1 Trã aestã noi prindi s-bãgãm mintea ma multu la atseali tsi avdzãm tra s-nu chirem tsiva cala. 2 Cã, macã zborlu dzãsã prit anghilji, ishi s-hibã niminat, sh-itsi cãlcari a legiljei icã niascultari lo arãsplatã ndreaptã, 3 cum va lj-fudzim noi a giudicatãljei, ma s-nu bãgãm mintea la unã ascãpari ahãnt mari? Aestã ascãpari, ashãtsi cum s-aspusi di ma nãinti prit Domnul, nã si alihipsi di atselji tsi u-avdzãrã. 4 Tu oara aestã Dumnidzãlu mãrtirsea cum prit seamni, cum prit thavmati sh-cu faptili a fuchiiljei sh-cu mpãrtsãrili a doarurilor a Duhlui Sãmtu dupã vrearea a lui.

5 Dumnidzãlu nu u-sumbãgã a anghililor lumea tsi va yin, trã cai ma zburãm. 6 Iuva tu Scrituri s-mãrtirseashti:

"Tsi easti omlu tsi lu aduts aminti,

icã tsi easti hiljiu a Omlui tsi s-ai cãshtigã trã nãsu?

7 Tini lu fãtsesh atsel di putsãn chiro niheamã ma njic dicãt anghilji,

cu mãriri sh-cu tinjii l-ncurunashi.

8 Tuti li sumbãgash la cicioarili a lui."✝

Cãndu Dumnidzãlu li sumbãgã tuti sum cicioarili a lui, elu nu alãsã tsiva ni sumbãgatã. Ma tora nu videm ninga, cã a lui lji suntu sumbãgats tuts. 9 Ghini-ma, videm atsel cai s-featsi di putsãn chiro niheamã ma njic di anghilji, Isusul, ncurunat cu mãriri sh-cu tinjii trã itia a munduiriljei a moartiljei, prit harul al Dumnidzãu s-ngusta moartea trã caitsido. 10 Cã lji lipsea atsilui, trã itia a cui suntu tuti sh-prit cai suntu tuti, tsi, aducãnda multsã hilji shi-hilje tu mãriri, s-perfexioneadzã prit munduiri ahurhitorlu a ascãpariljei a lor. 11 Cã atsel tsi sãmtsashti sh-atselji cai suntu sãmtsãsits, suntu tuts dit un, sh-trã atsea nu si arushineadzã s-lji acljeamã frats sh-surãri, 12 dzãcãnda:

"Va u-dimãndu numa a ta la fratslji shi surãrili a meali

sh-tu mesea a cuvãndului va ti alavdu."✝

13 Sh-adãvgã:

"Mini va pistipsescu tu nãsu."✝

Sh-nãpoi adãvgã:

"Ia, mini sh-cilimenjlji tsi nji deadi Dumnidzãlu."✝

14 Trã atsea, metsi cilimenjlji au idyiul sãndzi sh-trup sh-elu tutashã fu pãrtashi tu idyili lucri, cu nãeti tsi prit moartea s-afãniseascã atsel cai ari putearea a moartiljei, va s-dzãcã draclu, 15 shi s-lji sãlãghea tuts atselji tsi di frica a moartiljei eara tu sclãyii trã tutã bana. 16 Cã sigur elu nu da agiutari trã anghilji, ma da agiutari trã dupãyinitura al Abraham. 17 Trã aestã elu prindea s-lji undzea a fratsilor tu tuti, tra s-fãtsea arhipreftul njilãos sh-pistimen tu atseali lucri tsi au s-fac cu Dumnidzãlu tra s-arãsplãteascã amãrtiili a lumiljei. 18 Cã metsi elu trapsi cãndu s-cãrti, poati s-agiutã atselji cai s-cãrtescu.