1 Vrearea frãtseascã s-armãnã ntrã voi. 2 Nu agãrshits ghini-ashtiptarea, cã prit nãsã niscãntsã farã s-shtibã ashtiptarã anghilji. 3 Adutsets aminti hãpsãnitslji, canda s-eara ligats deadun cu elji, sh-atselji cai s-tirãnseascã, metsi sh-voi idyilji avets un trup ca elji. 4 Mãrtarea s-hibã tinjisitã di tuts, sh-patlu a mãrtariljei nipãnĝãnit, cã Dumnidzãlu va s-giudicã putãnjsitorlji sh curunã-cãlcatslji. 5 Purtarea a voastrã s-hibã nu prit vrearea a pãrãlui, hinda hãristisits cu atsea tsi avets, cã Dumnidzãlu ari dzãsã: "Pute nu va ti alasã sh-nu va ti apãrãtsescu."✝ 6 Ashãtsi noi, avãnda curaiu s-dzãtsem: "Domnul easti agiutorlu a meu sh-nu va am fricã. Tsi va nji fac omlu?"✝ 7 Adutsets aminti mãrlji a voshtri cai vã dimãndarã zborlu a Dumnidzãlui. Mutrits cu cãshtiga bitisita a banãljei a lor sh-urmats pistea a lor. 8 Isus Hristos easti idyiul aieri, azã sh-di tutã eta. 9 Nu vã arãdets cu soi di soi di nvitsãturi xeani, cã easti ghini tsi inima si nvãrtusheascã prit harul, nu prit mãcãrili tu cai nu vidzurã hãiri atselji cai alãgarã dupã eali. 10 Noi avem un altar tu cai nu au ndreptul s-mãcã atselji cai huzmitipsescu tu tendã. 11 Cã trupurili a nimaljilor atsilor, tsi sãndzili a lor u adutsi trã amãrtii arhipreftul la Sãmta a Sãmtsãlor, s-ardã tuti nafoarã dit cãmpu. 12 Trã atsea sh-Isusul tra si sãmtseascã populu prit sãndzili a lui, s-mundui nafoarã di poarta a cãsãbãlui. 13 Ashãtsi, s-ishim la nãsu nafoarã tu cãmpu, tsãnãnda arushinea cai elu tsãnu, 14 cã nu avem aoa un cãsãbã di totãna, ma cãftãm atselu tsi va yinã. 15 Prit Isus, s-lji adutsem dipriunã al Dumnidzãu unã curbani di alãvdari, va s-dzãcã frutlu a budzãlor tsi mãrtirsescu* numa a lui. 16 Sh-nu agãrshits buneatsa sh-mpãrtsãrea cu altsã atsea tsi avets, cã cu ahtãri curbãnji s-hãrseashti Dumnidzãlu.

17 Cãndãrsits-vã a mãrlor a voshtri sh-sumbãgats-vã a lor, cã elji sta dishtiptats pristi suflitli a voastri, ca atselji cai va da lugurii, cu nãeti tra s-u facã aestã cu harauã sh-nu suschirãnda, cã aestã va eara fãrã di ufelii trã voi. 18 Rugats-vã trã noi cã him cãndãrsits cã avem conshtintsã bunã, vrãnda s-nã purtãm ghini la tuti lucrili. 19 Sh-vã fãtsem rigeai ma multã s-vã rugats cu nãeti tsi cãt ma curundu s-mi tornu la voi.

20 Tora, Dumnidzãlu a paciljei, atsel cai adusi nsus dit mortsã, Domnul a nostru Isus, Picurarlu atsel marli a oilor, prit sãndzili a pisti-ligãturiljei atsiljei di totãna, 21 s-vã facã axiu la itsi lucru bun, tra s-fãtsets vrearea a lui, fãcãnda tu noi atsea tsi easti arsitã nãintea a lui, prit Isus Hristos, a cui s-lji hibã mãrirea tu eta a etilor. Amin.

22 Tora vã fac rigeai, frats sh-surãri, arãvdats aestu zbor ti curaiu, cã sh-vã scriai pi shcurtu. 23 Si shtits cã fratili a nostru Timote easti sãlãghit dit hapsi, sh-macã elu yini curundu, va vã vedu deadun cu nãsu. 24 Salutats-lã tuts mãrlji a voshtri sh-tuts populu a Dumnidzãlui. Vã pitrec sãnãtati sh-atselji di Italia. 25 Harul s-hibã cu voi tuts!