1 Trã atsea sh-noi, hinda anvãrligats di un nior ahãntu mari di martiri, arcãnda nclo itsi greutati sh-amãrtia tsi nã anvãrligheadzã dipriunã, s-alãgãm cu arãvdari la cala tsi avem nãinti, 2 avãnda mutrita cãtrã Isus, apãrnjitorlu sh-mplinãtorlu a pistiljei, cai trã haraua tsi eara nãintea a lui, arãvdã crutsea, dispretsui arushinea shi shidzu tu nandreapta a thronlui a Dumnidzãlui. 3 Trã atsea, minduits trã atsel cai arãvdã ahtari ncuntrari di amãrtioshlji pristi nãsu, tra s-nu vã apustusits shi s-vã slãghits tu ininjli a voastri. 4 Cã voi ninga nu avets arãvdat pãnã tu sãndzi, alumtãnda contra a amãrtiiljei. 5 Sh-voi avets agãrshat didip zboarili di inimusiri cai Dumnidzãlu vã da ca hilji a lui:

"Hiljiu a meu, nu u dispretsuea vãrghirea a Domnului

sh-nu ti nvirinã cãndu ti vãrgheshti di elu,

6 cã, Domnul atsel tsi lu va, lu ndreadzi

shi zãpãleashti cathiunu cai lu aproachi ca hiljiu a lui."✝

7 Macã voi va u arãvdats vãrghirea, Dumnidzãlu va vã mutreascã ca hilji, cã cai easti atsel hiljiu tsi nu lu vãrgheashti tatãl? 8 Macã nu va vã vãrghits ashã cum s-vãrgheascã tuts altsãlji, atumtsea hits copilji, nu hits hilji. 9 Sh-macã tinjisim pãrintsãlji a noshtri trupeshti cãndu nã vãrgheascã, nu prindi sh-ninga ma multu s-nã sumbãgãm a Tatãl a nostru suflitescu trã bãnari? 10 Cã dealihea elji nã vãrghirã trã niscãnti dzãli ashã cum minduirã ti ma ghini, iarã elu nã vãrgheashti trã buna a noastrã tra s-nã fãtsem pãrtashi tu sãmtsãljea a lui. 11 Cathi vãrgheari tu ahurhitã, si pari cã nu adutsi harauã, ma nvirinari, iarã deapoea da frutili a paciljei sh-a ndriptatiljei atsilor tsi suntu ndreptsã prit nãsã. 12 Trã atsea, nvãrtushits mãnjili atseali curmati sh-dzinucljili atselji slabi. 13 Fãtsets cãrãri ndreapti trã cicioarili a voastri, cu nãeti tsi atsel cai shcljioapi s-nu si s-facã ma arãu, ma si s-vindicã.

14 Fãtsets pace cu caitsido shi sãmtsiri, cã fãrã di ea vãrã nu va veadã Domnul. 15 Bãgats oarã tsi vãrã s-nu armãnã fãrã di harul a Dumnidzãlui, tra s-nu creascã vãrã arãdãtsinã amarã shi s-vã minteascã sh-deapoea s-pãnĝãneascã sh-altsã, 16 tra s-nu hibã vãrã curvar icã anapud ca Esau, cai ti unã mãcari vindu ndreptul a lui prot-amintat. 17 Voi shtits cã sh-ma napoi, cãndu vru s-mushtineadzã ghinicuvintarea, lji si arnisi. Elu nu aflã loc trã mitãnjiusiri, cu tutã cã u cãftã cu lãcrinj. 18 Cã voi nu hits aprucheat di muntili cai s-ahuleashti cu mãna shi s-ardi di foc, nitsi di scutidlu, nitsi di negura sh-nitsi di furtuna, 19 nitsi di asunarea a trumpetãljei sh-nitsi di boatsea a zboarilor trã cai atselji tsi li-au avdzãtã, si spigiurarã tra si nu adavgã a lor nitsi un zbor altu. 20 Elji nu putea s-arãvda ordinlu: "Sh-unã pravdã s-ahuleascã muntili, va si s-vatãmã cu cheatrã."✝ 21 Sh-ahãt fricuitoarã eara pãrearea, cãt Moisiu dzãsi: "Escu lãhtãrsit sh-escu trimurãnda."✝ 22 Din contra, voi hits aprucheat di muntili Sion sh-di cãsãbãlu a Dumnidzãlui atsel yiu, di Ierusalemlu atsel dit tser sh-di njilji sh-dzatsi-njilji anghilji di sãrbãtoarea 23 di adunarea a cilimenjilor atsilor prots-amintat, cai suntu scriats tu tseruri, sh-di Dumnidzãlu, giudicãtorlu a tutulor sh-di duhurili a ndreptsãlor cai suntu fapts perfects. 24 Voi hits aprucheat di Isus, misitlu a unei pisti-ligãturã noauã, sh-di sãndzili tsi pruscuteashti, cai zburashti ma ghini di sãndzili al Abel.

25 Bãgats mintea tra s-nu arnisits atsel tsi zburashti! Cã, macã nu lji ascãparã atselji cai arnisirã s-asculta atsel cai hãbãrsea pri loc, ahtãt ma putsãn va ascãpãm noi ma s-lji arnisim atsilui cai hãbãrseashti dit tser. 26 Atumtsea boatsea a lui trundui loclu, iarã tora ari tãxit dzãcãnda: "Ninga unã oarã mini va trunduescu nu mash loclu, ma sh-tserlu."✝ 27 Sh-aestã "ninga unã oarã" aspuni alãxirea a lucrilor atsilor minati, ca lucri tsi suntu fapti, cu nãeti tsi s-armãnã atseali cai suntu niminati. 28 Trã atsea, luãnda un amirãrilji niminatã, s-hãristisim sh-prit aestã s-lji huzmitipsim a Dumnidzãlui cu arsiri, cu alãvdari sh-cu fricã, 29 cã Dumnidzãlu a nostru easti un foc tsi ardi.