1 Dumnidzãlu lã zburã di cu ntãnjea a strãushilor a noshtri di multi ori sh-tu multi soi prit prufitsilji. 2 Tu dzãlili di soni nã grãi prit Hiljiu, cai l-bãgã mushtinitor a tuti lucrilor sh-prit nãsu adrã tutã dunjeaua. 3 Hiljilu hinda strãlutsirea a mãririljei sh-urma a hintsãljei a Dumnidzãlui, tsãni tuti aesti prit fuchia a zborlui a lui. Cum featsi spãstrirea a amãrtiilor, elu shidzu tu nandreapta a Mãreatsiljei tu anãltsãnji. 4 Hiljiu s-featsi multu ma analtu di anghilji sh-numa tsi mushtini easti ma multumãritã dicãt elji.

5 Cã a cui di anghilji lji dzãsi vãrãoarã: "Tini eshti Hiljiu a meu! Mini azã ti am amintat"?✝

Sh-dinou:

"Mini va lji hiu Tatã sh-elu va nji hibã Hiljiu"?✝

6 Sh-dinou, cãndu Dumnidzãlu s-lu pitreac protlu-amintat tu dunjeauã, dzãtsi:

"S-lu alavdã tuts anghilji a Dumnidzãlui."✝

7 Iarã trã anghilji dzãtsi:

"Elu lã fatsi anghilji a lui ca vimturi,

sh-huzmichearlji a lui ca fleaca di foc."✝

8 Trã Hiljilu a lui elu dzãtsi:

"Thronlu a tãu, Dumnidzale,

easti tu eta a etilor,

shi schiptrul a ndriptatiljei

easti schiptrul a amirãriljei a ta.

9 Ai vrutã ndriptatea sh-ai auratã anapudiiljea,

trã aestã Dumnidzãlu, Dumnidzãlu a tãu,

ti aumsi cu untulemnul a harauãljei pristi sotslji a tãlji."✝

10 Shi:

"Tini Doamne tu apãrnjitã ai thimiljeatã loclu,

sh-faptili a mãnjilor a tali suntu tserurili.

11 Eali va chearã, iarã tini va armãnji.

Tuti ca stranjiu va s-nvicljeadzã.

12 Tini va li adunji ca un stranjiu

sh-va s-alãxeascã,

iarã tini eshti idyiul,

sh-anjili a tali nu va bitiseascã pute."✝

13 Cã a cui di anghilji lji ari dzãsã vãroarã:

"Shedz tu nandreapta a mea

pãnã-cãndu s-li bagã dushmanjlji a tãlji

ca ashtirnut la cicioarili a meali"?✝

14 Vahi nu suntu tuts duhuri tsi huzmitipsescu, pitricuts trã huzmitipsiri trã buna atsilor cai va mushtineadzã ascãparea?