1 Mini hãpsãnitlu trã Domnul vã rog s-fãtsets unã banã tinjisit trã Domnul tsi vã acljimã. 2 S-hits didip aplicats sh-froninji, s-avets arãvdari, s-aprucheats un-alantu cu vreari. 3 Fãtsets itsi putets tra s-tsãnets unitatea tsi da Duhlu prit pacea tsi vã leagã cu un alantu. 4 Easti un trup sh-un Duh, ashãtsi cum easti unã nãdii la cai Dumnidzãlu vã acljimã. 5 Easti singur un Domnu, unã pisti, un pitedz, 6 un Dumnidzã sh-Tatãl a tutulor, tsi easti pristi tuts, prit tuti sh-tu tuti. 7 Ma a cathiunui di noi lji si deadi har dupã mizura tsi lji durusi Hristolu. 8 Trã aestã s-dzãtsi: "Cãndu s-alinã tu anãltsãmi, sclãvusi sclayilji sh-deadi doari a oaminjlor."✝ 9 Zborlu "s-alinã" va s-dzãcã cã elu dipunã ma nãinti tu pãrtsili di ma nghios a loclui? 10 Atsel tsi dipunã easti idyiul atsel tsi s-alinã pristi tuti tserurili, tra s-umplã itsido. 11 Niscãntsã elu lji featsi apostulji, niscãntsã lji featsi prufits, niscãntsã lji featsi evanghelishtsã, sh-alantsãlji lji featsi picurari sh-nvitsãtori, 12 trã etimãsirea a sãmtsãlor trã lucrul a huzmitipsiriljei, trã adrarea a truplui a Hristolui, 13 pãnã cãndu s-agiundzem tuts la unitatea a pistiljei sh-la cunushtearea a Hiljilui a Dumnidzãlui. Ashãtsi va nã fãtsem oaminji perfects, agiungãnda mizura a mpliniriljei a Hristolui. 14 Ashãtsi noi s-nu him ma cilimenji, arucats nclo sh-ncoa dit vãljurili, loat anvãrliga di cathi vimtu a nvitsãturãljei, sh-cu ileili shi shiritlãchili a oaminjlor tsi vor si s-arãd. 15 Ma dzãcãnda alihea cu vreari, s-crishtem tu tuti cãtrã elu tsi easti caplu, Hristolu. 16 Elu leagã shi mpriuneadzã tut truplu prit ligãturi sh-cathi mãdular tsi fatsi lucrul a lui, agiutãnda tu crishtearea a truplui prit nvãrtushirea tu vreari.

17 Trã atsea ma vã dzãc sh-mãrtirsescu tu Domnul, tsi voi s-nu imnats ma ashãtsi cum imnã pãngãnjlji tu guleatsili a mintilor a lor. 18 Elji u au mintea scutidisit shi suntu dipãrtsats di bana a Dumnidzãlui trã itia a nishtiriljei a lor sh-trã itia a nchitririljei a ininjilor a lor. 19 Atselji suntu faptsã nisãmtsãts, s-prideadirã tu disfrãnãri sh-cu zilii nifãntitã tra s-facã itsi lucru lãvushitã. 20 Ma voi nu lu avets cunuscut ashãtsi Hristolu, 21 cãndu dealihea voi avets avdzãt di Isusul shi hits nvitsats di la elu dupã alihea tsi s-afltã tu nãsu. 22 Arucats nclo bãnarea di ma nãinti a omlui atsel vecljiu, tsi s-aspardzi di orixili atseali arali. 23 Rinoits-vã tu inimã sh-tu mintea a voastrã, 24 shi nvishtets omlu atsel noulu faptu dupã Dumnidzãlu tu ndriptatea sh-tu sãmtsãljea tsi yini di alihea.

25 Trã atsea, alãsats dinãparti arãdearili, cathiunu s-dzãcã alihea cu aproapili a lui, cã noi him mãdulari a truplui a Hristolui. 26 Nãrits-vã, ma nu amãrtisits! Ascãpitata a soarilui s-nu vã aflã ninga nãrãits. 27 Nu dats loc a draclui. 28 Atsel tsi ninga furii, s-nu furã ma, ma ghini s-lucreadzã, fãcãnda lucri buni cu mãnjili a lui, tra s-aibã tsiva trã dari atsilor tsi au ananghi. 29 S-nu easã vãrã zbor lãvushitã dit gura a voastra, ma mash zboari buni tra s-agiutã tu crishtearea dupã ananghea, shi s-da har atsilor tsi ascultã. 30 Nu lu nvirinats Duhlu Sãmtu a Dumnidzãlui, cu cai elu vã vulusi trã dzua a arãscumpãrariljei. 31 Mutats di voi cathi amãreatsã, nãriri, hulii, ngrãnji, blãstem sh-cathi arãutati. 32 S-hits bunji, duruts cu un-alantu, ljirtats un-alantu, ashãtsi di cum Dumnidzãlu vã ari ljirtat prit Hristolu.