru. 12 Mpriunats tu Hristolu sh-prit pisti tu nãsu noi putem s-nã apruchem a Dumnidzãlui cu libertati sh-cu curaiu. 13 Vã fac rigeai, s-nu vã dispirats trã munduirili a meali, tsi easti alãvdarea voastrã.

14 Trã atsea, mini mi ndzinucljedz nãintea a Tãtãlui, 15 di la cai ljea numã cathi fumealji tu tser sh-pri loc. 16 Mini mi rog a Dumnidzãlui, tsi di avearea multu-mãritã a lui s-vã nvãrtusheascã cu fuchii prit Duhlu a lui tu omlu atsel di nãuntru, 17 tsi Hristolu s-bãneadzã tu ininjli a voastri prit pisti. Mini mi rog tsi voi s-hits arãdãtsinats sh-thimiljeats tu vreari, 18 tsi voi s-putets s-aduchits deadun cu tut populu a Dumnidzãlui tsi easti lãrdzimea, lundzimea, anãltsimea sh-ahãndamea a vreariljei al Hristos, 19 shi s-cunushtets vrearea a lui tsi nãstreatsi cunushtearea, tsi voi s-vã mplinits cu tutã mplinãtatea a Dumnidzãlui. 20 Tora, atsilui tsi dupã putearea tsi lucreadzã tu noi, poati s-fac multu ma multu di cãt noi cãftãm sh-minduim, 21 a lui s-lji hibã mãrirea tu bisearicã sh-tu Hristolu Isus pri tuti bãrnurili tu eta a etilor! Amin.