1 Trã atsea, avãnda aesti tãxiri, vrutslji a melji, s-nã curãm di tuti lãvushiturili a truplui sh-a duhlui, bitisinda sãmtsãrea cu frica a Dumnidzãlui.

2 Fãtsets-nã loc tu ininjli a voastri trã noi! Noi nu lji featsim arãu a vãrui, vãrã nu zãrãsim, di vãrã nu avem amintat cu ilei. 3 Nu ma u-dzãc aestã ti condamnã, cã am dzãsã di ma nãinti cã voi hits tu ininjli a noastri, trã muriri sh-trã bãnari deadun. 4 Mari easti curaiul a meu cãtrã voi, mari easti pirifanjea a mea cãtrã voi. Escu mplin di diznjirdari sh-cu multã harauã tu tuti munduirili a noastri.

5 Cã, sh-cãndu noi agiumsim tu Machidunii, truplu a nostru nu avu dip discurmari, ma earam strimtsã di tuti pãrtsãli, di nafoarã alumtã, di nãuntru fricã. 6 Ma Dumnidzãlu, atsel cai diznjeardã aplicatslji, nã diznjirdã cu vinita al Titu. 7 Noi nã inimusim nu mash cu vinita a lui, ma sh-cu diznjirdarea cu cai s-diznjirdã ntru voi, aspunãnda-nã dorlu a vostru, plãngul a vostru, mirachea a voastrã trã mini, tra s-mi hãrseam ma multu.

8 Cã, sh-macã vã am nvirinat cu cartea a mea, nu nji pãru arãu. Sh-macã nji pari arãu, ved cã atsea carti macari trã putsãn chiro vã nvirinã, 9 ghini ma tora mi hãrsescu, nu cã vã ari nvirinat, ma cã nvirinarea vã ari dus tu mitãnjiusiri, cã voi vã nvirinat dupã Dumnidzãlu, tsi tu vãrã tsiva s-nu avets zãrari di la noi. 10 Cã nvirinarea dupã Dumnidzãlu adutsi mitãnjiusiri trã ascãpari, trã cai a omlui nu lji pari arãu, iarã nvirinarea a lumiljei adutsi moarti. 11 Cã ia, idyia aestã, nvirinarea a voastrã dupã Dumnidzãlu cãtã multu zel adusi la voi, cãti zboari di apãrari, cãtã dispirari, cãtã fricã, cãtã dor, cãtã mirachi ti condamnã! Tu itsido vã aspusit cã hits curats tu aestu lucru. 12 Ashãtsi cã, cu tutã cã vã scriai, nu eara trã itia atsilui cai featsi arãu sh-nitsi trã itia atsilui cai pãtsã arãu, ma cu nãeti tra s-aspunea la voi zelul a vostru trã noi nãintea al Dumnidzãu. 13 Trã aestã noi him diznjirdatã. Sh-ma multu di diznjirdarea a noastrã, noi nã hãrsim trã haraua al Titu, cã duhlu a lui eara rinoit di la voi tuts. 14 Cã, macã mi am alãvdat a lui ti vãrã tsiva tsi ari s-facã cu voi, nu mi arushinai. Din contra, ashãtsi dupã cum vã dzãsim tuti eara alihea, ashãtsi sh-alãvdarea a noastrã nãintea al Titu fu alihea. 15 Sh-elu vã va totãna sh-ma multu, cãndu adutsi aminti ascultarea a voastrã a tutulor, cã cum lu ashtiptatã, cu fricã sh-cu trimurari. 16 Mi hãrsescu cã tu itsido pot s-am pisti la voi.