1 Trã aestã, frats sh-surãri sãmtsã, pãrtashi la acljimarea tsereascã, bãgats mintea la apostulu sh-la arhipreftul a mãrtirsiriljei a noastrã, la Isus. 2 Elu eara pistimen cãtrã atsel tsi lu featsi ashã cum easti sh-Moisiu tu casa al Dumnidzãu. 3 Isusul easti axiu cu ma multu tinjii dicãt Moisiul, metsi atsel cai adrã casa ari ma multu tinjii di casa tsi elu adrã. 4 Cathi casã s-adari di tsiniva, ma atsel cai li adrã tuti easti Dumnidzãlu. 5 Moisiul dealihea fu pistimen tu tutã casa al Dumnidzãu ca huzmichear, trã mãrtiria atsilor lucri tsi prindea s-dzãtsea, 6 ma Hristolu easti pistimen ca Hiljiu pristi casa a lui sh-casa a lui him noi, ma s-tsãnem cutedzlu sh-nãdia tu cai ni alãvdãm.

7 Trã atsea, ashã cum dzãtsi Duhlu Sãmtu:

"Azã, ma avdzãts boatsea a lui,

8 nu li nchitrits ininjli a voastri

ca tu rebilipsiri, tu dzua a cãrteariljei tu irnjii,

9 cãndu pãrintsãlji a voshtri mi bãgarã

tu provã sitãxinda sh-macã vidzurã faptili a meali

10 trã patrudzãtsi di anji.

Tr-atsea mi inãtusii cu aestã farã sh-dzãshã:

‘Totãna cher tu inima a lor

sh-elji nu li cunuscurã cãljurili a meali.’

11 Ashã cum mi giurai tu inatea a mea:

‘Elji nu va intrã pute tu dispustusirea a mea!’"✝

12 Bãgats mintea, frats sh-surãri, tra s-nu s-aflã la vãrã di voi unã inimã arauã sh-nipistimenã, tsi s-dipãrteadzã di Dumnidzãlu atsel yiulu. 13 Ma ghini incurajats un-alantu cathi dzuã, pãnã cãndu s-dzãtsi aestã "azã", tra s-nu nchitreascã vãrã di voi di arãdearea a amãrtiiljei. 14 Cã him faptsã urtatsi a Hristolui, macã va u tsãnem niminat pãnã tu soni cãndãrsirea a ahurhitãljei, 15 iarã s-dzãtsi:

"Azã, ma s-avdzãts boatsea a lui,

nu nchitrits ininjli a voastri

ca tu dzua a rebilipsiriljei."✝

16 Cã, cai furã atselji tsi, cãndu avdzãrã s-rebilipsirã? Nu furã atselji cai ishirã dit Eghyptu prit Moisiu? 17 Sh-cu cai s-inãtusi trã patrudzãtsi di anji? Vahi, nu cu atselji cai amãrtisirã, cufumli a cãror cai cãdzurã tu irnjii? 18 Sh-trã cai s-giurã cã nu va intrã tu dispustusirea a lui, mash trã atselji cai furã nicãndãrsitsi? 19 Ashãtsi, videm cã elji nu puturã s-intrã trã itia a nipistipsiriljei.