1 Nacã apãrnjim dinou s-nã alãvdãm cã cai him? Icã nacã avem ananghi ca niscãntsã di cãrtsã di alãvdari trã voi icã di la voi? 2 Cartea a noastrã hits voi, scriatã tu inima a noastrã, cunuscutã sh-cãntatã di tuts oaminjlji, 3 hinda fãnirusitsã cã hits epistola a Hristolui, huzmitipsit di noi, scriatã nu cu bueauã, ma cu Duhlu a Dumnidzãlui atsilui yiulu, nu tu tabli di cheatrã, ma tu tabli di ininji trupeshti.

4 Aestã sigurantsã nãintea a Dumnidzãlui, noi u-avem prit Hristolu. 5 Aestã nu yini di la noi, cã noi nu him axii s-lugursim tsiva tsi yini di la noi, di contra axiusirea a noastrã yini di la Dumnidzãlu. 6 Elu nã featsi axii tra s-him huzmicheari la pisti-ligãtura atsea noaua, nu di literã, ma di Duhlu, cã litera vatãmã, iarã Duhlu da banã.

7 Macã huzmitipsirea tsi adusi moartea, eara scriatã cu literi pri cheatrã, vini cu multu mãriri, cãt Israelitslji s-nu putea s-videa cãtrã fatsa al Moisiu, trã itia a mãririljei a fatsiljei a lui, mãriri tsi ma bitisea, 8 cum nu va hibã ma multu mãritã huzmitipsirea a Duhlui? 9 Cã macã tu huzmitipsirea a condamnariljei ari mãriri, multu ma multu va aibã mãriri huzmitipsirea a ndriptatiljei. 10 Cã dealihea, atsea tsi eara mãrit, nu easti mãrit tu oara aestã, trã itia a mãririljei tsi treatsi cathi mizurã. 11 Cã, macã atsea cai ma tritsea, vini prit mãrirea, multu ma multu easti cu mãriri atsea cai armãni!

12 Avãnda unã ahtari nãdii, zburãm cu multu curaiu, 13 sh-nu ca Moisiul cai bãga velu pri fatsa a lui, tsi hiljilji al Israel s-nu videa bitisirea a atsiljei tsi ma bitisea. 14 Ma mintili a lor si-nchitrirã, cã pãnã tu dzua di azã idyiul vel armãni nimutatã la cãntarea a Pisti-Ligãturiljei atsiljei Veclji, cã elu s-mutã singur tu Hristolu. 15 Meti, pãnã dzua di azã, cãntsido tsi s-cãnti Moisiul, un vel armãni tu ininjli a lor. 16 Ma cãntsido tsi vãrã s-toarnã la Domnul, velul va s-mutã. 17 Domnul easti Duhlu, sh-aclo iu easti Duhlu a Domnului easti libertatea. 18 Iarã noi tuts, cu fatsa fãrã di vel tsi videm mãrirea a Domnului ca tu videalã, nã alãxim tu idyia undzeari dit mãrirea tu mãriri tsi yini di la Domnul cai easti Duh.