1 Ah, canda s-mi arãvdat trã putsãn chiro tu zurleatsa a mea! Cu tutã cã ma mi arãvdats! 2 Cã escu nchizmataric trã voi cu nchizmã di la Dumnidzãlu, cã vã isusii cu un singur bãrbat tra s-lji pãrãstisescu a Hristolui unã virghinã curatã. 3 Ma, am fricã cã ashã cum sharpili arãsi Eva cu ileili a lui, poati ashãtsi s-aspargã sh-mintili a voastri, dipãrtãnda di simplitatea sh-curãtsiljea cãtrã Hristos. 4 Cã macã tsiniva tsi yini la voi, preadicã un altu Isus cai noi nu lu predicãm, icã voi loats un altu duh, dit Duhlu cai lu loat, icã un altu evanghelu, dit atselu cai lu aprucheat, lu arãvdats ghini! 5 Cã mini minduescu cã tu tsiva nu am armas ma nghios di apostulji atselji mãri-acljimats. 6 Ma sh-macã escu tiryeacliu tu zboari cu tutã atsea, nu escu ahtar tu shtintsã. Din contra, tu itsido u-avem aspusã aestã cãtrã voi.

7 Nacã feciu amãrtii cãndu mi tãpinusii, tsi s-vã anãltsam voi, metsi vã dimãndai ca bunã-hãbari fãrã platã Evanghelul a Dumnidzãlui? 8 Mini mprãdai alti biseritsi, luãnda unã platã tra s-vã huzmitipsescu a voauã. 9 Cãndu earam cu voi sh-fui tu ananghi, nu mi feciu sartsinã a vãrui, cã fratslji cai vinirã di Machidunii u mplinirã ananghea a mea, sh-tu itsido mi vigljeai, sh-va mi vegljiu tra s-nu mi fac sartsinã a voauã. 10 Ashãtsi cum easti alihea al Hristos tu mini, alãvdarea aestã vãrã nu va su facã s-tacã tu locurili di Ahaia. 11 Cãtse? Cã nu vã voi? Dumnidzãlu shtii cã cãt vã voi! 12 Aestã tsi ma fac, va u-fac dinou, tra s-nu da arasti atsilor tsi vor arasti tsi s-aflã ashã ca noi tu atseali la cai s-alavdã.

13 Cã ahtãri oaminji suntu apostulji arãdioshi, lucrutori hilietsi, cai alãxeascã pãrearea ca apostulji al Hristos. 14 Sh-nu easti trã ciudii, cã idyiul Satanu alãxeashti pãreari shi s-prifatsi ca anghilu a lunjinãljei. 15 Trã atsea, nu easti lucru mari, macã huzmichearlji a lui alãxeascã pãreari shi s-prifacã ca huzmichearlji a ndriptatiljei, ma bitisita a lor va s-hibã dupã faptili a lor.

16 Di nou ma vã dzãc: s-nu mindueascã vãrã cã escu zurlu! Cu tutã atsea, macã u fãtsets, mi aprucheats sh-ashãtsi ca un zurlu, tsi sh-mini s-mi alavdu niheamã. 17 Atsea tsi ma dzãc, nu ma u-dzãc dupã Domnul, mini mi alavdã mash ca tu zurleatsã. 18 Metsi multsã s-alavdã dupã trup, sh-mini va mi alavdu dupã trup. 19 Voi lji arãvdats cu harauã zurlji, cã hits mintimenji. 20 Voi arãvdats, macã tsiniva vã sclãvueashti, macã tsiniva vã arãcheashti atsea tsi easti a voastrã, macã tsiniva vã ufiliseashti, macã tsiniva s-tsãni ca ma mari di voi, macã tsiniva vã agudeashti pri fatsã. 21 Trã arushinea a mea dzãc cã noi avem fut slaghi la aestã. Ma tu itsido tsi cuteadzã tsiniva s-alavdã, ma u dzãc tu zurleatsã, va cutedz sh-mini. 22 Uvrei suntu elji? Escu sh-mini. Israelitsi suntu elji? Escu sh-mini. Dupã-yinitura al Abraham suntu elji? Escu sh-mini. 23 Suntu elji huzmichearlji a Hristolui? Ma grescu ca zurlu. Mini escu ma multu: tu apustusiri multu ma multu, tu hãpsãniri multu ma multu, la bãteari fãrã mizurã, tu piricljiu di moarti di multi ori. 24 Di la Iudeilji loai tsintsi ori cãti patrudzãtsi di cãmcichi fãrã un. 25 Trei ori mi bãturã cu ciumagã, unã oarã mi agudirã cu cheatrã, trei ori nji si frãmsi varca, tricui unã dzuã sh-unã noapti tu ahãndamea a amariljei. 26 Fui tu cãlãtorii di multi ori, tu piricljiu pri arãuri, tu piricljiu di furlji, tu piricljiu di Uvreilji, tu piricljiu di pãngãnjlji, am fut tu piricljiu tu cãsãbã, tu piricljiu tu irnjii, tu piricljiu tu amari, tu piricljiu ntrã fratslji arãdioshi. 27 Fui tu munduiri sh-tu apustusiri, tu ni-durnjiri di multi ori, tu foami sh-tu seati, tu agiuneatsã di multi ori, tu arcoari sh-dispuljeat. 28 Nafoarã di aesti lucri, sartsina di cathi dzuã pri mini easti angãtanul tsi am trã tuti biseritsli. 29 Cai easti slab sh-mini nu mi sãmtu slab? Cai cadi tu amãrtii sh-mini nu va mi ardu di nãuntru?

30 Macã prindi s-mi alavdu, va mi alavdu trã atseali tsi au s-facã cu slãbintsa a mea. 31 Dumnidzãlu sh-Tatãl a Domnului Isus, atsel cai easti ghinicuvintat di totãna shtii cã mini nu ma arãd. 32 Tu Damasc guvernatorlu a amirãlui Areta vigljea cãsãbãlu a Damascului tra s-mi acãtsa. 33 Ma prit unã fireastrã mi sãlãghii nghios ningã di mur tu un cosh sh-ascãpai di mãnjili a lui.