1 Sh-voi cu tutã cã earats mortsã tu cãlcãrili sh-amãrtiili a voastri, 2 la cai voi imnatã dupã cãljurili a lumiljei aishtei sh-vã sumbãgat a printslui a amirãriljei a aerãljei, a duhlui tsi tora lucreadzã tu atselji nipistimenji. 3 Sh-noi vãrãoarã bãnam ca elji, njidzeam dupã orixili a truplui, fãtseam tsi vrea truplu sh-mintea a noastrã. Noi ca atselji altsãlji earam di naturã cilimenji a nãrirãljei al Dumnidzãu. 4 Ma Dumnidzãlu, hinda avut tu njilã, trã itia atsea marea a vreariljei a lui cu cai nã vru, 5 sh-cãtse noi earam mortsã tu amãrtiili a noastri, nã nyie deadun cu Hristolu, sh-prit harul hits ascãpats. 6 Dumnidzãlu nã nyie deadun cu nãsu sh-nã apunã cu nãsu tu locurili tsereshti tu Hristolu Isus, 7 cu nãeti tra si aspunã tu eta tsi yini ayishtearea atsea multa a harului a lui, tu bunãtatea a lui cãtrã noi tu Hristolu Isus. 8 Cã cu harul hits ascãpats prit pistea sh-aestã nu yini di la voi, ma easti doara a Dumnidzãlui. 9 Voi nu vã ascãpat prit faptili a voastri sh-ashãtsi vãrã s-nu si s-alavdã. 10 Cã noi him fãptura a Dumnidzãlui, faptã tu Hristolu Isus trã fãtseari fapti buni, tsi Dumnidzãlu li arãdãpsi di ma nãinti tsi noi s-imnãm cu eali.

11 Trã atsea, adutsets-vã aminti cã voi vãrãoarã earats pãngãnji di tu amintari sh-acljimats nianvãrliga-tãljeats di atselji tsi s-acljeamã anvãrliga-tãljeats. Elji suntu tãljeats tu trup di mãna a omlui. 12 Adutsets aminti cã tu atsel chiro voi earats dispãrtsãt di Hristolu, scoasã nafoarã di populu al Israel, earats xenji trã pisti-ligãtura a tãxiriljei, fãrã nãdii sh-fãrã Dumnidzã tu lumea aestã. 13 Ma tora tu Hristolu Isus voi tsi unãoarã earats diparti, vã au aprucheat prit sãndzili a Hristolui. 14 Cã Hristolu easti pacea a noastrã. Elu di pãngãnjlji sh-di Iudeilji featsi un singur popul, sh-tu truplu a lui asparsi murul tsi mpãrtsa sh-lã fãtsea neamitsi. 15 Elu anulã legea cu ordinli sh-reguli, cu nãeti tsi di doi oaminji s-adarã un om nou singur, fãcãnda pace namisa di nãshi, 16 li puitui tu un trup singur atselji cu Dumnidzãlu prit crutsea, sh-asparsi dushmãniljea namisa di elji. 17 Elu vini sh-vã dimãndã evanghelu a paciljei cum a voauã tsi earat diparti di Dumnidzãlu ashãtsi sh-atsilor tsi eara aproapi di nãsu. 18 Cã, prit Hristolu, cum voi pãngãnjlji, ashãtsi sh-noi Iudeilji, avem intrari la Tatãl prit singurlu Duh. 19 Trã atsea, voi nu hits ma xenji sh-vinits, ma hits cãsãbunji deadun cu populu a Dumnidzãlui sh-membri a casãljei a Dumnidzãlui. 20 Voi hits adrat pri timeljiu a apostuljilor sh-a prufitsilor, cu Hristolu Isus ca cheatra a chiusheiljei. 21 Tu Hristolu tutã casa s-mpriuneadzã shi creashti tra s-hibã templu sãmtu tu Domnul. 22 Prit nãsu sh-voi tuts deadun cu altsãlji hits adrat ca casa iu bãneadzã Dumnidzãlu tu Duhlu a lui.