1 Noi shtim, cã ma s-aspargã casa a noastrã di aoa pri loc, aestã tendã tu cai noi bãnãm, avem unã adãrãturã di la Dumnidzãlu, unã casã di daima tu tser niadãratã di mãna a oaminjlor. 2 Cã tu aestã tendã noi suschirãm, vrãnda multu s-nã nvishtem cu aestã adãrãturã dit tseruri, 3 cã dealihea cãndu s-nã nvishtem, nu va him ni-nviscuts. 4 Noi tsi him tu aestã tendã, suschirãm hinda grei trã aestã, sh-nu vrem s-him dispuljeats, ma s-nã nvishtem cu unã nvishteari tsereascã cu nãeti tsi, atsea tsi easti muritoarã s-ascapitã di bana. 5 Tora atsel tsi nã ndreapsi tamam di aestã, easti Dumnidzãlu cai nã deadi Duhlu ca cãpari.

6 Trã atsea, avãnda totãna curaiu shi shtinda cã di cãt chiro bãnãm tu trup, him diparti di Domnul, 7 cã noi bãnãm prit pistea, nu prit atsea tsi s-veadi. 8 Ashãtsi noi avem curaiu sh-nã arseashti ma multu s-nã dipartãm di truplu shi s-bãnãm la casã cu Domnul. 9 Trã atsea sh-noi avem ca nãeti, tsi cum bãnãnda tu trup, sh-cum bãnãnda diparti di trup, s-him arsits di la nãsu. 10 Cã tuts noi prindi s-nã fãnirusim nãintea a thronlui di giudicata al Hristos, tsi cathiun s-ljea arãsplata dupã atseali tsi ari faptã bãnãnda tu trup, bunã icã arãu.

11 Trã atsea, cã noi u cunushtem frica a Domnului, nã cãpãim s-cãndãrsim oaminji, iarã noi him ghini-cunuscuts di Dumnidzãlu, sh-nãdãescu tra s-him ghini-cunuscuts sh-tu conshtintsa a voastrã. 12 Noi nu ma vã spunem a voauã cã cai him, ma vã dãm arasti s-vã pirifãnsits ti noi, cu nãeti tra s-avets unã apandisi trã atselji cai s-alavdã cu pãrearea sh-nu tu atsea tsi easti tu inimã. 13 Macã dealihea fudzim di minti, easti ti Dumnidzãlu, macã him sãnãtoshi di minti, easti ti voi. 14 Cã vrearea a Hristolui nã domneashti, metsi avem agiumtã aoa, cã un muri trã tuts, sh-ashãtsi cã murirã tuts. 15 Sh-elu muri trã tuts, cu nãeti tsi atselji cai bãneadzã, s-nu bãneadzã ma trã nãshi, ma trã atsel cai muri trã elji shi s-nyie nãpoi.

16 Trã atsea noi, di tora sh-nclo, vãrã nu cunushtem ma dupã trup, ma cu tutã atsea sh-macã lu avem cunuscut dupã trup Hristolu, tora nu lu cunushtem ma ashãtsi. 17 Ashãtsi cã, macã vãrã easti tu Hristolu, elu easti fãpturã noauã. Vecljilji au tricutã, ia, tuti suntu fapti nali. 18 Tuti suntu di la Dumnidzãlu, cai nã puitui cu nãsu prit Hristolu sh-nã deadi huzmitipsirea a puituiriljei. 19 Aestã va s-dzãcã, cã Dumnidzãlu eara puituinda cu nãsu lumea tu Hristolu, nilugursit amãrtiili a lor sh-nã deadi a noauã zborlu a puituiriljei. 20 Trã atsea noi him ambasadorlji al Hristos, di-cum s-eara Dumnidzãlu shi s-acljima prit noi, vã rugãm tu numa a Hristolui: Puituits-vã cu Dumnidzãlu! 21 Dumnidzãlu lu featsi atsel cai nu cunushtea amãrtii, s-hibã amãrtii trã noi, tsi noi s-nã fãtseam ndriptatea a Dumnidzãlui.