1 Frats sh-surãri, ma vã fãtsem cunuscut harul a Dumnidzãlui cai s-deadi tu biseritsli di Machidunii. 2 La prova atsea marea a munduiriljei, artirizma tu haraua sh-tu urfanjea a lor ahãndoasã artirsi tu avearea a durusiriljei a lor. 3 Cã dupã putearea a lor, mini mãrtirsescu cã elji deadirã cu vreari pristi putearea a lor, 4 sh-nã si spigiurarã cu tutã inima trã aprucheari harul tra s-hibã pãrtashi la agiutarea a sãmtsãlor. 5 Sh-elji featsirã nu mash ashã cum nãdãim noi, ma nãinti di tuti s-prideadirã a Domnului sh-deapoea a noauã prit vrearea a Dumnidzãlui. 6 Ashãtsi noi urnipsim Titul tsi, ashã cum apãrnji ma nãinti, ashãtsi s-bitiseascã lucrul a harului aishtui ntrã voi. 7 Ma, dupã cum voi artirsits tu itsido: tu pisti, tu zbor, tu shtintsã, mplin di zel sh-tu vrearea a noastrã cãtrã voi, cãftats tra s-artirsitsã sh-tu lucrul a doarlui aishtui.

8 Nu ma u-dzãc aestã ca ordin, ma vidzãnda zelul a alantsãlor, s-bagã tu provã dealihea vrearea a voastrã. 9 Cã voi lu cunushtets harul a Domnului Isus Hristos tsi, hinda avut, s-urfãnipsi trã hãtãrea a voastrã, cu nãeti tsi voi prit urfãnipsirea a lui s-vã fãtseat avuts.

10 Trã aestã ma vã dau unã urnimii, cã aestã easti di ufelii trã voi. Di anlu tricut voi earats protslji tsi apãrnjitã nu mash s-fãtsets ma tsi vrut s-fãtseat. 11 Tora bitisits-u sh-atsea tsi avets trã fãtseari, tsi dupã cum fu vrearea di ahurhiri, ashãtsi s-hibã sh-bitisita dupã putearea a voastrã. 12 Cã, macã easti vrearea, darea easti ghini-aprucheat dupã atsea tsi vãrã ari, nu dupã atsea tsi nu ari.

13 Aestã nu s-fatsi tsi altsãlji s-aibã lishurari, iarã voi cripãri, ma tsi s-hits unã soi. 14 Tu aestã oarã artirsirea a voastrã agiutã ananghea a lor, cu nãeti tsi sh-artirsirea a lor si s-facã agiutari trã ananghea a voastrã tsi s-hibã unã soi. 15 Ashãtsi dupã cum easti scriatã: "Atsel tsi adunã multu, nu avu ma multu, sh-atsel tsi adunã putsãn, nu avu ma putsãn."✝

16 Hãristisit s-hibã Dumnidzãlu cai bagã tu inima al Titu idyiul zel tsi mini aveam trã voi. 17 Di unã parti, elu apruche urnimia a noastrã, ma di alantã parti hinda cu multu zel, s-nchisi s-yinea la voi cu bunã-vreari. 18 Deadun cu nãsu pitricum sh-fratili, atsel cai easti alãvdat di tuti biseritsli trã huzmitipsirea al evanghelu. 19 Sh-nu mash ahãt, ma fratili atsel s-aleapsi di bisertsli ca cãlãtor cu noi deadun, tu aestã doarã a harului tsi s-huzmitipseashti di noi trã mãrirea a Domnului shi trã spuneari bunã-vrearea a noastrã. 20 Trã atsea, bãgãm mintea tsi vãrã s-nu grea arãu cã cum noi huzmitipsim aestã doara di la voi. 21 Ashãtsi noi nã cãshtigãm trã atsea tsi easti bun, nu mash nãintea a Domnului, ma sh-nãintea a oaminjlor.

22 Deadun cu nãshi noi pitricum fratili a nostru, cai lu bãgãm tu provã di multi ori, la multi lucri sh-avem vidzut cã ari zel, ma tora ari multu ma multu zel, trã itia a bunã-pistiljei atsiljei mari tsi ari trã voi. 23 Cãndu easti zborlu di Titu, elu easti urtaclu a meu sh-colucrutor trã voi. Cãndu easti zborlu di fratslji a noshtri, elji suntu pitricutslji a biseritslor sh-mãrirea al Hristos. 24 Trã atsea aspunets a lor, nãintea a biseritslor, prova a vreariljei a voastrã sh-a alãvdariljei a noastrã cãtrã voi.