1 Legea easti aumbra a bunilor tsi yin, sh-nu suntu lucrili alihioasi, cã nu poati pute tsi cu idyili curbãnsiri, cai li aduc cathi an dipriunã, s-perfexioneadzã atselji cai s-aproachi a Dumnidzãlui. 2 Aljumtrea va avea dãnãsit curbãnsirea, cã atselji cai aduc curbãnji metsi eara curats unã oarã, nu va avea vãrã conshtintsã ti amãrtiili a lor. 3 Ma la atseali curbãnsiri cathi an s-aduc aminti amãrtiili, 4 cã easti niputut tsi sãndzili dãmaljilor sh-a tsachilor s-ashteargã amãrtiili. 5 Trã atsea, intrãnda tu lumi Hristolu dzãtsi:

"Curbãnsiri sh-doari nu vrushi,

ma un trup nji etimãsishi.

6 Scrumãri sh-curbãnsiri trã amãrtia nu ti arsirã.

7 Atumtsea dzãsh: ‘Ia, ma yin, Dumnidzale,

ti fãtseari vrearea a ta,

di cum easti scriat tu pergamenã trã mini.’"✝

8 Ma nsus dzãtsi: Curbãnsiri sh-doari, shi scrumãri sh-curbãnsiri ti amãrtii, tsi s-da dupã legea, nu vrushi sh-nu arsishi. 9 Deapoea elu adãvgã: "Ia ma yin s-fac vrearea a ta."✝ Elu arucã nclo protlu tra s-bagã a doaua. 10 Di aestã vreari him sãmtsãsits, prit curbãnsirea a truplui al Isus Hristos, tsi s-featsi unã oarã sh-ti totãna. 11 Dealihea, cathi preftu sta pri cicioari cathi dzuã aducãnda huzmitipsiri sh-di multi ori idyili curbãnsiri, cai nu pot pute s-mut amãrtiili. 12 Iarã Hristolu, aducãnda mash unã curbãnsiri di totãna trã amãrtiili, shidzu tu na ndreapta a Dumnidzãlui, 13 ashtiptãnda pãnã cãndu si bagã dushmanjlji a lui ca scamnu la cicioarili a lui. 14 Cã, mash cu unã curbãnsiri elu perfectsioneadzi di totãna atselji cai ma si sãmtseascã. 15 Ma, a noauã nã-u mãrtirseashti sh-Duhlu Sãmtu, tsi ari dzãsã:

16 "Aestã easti pisti-ligãtura tsi va fac cu elji

dupã atseali dzãli, dzãsi Domnul,

va li bag legili a meali tu ininjli a lor

sh-va li scriu tu mintili a lor."✝

17 Deapoea adãvgã:

"Amãrtiili sh-anapudiilji a lor

nu va li aduc aminti vãrã oarã."✝

18 Sh-iu ari ljirtari aishtor lucri, nu ari ma curbãnsiri trã amãrtii.

19 Ashãtsi, frats sh-surãri, avãnda curaiu trã intrari tu Sãmta a Sãmtsãlor prit sãndzili al Isus, 20 prit unã cali noauã sh-yii cai u adrã trã noi prit velu, tsi va s-dzãcã prit truplu a lui, 21 avãnda un mari preftu pristi casa al Dumnidzãu, 22 s-nã apruchem cu inimã curatã cu sigurantsã ntreagã a pistiljei, avãnda ininjli aspilati di conshtintsa atsea araua sh-avãnda truplu aspilatã cu apã limpidã. 23 Ashãtsi, s-tsãnem niminatã mãrtirsirea a nãdiiljei, cã pistimen easti atsel cai tãxi, 24 s-avem angãtan trã un-alantu tra s-dãm curaiu la un-alantu trã vreari sh-trã fapti buni, 25 fãrã s-apãrãtsim adunãrili, ashã cum u-au adetea niscãntsã, ma dãnda curaiu a unui-alantu, sh-ahãntu ma multu cã tora videts Dzua a Domnului tsi ma s-aproachi.

26 Cã, macã noi bãnãm amãrtisinda cu vreari dupã tsi lom cunushtearea ntreagã a alihiljei, nu armãni ma curbãnsiri trã amãrtii. 27 Din contra, nã ashteapti giudicata atsea fricoasa sh-un foc apreasã tsi easti etimu s-ardã atselji tsi ncuntreadzã Dumnidzãlu. 28 Caitsido tsi calcã legea al Moisiu, moari fãrã njilã cu mãrtiria a doi icã trei martirii.✝ 29 Cãt ma greauã condamnã minduits cã va s-axizeascã atsel tsi va calcã Hiljilu al Dumnidzãu sh-nu va tinjiseashti sãndzili a pisti-ligãturiljei cu cai si sãmtsã shi ngiurã Duhlu a harului? 30 Cã noi lu cunushtem atsel tsi dzãsi: "A mea easti arãzgãnarea, mini va s-arãsplãtescu," sh-adãvgã: "Va lu giudicã Domnul populu a lui."✝ 31 Ti aspãrari easti, s-cadzã tu mãnjili a Dumnidzãlui atsilui yiu.

32 Adutsets aminti dzãlili di ma nãinti, tsi dupã tsi vã lunjinat, arãvdat unã alumtã mari ti multã munduiri. 33 Cãti-vãrãoarã vã featsit pãrãstãsiri trã oaminjlji, cum prit pizuirea, ashã sh-prit munduirea sh-cãti-vãrãoarã vã featsit pãrtashi cu atselji tsi s-munduea unã soi. 34 Voi aspusit njilã trã hãpsãnitslji sh-aprucheat cu harauã archirea a aveariljei a voastrã, shtinda cã avets trã voi unã aveari ma bunã cai armãni di totãna. 35 Ashãtsi, nu arucats nclo curaiul a vostru, cai ari unã arãsplatã mari. 36 Cã voi avets ananghi trã arãvdari, cu nãeti tsi, dupã cum s-avets faptã vrearea al Dumnidzãu, s-loats tãxirea. 37 Cã:

"Ninga putsãn, multu putsãn,

sh-atsel tsi prindi s-yin,

va yin sh-nu va amãn.✝

38 Sh-ndreptul a meu dit pistea va bãneadzã,

sh-ma si s-trag nãpoi,

suflitlu a meu nu va aibã arsiri pri nãsu."✝

39 Ma noi nu him di atselji tsi s-trag nãpoi trã chireari, ma di atselji cai au pisti sh-suntu la ascãpats.