1 Trã atsea, avãnda aestã huzmitipsiri prit njilã di la Dumnidzãlu, nu chirem curaiulu. 2 Din contra, alipidãm lucrili ascumti sh-arushinoasi, nu imnãm cu ilei sh-nu strãmbãm zborlu a Dumnidzãlui, ma prit aspunearea ntreagã a alihiljei, noi him ghini-aprucheats cãtrã conshtintsa a cathiunui om nãintea a Dumnidzãlui. 3 Sh-macã evanghelu easti acupiritã, easti acupiritã trã atselji tsi cher. 4 Dumnidzãlu a etiljei aishtei li urghi mintili a nipistimenjilor, tra s-nu veadã lunjina a evanghelui a mãririljei a Hristolui cai easti icoana a Dumnidzãlui. 5 Cã noi nu predicãm trã noi, ma Isus Hristolu ca Domnu sh-noi ca huzmichearlji a voshtri trã hãtãrea al Isus. 6 Cã Dumnidzãlu tsi dzãsi: "Di la scutidlu va strãlutseascã lunjinã," easti elu cai strãlutsi ininjli a noastri tra s-nã da lunjina a cunushteariljei a mãririljei a Dumnidzãlui tu fatsa a Hristolui. 7 Ma noi u-avem aestã ayishteari tu vasi di lut cu nãeti tra s-aspunã cã easti fuchia atsea marea a Dumnidzãlui, sh-nu a-noastrã. 8 Tu itsido noi him zorisits, ma nu mãchilipsits, him cihtisits, ma nu nvirinats, 9 him priaĝunits, ma nu apãrãsits, him cãdzuts nghios, ma nu pustuxits. 10 Noi totãna purtãm tu truplu a nostru iutsido moartea al Isus, cu nãeti tsi sh-bana a Isusului s-fãniruseascã tu truplu a nostru. 11 Cã noi tsi bãnãm, him pridats totãna tu moarti trã hãtãrea al Isus, cu nãeti tsi sh-bana al Isus s-fãniruseascã tu truplu a nostru muritor. 12 Ashãtsi cã moartea lucreadzã tu noi, iarã bana lucreadzã tu voi. 13 Ma avãnda idyiul duh a pistiljei, dupã atsea tsi easti scriatã: "Pistipsii, trã atsea grãi." Sh-noi pistipsim, trã atsea grãim, 14 shtinda cã atsel cai nyie Isusul va nã nyeadzã sh-noi deadun cu Isusul sh-va nã pãrãstãseascã nãintea a lui deadun cu voi. 15 Tuti suntu trã buna a voastrã, cu nãeti tsi harul si scurpiseascã tu cãts ma multsã oaminji, s-facã tsi hãristisirea s-artirseascã trã mãrirea a Dumnidzãlui.

16 Trã atsea, noi nu chirem curaiul. Macã omlu a nostru atsel di nafoarã ma s-aspardzi, omlu a nostru atsel di nãuntru ma s-rinoeashti dzuã dupã dzuã. 17 Cã criparea a noastrã atsea lishoarã di tora, adutsi trã noi, unã greutati eternã di mãriri, fãrã di mizurã. 18 Iarã noi nu tsãnem mutrita cãtrã atseali tsi s-ved, ma cãtrã atseali tsi nu s-ved, cã atseali tsi s-ved suntu tricãtoari, iarã atseali tsi nu s-ved, suntu di totãna.